Ruṱe 2:1-23
2 Naomi o vha e na shaka ḽa munna wawe ḽe ḽa vha ḽo pfuma vhukuma; o vha a tshi pfi Boasi,+ e shaka ḽa Elimeleke.
2 Ruṱe mufumakadzi wa Mumoaba a amba na Naomi a ri: “Ndi khou humbela uri ndi ye u ṱala ṱhalane+ vhukati ha ṱhotshe tsimuni ya muthu naho e ufhio ane a ḓo ntsumbedza vhuthu.” Naomi a amba nae a ri: “Iya ṅwananyana wanga.”
3 A bva a ya masimuni u itela u tevhela vhakaṋi nga murahu a tshi khou ṱala ṱhalane. A ḓiwana e tsimuni ya Boasi,+ ane a vha shaka ḽa Elimeleke.+
4 Boasi a vhuya Betlehema, a amba na vhakaṋi a ri: “Yehova a vhe na inwi.” Vha mu fhindula vha ri: “Yehova nga a u fhaṱutshedze.”
5 Boasi a vhudzisa muṱhannga we a vha a tshi langa vhakaṋi a ri: “Uyu musidzana ndi nnyi?”
6 Onoyo muṱhannga we a vha a tshi langa vhakaṋi a fhindula a ri: “Hoyu ndi musidzana wa Mumoaba+ we a vhuya na Naomi kha ḽa Moaba.+
7 O humbela a ri: ‘Naa ndi nga tevhela vhakaṋi ndi tshi ṱala ṱhotshe?’+ U bva tshee a swika nga matsheloni ha athu u dzula fhasi u vhuya u swika a tshi awelanyana zwino murunzini.”
8 Boasi a amba na Ruṱe a ri: “Ṅwananyana wanga, thetshelesa. U songo ya u ṱala ṱhalane kha iṅwe tsimu, u songo ya huṅwe fhethu; u ṱwe na vhashumi vhanga vha vhafumakadzi.+
9 U futelele kha yeneyi tsimu ine vha khou i kaṋa, u tshimbile navho. Ndo amba na vhaṱhannga uri vha si u kwame.* Musi wo farwa nga ḓora u ye mvuvheloni u nwe maḓi e vhaṱhannga vha a ka.”
10 Musi a tshi pfa zwenezwo, a gwadama a ri: “Zwo ḓa hani uri u ntakalele, u ntsumbedze vhuthu, ngeno ndi mutsinda?”+
11 Boasi a fhindula a ri: “Ndo vhudzwa nga vhuḓalo zwoṱhe zwe wa zwi itela mazwale wau nga murahu ha u felwa nga munna wau na nḓila ye wa sia ngayo khotsi au na mme au na shango ḽa mashaka au u itela u ya kha vhathu vhe wa vha u sa vha ḓivhi.+
12 Ngavhe Yehova a tshi u lambedza kha zwe wa zwi ita,+ ngavhe u tshi wana malamba o fhelelaho* a bvaho ha Yehova Mudzimu wa Isiraele, we wa dzhena nga fhasi ha phapha dzawe u itela u wana vhukhudo.”+
13 A fhindula a ri: “Ntsumbedze vhuthu muṋe wanga ngauri wo nkhuthadza, wo amba zwavhuḓi na mulanda wau wa mufumakadzi, naho ndi si muṅwe wa vhalanda vhau vha vhasidzana.”
14 Boasi a amba nae nga tshifhinga tsha u ḽa a ri: “Iḓa ngeno u ḽe vhurotho u thothe kha viniga.” A dzula tsini na vhakaṋi. A mu ṋea thoro dzo kadzingwaho, Ruṱe a ḽa a fura, a sia dziṅwe.
15 Musi a tshi takuwa u itela u ṱala ṱhalane,+ Boasi a amba na muṱhannga wawe wa mulanda a ri: “Mu litsheni a ṱale na vhukati ha ṱhotshe, ni songo mu dina.+
16 Ni dovhe ni mu ṱomolele na dziṅwe ṱhotshe kha khuḽane, ni mu siele dzone uri a ṱale, ni songo mu thivhela.”
17 A ṱwa a tshi ṱala ṱhalane ḓuvha ḽa vhuya ḽa kovhela.+ Musi a tshi fhula zwe a ṱala zwa ṱoḓou vha tshikalo tsha efa* ya baḽi.
18 A zwi hwala a ṱuwa nazwo muḓini, mazwale wawe a vhona zwe a zwi ṱala. Ruṱe a bvisa zwiḽiwa zwe a zwi sia+ musi o no ḽa a fura, a zwi ṋea mazwale wawe.
19 Mazwale wawe a mu vhudzisa a ri: “Wo ṱala ngafhi ṋamusi? Wo shuma ngafhi? Ngavhe hu tshi fhaṱutshedzwa we a u tonda.”+ A vhudza mazwale wawe he a shuma hone a ri: “Munna we nda shuma nae ṋamusi u pfi Boasi.”
20 Naomi a amba na mazwale wawe a ri: “Ngavhe a tshi fhaṱutshedzwa nga Yehova, ane a dzula a tshi sumbedza lufuno lu sa shanduki kha vha tshilaho na vho faho.”+ Naomi a bvela phanḓa a ri: “Onoyo munna ndi shaka ḽashu.+ Ndi muṅwe wa vharengululi vhashu.”*+
21 Ruṱe mufumakadzi wa Mumoaba a amba a ri: “O amba na nṋe a ri: ‘U ṱwe na vhashumi vhanga u swika khaṋo yanga yoṱhe i tshi fhela.’”+
22 Naomi a amba na Ruṱe mazwale wawe a ri: “Ṅwananyana wanga, ndi khwine u tshi bva na vhashumi vhawe vha vhafumakadzi nṱhani ha uri u ye u kolelwa kha iṅwe tsimu.”
23 Ruṱe a ṱwa na vhashumi vha Boasi vha vhafumakadzi, a ṱala u swika khaṋo ya baḽi+ na ya goroi i tshi fhela. A bvela phanḓa a tshi dzula na mazwale wawe.+
Ṱhaluso dzi re magumoni a siaṱari
^ Kana “vha si u dine.”
^ Kana “muholo wo fhelelaho.”
^ Efa i lingana na ḽithara dzi ṱoḓaho u vha 22. Sedzani Ṱhume. B14.
^ Kana “muṅwe wa mashaka ashu a re na pfanelo ya u rengulula.”
