Vhahaṱuli 17:1-13
-
Midzimu ya zwifanyiso ya Mika na tshifhe wawe (1-13)
17 Ho vha hu na muṅwe munna wa ngei dzinguni ḽa thavhani dza Efuraimi+ we a vha a tshi pfi Mika.
2 A amba na mme awe a ri: “Naa u kha ḓi humbula shekele* dza 1 100 dza siḽiva dze wa tswelwa dzone, wa sema we a dzi tswa ndi tshi khou zwi pfa? Dzenedzo shekele dzi na nṋe. Ndi nṋe we nda dzi dzhia.” Mme awe a ri: “Ngavhe Yehova a tshi fhaṱutshedza murwa wanga.”
3 A humisela shekele dza 1 100 dza siḽiva kha mme awe, mme awe a ri: “Dzenedzi shekele ndi ḓo dzi ṋea Yehova ndi tshi itela murwa wanga uri a dzi shumise u ita tshifanyiso tsho vhaḓwaho na tshifanyiso tsha tsimbi.+ Zwino ndi khou dzi humisela kha iwe.”
4 Musi o no humisela shekele dza siḽiva kha mme awe, mme awe a dzhia shekele dza 200 a dzi ṋea muthu we a vha a tshi ita siḽiva.* A ita tshifanyiso tsho vhaḓwaho na tshifanyiso tsha tsimbi; zwa vhewa nḓuni ya Mika.
5 Onoyo munna Mika o vha e na nnḓu ya midzimu, a ita efodo*+ na zwifanyiso zwa terafimi,*+ a vhea muṅwe wa vharwa vhawe uri a shume sa tshifhe wawe.+
6 Misini yeneyo ho vha hu si na khosi kha ḽa Isiraele.+ Muṅwe na muṅwe o vha a tshi ita zwine a vhona zwo tea khae.+
7 Nga tshenetsho tshifhinga ho vha hu na muṱhannga wa Betlehema+ ngei Yuda we a vha e wa muṱa wa Yuda. O vha e Mulevi+ we a vha e na tshifhinga tshilapfu a tshi khou dzula henefho.
8 Onoyo muṱhannga a pfuluwa muḓini wa Betlehema ngei Yuda uri a wane fhethu ha u dzula. Musi e lwendoni lwawe a swika dzinguni ḽa thavhani dza Efuraimi nḓuni ya Mika.+
9 Mika a amba nae a ri: “U bva ngafhi?” Ene a fhindula a ri: “Nṋe ndi Mulevi a bvaho Betlehema ngei Yuda, ndi khou tshimbila ndi tshi ṱoḓa fhethu ha u dzula.”
10 Mika a amba nae a ri: “Dzula na nṋe uri u vhe mueletshedzi* na tshifhe wanga. Ndi ḓo u ṋea shekele* dza fumi dza siḽiva nga ṅwaha, zwiambaro zwo teaho na zwiḽiwa.” Ngauralo, Mulevi a dzula nae.
11 Nga zwenezwo, muṱhannga wa Mulevi a tenda u dzula na Mika, a tou nga muṅwe wa vharwa vhawe.
12 Zwiṅwe hafhu, Mika a vhea muṱhannga wa Mulevi uri a shume sa tshifhe wawe,+ a dzula nḓuni ya Mika.
13 Mika a ri: “Zwino ndi a ḓivha uri Yehova u ḓo nnyitela zwivhuya, ngauri Mulevi o vha tshifhe wanga.”
Ṱhaluso dzi re magumoni a siaṱari
^ Shekele nthihi i lemela gramu dza 11,4. Sedzani Ṱhume. B14.
^ Kana “a dzi ṋea mufuli wa siḽiva.”
^ Kana “midzimu ya muṱani; midzimu ya zwifanyiso.”
^ Sedzani Mutevhe Wa Ṱhalutshedzo Ya Maipfi.
^ Thevhedz., “khotsi.”
^ Shekele nthihi i lemela gramu dza 11,4. Sedzani Ṱhume. B14.
