Ruṱe 4:1-22
4 Nga tshenetsho tshifhinga Boasi a gonya khoroni+ ya muḓi a dzula henefho. Uḽa murengululi we Boasi a mu amba+ a fhira nga henefho. Boasi a ri: “Iwe Mugede iḓa ngeno u dzule fhasi.” Nga zwenezwo, a ḓa a dzula fhasi.
2 Nga murahu ha zwenezwo, a vhidza vhahulwane+ vha muḓi vha fumi a amba navho a ri: “Dzulani fhasi.” Vhone vha dzula fhasi.
3 Boasi a amba na murengululi+ a ri: “Naomi we a vhuya a tshi bva kha ḽa Moaba,+ u tea u rengisa tsimu ye ya vha i ya shaka ḽashu Elimeleke.+
4 Fhedzi nṋe nda humbula uri ndi u vhudze uri u ‘I renge phanḓa ha vhadzulapo na vhahulwane vha vhathu vhanga.+ Arali u tshi khou ṱoḓa u i rengulula, i rengulule; fhedzi arali u sa ḓo i rengulula, mmbudze uri ndi zwi ḓivhe, ngauri ndi iwe a re na ndugelo ya u i rengulula, ha kona u tevhela nṋe.’” Mugede a ri: “Ndo ḓiimisela u i rengulula.”+
5 Boasi a ri: “Musi u tshi renga tsimu kha Naomi, u tea u dovha wa i renga kha Ruṱe mufumakadzi wa Mumoaba, o felwaho nga munna uri u vusuluse dzina ḽa mufu kha ifa ḽawe.”+
6 Murengululi a fhindula a ri: “Ndi nga si kone u i rengulula, ngauri ndi nga tshinya ifa ḽanga. Iwe i rengulule i vhe yau u tshi shumisa ndugelo yanga ya u rengulula, ngauri a thi koni u i rengulula.”
7 Maitele a zwifhingani zwa kale ngei Isiraele nga ha ndugelo ya u rengulula na u ṋeana u itela u khwaṱhisedza zwa thengiselano ndi haya: Muthu o vha a tshi fanela u bvula thovho*+ yawe a i ṋekedza muṅwe, yeneyo yo vha i nḓila ya u khwaṱhisedza thendelano* i re mulayoni ngei Isiraele.
8 Musi murengululi a tshi amba na Boasi a ri: “I renge i vhe yau,” a bvula thovho* yawe.
9 Ngauralo, Boasi a amba na vhahulwane na vhathu vhoṱhe a ri: “Ṋamusi ni ṱhanzi+ dza uri ndi khou renga thundu yoṱhe ye ya vha i ya Elimeleke na ye ya vha i ya Kiliyoni na ya Mahaloni kha Naomi.
10 Ndi khou dzhia Ruṱe mufumakadzi wa Mumoaba, mufumakadzi wa Mahaloni uri a vhe mufumakadzi wanga uri ifa+ ḽa mufu ḽi ḓi dzula ḽi ḽawe uri dzina ḽa mufu ḽi si fheliswe kha vhahawe na khoroni ya muḓi wa hawe. Ṋamusi ni dziṱhanzi.”+
11 Vhahulwane na vhoṱhe vha re khoroni vha ri: “Ri dziṱhanzi! Ngavhe Yehova a tshi ita uri mufumakadzi wau a nge Rahele na Lea vhe vha fhaṱa nnḓu ya Isiraele.+ Ngavhe u tshi bvelela Efurata,+ u ḓiitele dzina ḽavhuḓi* ngei Betlehema.+
12 Ngavhe nnḓu yau i tshi nga nnḓu ya Perese,+ we Thamara a mu bebela Yuda, nga vhana vhane Yehova a ḓo u ṋea nga hoyu mufumakadzi.”+
13 Ngauralo, Boasi a vhinga Ruṱe a vha mufumakadzi wawe. A ita zwa vhudzekani nae, Yehova a ita uri a vhifhe muvhilini, a beba ṅwana wa mutukana.
14 Vhafumakadzi vha amba na Naomi vha ri: “Ngavhe hu tshi rendwa Yehova, we ṋamusi a si u litshe u si na murengululi. Ngavhe dzina ḽawe ḽi tshi rendwa Isiraele.
15 O* vusulusa vhutshilo hau, u ḓo u ṱhogomela wo no vha wa maḓuvha ngauri o bebwa nga mazwale wau ane a u funa,+ u khwine u fhira vharwa vha sumbe.”
16 Naomi a takula onoyo ṅwana a mu vhea kha khana, a mu ṱhogomela.*
17 Vhafumakadzi vha vhahura vha mu ira dzina, vha ri: “Naomi o bebelwa ṅwana wa mutukana.” Vha ri u pfi Obede.+ Ndi khotsi a Isai,+ khotsi a Davida.
18 Hoyu ndi mutevhe wa muṱa wa* Perese:+ Perese o beba Hetsironi,+
19 Hetsironi a beba Ramu, Ramu a beba Aminadaba,+
20 Aminadaba+ a beba Nahashoni, Nahashoni a beba Salimoni,
21 Salimoni a beba Boasi, Boasi a beba Obede,
22 Obede a beba Isai,+ Isai a beba Davida.+
Ṱhaluso dzi re magumoni a siaṱari
^ Kana “phashane, navhula.”
^ Kana “ya u ṱanziela.”
^ Kana “phashane, navhula.”
^ Thevhedz., “u ḓivhadze dzina.”
^ Ndi muḓuhulu wa Naomi.
^ Kana “a vha muleli wawe.”
^ Thevhedz., “Heyi ndi mirafho ya.”
