Vhahaṱuli 13:1-25
13 Vhaisiraele vha dovha vha ita zwi sa takadzi Yehova,+ Yehova a vha kumedzela zwanḓani zwa Vhafilisita+ miṅwaha ya 40.
2 Nga tshenetsho tshifhinga, ho vha hu na muṅwe munna wa Tsora+ wa muṱa wa Vhadani+ we a vha a tshi pfi Manoa.+ Mufumakadzi wawe o vha a sa bebi, a si na vhana.+
3 Nga u ya ha tshifhinga muruṅwa wa Yehova a ḓa kha onoyo mufumakadzi a ri: “A u bebi, a u na ṅwana, fhedzi u ḓo vhifha muvhilini wa beba ṅwana wa mutukana.+
4 U ṱhogomele uri u si nwe waini kana halwa,+ u songo ḽa naho tshi tshini tshi re na tshika.+
5 U ḓo vhifha muvhilini wa beba ṅwana wa mutukana, a songo vheulwa ṱhoho,+ ngauri onoyo ṅwana u ḓo vha Munazari wa Mudzimu u bva a tshi tou bebwa, ndi ene ane a ḓo ranga phanḓa kha u tshidza Vhaisiraele zwanḓani zwa Vhafilisita.”+
6 Onoyo mufumakadzi a ya a vhudza munna wawe a ri: “Mushumeli wa Mudzimu wa ngoho o ḓa kha nṋe, o vha a tshi nga muruṅwa wa Mudzimu wa ngoho, a tshi ofhisa vhukuma. A tho ngo mu vhudzisa uri o vha a tshi bva ngafhi, a sa mmbudze na dzina ḽawe.+
7 Fhedzi o amba na nṋe a ri: ‘U ḓo vhifha muvhilini wa beba ṅwana wa mutukana. U songo nwa waini kana halwa, u songo ḽa naho tshi tshini tshi re na tshika, ngauri onoyo ṅwana u ḓo vha Munazari wa Mudzimu u bva a tshi tou bebwa u swika a tshi fa.’”
8 Manoa a humbela Yehova a ri: “Mpfarele Yehova. Ndi khou humbela uri u tendele mushumeli wa Mudzimu wa ngoho we wa mu ruma uri a dovhe a vhuye a ri vhudze nḓila ine ra fanela u alusa ngayo ṅwana ane a ḓo bebwa.”
9 Mudzimu wa ngoho a thetshelesa Manoa, muruṅwa wa Mudzimu wa ngoho a dovha a ḓa kha onoyo mufumakadzi musi o dzula masimuni; munna wawe Manoa o vha e siho henefho.
10 Nga u ṱavhanya onoyo mufumakadzi a gidima a swika a vhudza munna wawe a ri: “Munna we a ḓa kha nṋe ḽiḽa ḓuvha o dovha a ḓa kha nṋe.”+
11 Manoa a takuwa a ṱuwa na mufumakadzi wawe. A ya ha onoyo munna a amba nae a ri: “Naa ndi iwe we wa amba na mufumakadzi wanga?” A ri: “Ndi nṋe.”
12 Nga zwenezwo, Manoa a ri: “Ngavhe zwe wa ri fhulufhedzisa zwi tshi itea! Uyo ṅwana a aluswe nga nḓila-ḓe, u ḓo ita mini?”+
13 Muruṅwa wa Yehova a amba na Manoa a ri: “Mufumakadzi wau a iledze zwoṱhe zwe nda mu vhudza.+
14 A songo ḽa tshiṅwe na tshiṅwe tshi bvaho kha munḓirivhe, a songo nwa waini kana halwa,+ a songo ḽa naho tshi tshini tshi re na tshika.+ A tevhedze zwoṱhe zwe nda mu laya.”
15 Manoa a amba na muruṅwa wa Yehova a ri: “Ndi khou humbela uri u dzule, ri u ṱhavhele tshibudzana.”+
16 Fhedzi muruṅwa wa Yehova a amba na Manoa a ri: “Arali nda dzula, a thi nga ḽi zwiḽiwa zwau; fhedzi arali u tshi ṱoḓa u ṋekedza Yehova tshifhiwa tsha u fhiswa, u nga tshi ṋekedza.” Manoa o vha a sa zwi ḓivhi uri o vha e muruṅwa wa Yehova.
17 Manoa a amba na muruṅwa wa Yehova a ri: “Dzina ḽau ndi nnyi+ uri ri u hulise musi zwe wa amba zwi tshi itea?”
18 Naho zwo ralo, muruṅwa wa Yehova a amba nae a ri: “Ndi ngani u tshi khou mmbudzisa dzina ḽanga, samusi ḽi tshi mangadza?”
19 Manoa a dzhia tshibudzana na tshifhiwa tsha thoro a zwi ṋekedza Yehova henefho kha tombo. Ene o vha a tshi khou ita zwithu zwi mangadzaho musi Manoa na mufumakadzi wawe vho lavhelesa.
20 Musi khavhu ya mulilo i tshi bva kha aḽeṱare i tshi gonya nṱha, muruṅwa wa Yehova a gonya e kha khavhu i bvaho kha aḽeṱare musi Manoa na mufumakadzi wawe vho lavhelesa. Vha ṱavhanya vha khotha vho kwatamisa zwifhaṱuwo.
21 Muruṅwa wa Yehova a si tsha dovha a ḓa kha Manoa na mufumakadzi wawe. Nga zwenezwo, Manoa a zwi ṱhogomela uri o vha e muruṅwa wa Yehova.+
22 Manoa a amba na mufumakadzi wawe a ri: “Ri ḓo fa ngauri ro vhona Mudzimu.”+
23 Fhedzi mufumakadzi wawe a amba nae a ri: “Arali Yehova o vha a tshi ṱoḓa u ri vhulaya, o vha a sa ḓo ṱanganedza tshifhiwa tshashu tsha u fhiswa+ na tshifhiwa tsha thoro zwi bvaho tshanḓani tshashu, o vha a tshi ḓo vha a songo ri sumbedza hezwi zwithu zwoṱhe, o vha a tshi ḓo vha a songo ri vhudza haya mafhungo.”
24 Nga murahu, mufumakadzi a beba ṅwana wa mutukana, a mu ira dzina ḽa Simisoni;+ musi mutukana a tshi khou ḓi aluwa, Yehova a bvela phanḓa a tshi mu fhaṱutshedza.
25 Nga murahu ha tshifhinga, muya wa Yehova wa ḓa khae+ e Mahane-dani,+ vhukati ha Tsora na Esitaoli.+
