Ruṱe 3:1-18
3 Naomi a amba na mazwale wawe Ruṱe a ri: “Ṅwananga, naa a tho ngo fanela u u ṱoḓela haya*+ uri zwi u tshimbilele zwavhuḓi?
2 Naa Boasi a si shaka ḽashu?+ Ndi ene ane wa ḓi bva na vhashumi vhawe vha vhafumakadzi. Vhusiku vhuno Boasi u ḓo vha a tshi khou fhula baḽi fhethu hune ha fhefherwa hone.*
3 U ṱambe, u ḓole mapfura a nukhelelaho; u ambare zwavhuḓi, u ye fhethu hune ha fhefherwa hone.* U ite vhungoho ha uri onoyo munna a songo u vhona u swika a tshi fhedza u ḽa na u nwa.
4 Musi a tshi ya u eḓela, u sedze fhethu hune a ḓo eḓela hone; u ye u fukule milenzhe yawe, u eḓele henefho. U ḓo u vhudza zwine wa fanela u zwi ita.”
5 A fhindula a ri: “Zwoṱhe zwe wa mmbudza ndi ḓo zwi ita.”
6 Ngauralo, a tsela fhethu hune ha fhefherwa hone,* a ita zwoṱhe zwe mazwale wawe a mu vhudza uri a zwi ite.
7 Nga tshenetsho tshifhinga, Boasi a ḽa, a nwa a takala. A ya a eḓela tsini na thulwi ya thoro. Nga murahu ha zwenezwo, a ṋangavhedza a ḓa a fukula milenzhe ya Boasi a eḓela henefho.
8 Vhukati ha vhusiku Boasi a thoma u tetemela, a tshi lavhelesa a vhona mufumakadzi o eḓela milenzheni yawe!
9 A ri: “Ndi iwe nnyi?” Ruṱe a fhindula a ri: “Ndi nṋe Ruṱe mulanda wau wa mufumakadzi. Fukedza mulanda wau wa mufumakadzi nga tshiambaro tshau, ngauri u murengululi.”+
10 Boasi a ri: “Ṅwananga, ngavhe Yehova a tshi u fhaṱutshedza. Zwino wo sumbedza lufuno lwau lu sa shanduki u fhira u thomani,+ ngauri a wo ngo tevhela vhaṱhannga vha vhashayi kana vho pfumaho.
11 Ṅwananga, u songo ofha. Ndi ḓo ita zwoṱhe zwine wa amba,+ ngauri muṅwe na muṅwe kha uno muḓi u a zwi ḓivha uri u mufumakadzi vhukuma.
12 Naho hu ngoho uri ndi murengululi,+ hu dovha ha vha na muṅwe murengululi ane a vha shaka ḽa tsini-tsini u fhira nṋe.+
13 Eḓela henefha vhusiku vhuno, arali a u rengulula nga matsheloni, zwo luga! Kha u rengulule.+ Fhedzi arali a sa ṱoḓi u u rengulula, ndi ana nga Yehova a tshilaho, nṋe ndi ḓo u rengulula. Eḓela henefha u swika nga matsheloni.”
14 Ruṱe a eḓela tsini na milenzhe yawe u swika nga maḓautsha uri a si vhonwe nga muthu. Boasi o vha a sa ṱoḓi zwi tshi ḓivhea uri ho vha ho ḓa mufumakadzi fhethu hune ha fhefherwa hone.*
15 A dovha a ri: “Ḓisa shoḽo ye wa i fuka u i ṱharamudze.” A i ṱharamudza, Boasi a mu shelela mielo ya rathi* ya baḽi khayo, a mu hwesa, nga murahu ha zwenezwo, Boasi a ya muḓini.
16 Ruṱe a vhuyelela kha mazwale wawe, we a ri khae: “Wo tshimbila hani* ṅwananga?” A vhudza mazwale wawe zwoṱhe zwe onoyo munna a mu itela zwone.
17 A ri: “O nṋea mielo ya rathi ya baḽi a ri: ‘U songo humela ha mazwale wau u songo fara tshithu.’”
18 Naomi a ri: “Ṅwananga dzula u swika u tshi ḓo ḓivha uri mafhungo a ḓo fhelela ngafhi, ngauri onoyo munna a nga si rudze mbilu u swika a tshi ḓo dzudzanya eneo mafhungo ṋamusi.”
Ṱhaluso dzi re magumoni a siaṱari
^ Thevhedz., “hune wa ḓo awela hone.”
^ Kana “luvhatani.”
^ Kana “luvhatani.”
^ Kana “luvhatani.”
^ Kana “luvhatani.”
^ Khamusi ndi mielo ya siha ya rathi kana ndi ḽithara dza 44. Sedzani Ṱhume. B14.
^ Thevhedz., “Ndi iwe nnyi?”
