Vhahaṱuli 10:1-18
10 We a tevhela Abimeleke o vha e Thola murwa wa Phua murwa wa Dodo, munna wa ngei Isashari, we a tshidza Vhaisiraele.+ O vha a tshi dzula Samiri dzinguni ḽa thavhani dza Efuraimi.
2 O haṱula Vhaisiraele miṅwaha ya 23. A fa, a vhulungwa ngei Samiri.
3 A tevhelwa nga Yairi wa Mugiḽiada, a haṱula Vhaisiraele miṅwaha ya 22.
4 O vha e na vharwa vha 30 vhane vha ṋamela donngi dza 30, vhe na miḓi ya 30, ine na ṋamusi ya vhidzwa Hafothe-yairi;+ i shangoni ḽa Giḽiada.
5 Nga murahu Yairi a fa, a vhulungwa ngei Kamoni.
6 Vhaisiraele vha dovha vha ita zwi sa takadzi Yehova,+ vha thoma u gwadamela Vhobaali,+ zwifanyiso zwa Asiterothe, midzimu ya Siria, midzimu ya Sidoni, midzimu ya Moaba,+ midzimu ya Vhaamoni+ na midzimu ya Vhafilisita.+ Vha laṱa Yehova vha si tsha mu shumela.
7 Yehova a sinyutshela Vhaisiraele, a vha kumedzela zwanḓani zwa Vhafilisita na zwa Vhaamoni.+
8 Nga wonoyo ṅwaha vha tambudza na u tsikeledza zwihulu Vhaisiraele, vha tsikeledza Vhaisiraele vhoṱhe seli ha Mulambo wa Yorodane he ha vha hu shango ḽa Vhaamori ngei Giḽiada miṅwaha ya 18.
9 Vhaamoni vho vha vha tshi wela Mulambo wa Yorodane u itela u lwa na Vhayuda, Vhabenyamini na vha nnḓu ya Efuraimi; Vhaisiraele vho vha vho tsikeledzea zwihulu.
10 Vhaisiraele vha humbela Yehova uri a vha thuse,+ vha ri: “Ro tshinya phanḓa hau, nge ra laṱa Mudzimu washu ra shumela Vhobaali.”+
11 Fhedzi Yehova a amba na Vhaisiraele a ri: “Naa a tho ngo ni tshidza kha Vhaegipita,+ kha Vhaamori,+ kha Vhaamoni, kha Vhafilisita,+
12 kha Vhasidoni, kha Vhaamaleke na kha Vhamidiani musi vha tshi khou ni tsikeledza? Musi ni tshi nndilela, ndo ni tshidza zwanḓani zwavho.
13 Fhedzi no nndaṱa na shumela miṅwe midzimu.+ Ndi ngazwo ndi si tsha ḓo dovha nda ni tshidza.+
14 Tshimbilani ni ye u ṱoḓa thuso kha midzimu ye na i nanga.+ Nga i ni tshidze musi no tsikeledzea.”+
15 Fhedzi Vhaisiraele vha fhindula Yehova vha ri: “Ro tshinya. Ri ite zwiṅwe na zwiṅwe zwine wa funa. Ri khou humbela uri u ri tshidze ṋamusi.”
16 Vha bvisa midzimu ya mazwifhi vhukati havho vha shumela Yehova,+ lwe a si tsha kona u konḓelela u tambula ha Vhaisiraele.+
17 Nga u ya ha tshifhinga Vhaamoni+ vha kuvhangana, vha atha madennde ngei Giḽiada. Na Vhaisiraele vha kuvhangana, vha atha madennde ngei Mitsipa.
18 Vhathu na vhakololo vha Giḽiada vha amba nga tshavho vha ri: “Ndi nnyi ane a ḓo ranga phanḓa hu tshi lwiwa na Vhaamoni?+ Onoyo nga a vhe murangaphanḓa wa vhadzulapo vha Giḽiada.”
