Vhahaṱuli 18:1-31
18 Misini yeneyo ho vha hu si na khosi ngei Isiraele.+ Misini yeneyo lushaka lwa Vhadani+ lwo vha lu tshi khou ṱoḓa shango ḽine lwa nga dzula khaḽo ngauri u swika nga tshenetsho tshifhinga lwo vha lu sa athu u wana shango ḽine ḽa vha ifa ḽalwo vhukati ha tshaka dza Isiraele.+
2 Vhadani vha ruma vhanna vhaṱanu vha muṱani wavho, vhanna vha faneleaho vha bvaho Tsora na Esitaoli,+ uri vha ṱole shango na u ḽi tandula. Vha amba navho vha ri: “Iyani ni tandule shango.” Musi vha tshi swika dzinguni ḽa thavhani dza Efuraimi, nḓuni ya Mika,+ vha eḓela henefho.
3 Musi vhe tsini na nnḓu ya Mika, vha ḓivha ipfi ḽa muṱhannga wa Mulevi, vha ya khae vha mu vhudzisa uri: “Ndi nnyi we a u ḓisa fhano? U khou ita mini fhano? Wo dzulelani fhano?”
4 A vha fhindula a ri: “Mika o ita thendelano na nṋe, o nthola uri ndi shume sa tshifhe wawe.”+
5 Vha amba nae vha ri: “Ri khou humbela uri u vhudzise Mudzimu arali lwendo lwashu lu tshi ḓo vha lu bvelelaho.”
6 Tshifhe a amba navho a ri: “Tshimbilani nga mulalo. Yehova u na inwi lwendoni lwaṋu.”
7 Nga zwenezwo, vhenevho vhanna vhaṱanu vha fhirela phanḓa vha swika Laisi.+ Vha vhona nḓila ye vhathu vha vha vha tshi dzula ngayo vha sa ḓitiki nga vhaṅwe u fana na Vhasidoni. Vho vha vho dzika, vha sa vhilaeli nga tshithu,+ hu si na mukundi ane a vha tsikeledza na u vha thithisa shangoni ḽavho. Vho vha vhe kule na Vhasidoni, vha sa shumisani na vhaṅwe vhathu.
8 Musi vha tshi humela kha vhahavho ngei Tsora na Esitaoli,+ vhahavho vha amba navho vha ri: “No tshimbila hani?”
9 Vha fhindula vha ri: “Kha ri gonye ri ye u lwa navho; ngauri ro zwi vhona uri shango ndi ḽavhuḓi vhukuma. Ndi ngani ni tshi khou timatima? Ni songo lenga u ya u dzhia shango.
10 Musi ni tshi swika ni ḓo wana vhathu vha sa vhilaeli nga tshithu,+ shango ḽeneḽo ndi ḽihulu. Mudzimu o ḽi kumedzela zwanḓani zwaṋu, ndi fhethu hune ha vha na tshiṅwe na tshiṅwe tshi re kha ḽifhasi.”+
11 Kha muṱa wa Vhadani, ha takuwa vhanna vha 600 vho ḓiṱamaho vha bvaho Tsora na Esitaoli+ u itela u lwa.
12 Vha gonya vha atha madennde Kiriate-yearimi+ ngei Yuda. Ndi ngazwo henefho fhethu, hune ha vha vhukovhela ha Kiriate-yearimi, hu tshi vhidzwa Mahane-dani*+ u swika na ṋamusi.
13 Vha ṱuwa henefho dzinguni ḽa thavhani dza Efuraimi, vha ya nḓuni ya Mika.+
14 Nga zwenezwo, vhanna vhaṱanu vhe vha ya u ṱola shango ḽa Laisi+ vha amba na vhahavho vha ri: “Naa ni a zwi ḓivha uri kha dzenedzi nnḓu hu na efodo,* zwifanyiso zwa terafimi,* tshifanyiso tsho vhaḓwaho na tshifanyiso tsha tsimbi?+ Zwino humbulani nga ha zwine na fanela u ita.”
15 Vha ya vha dzhena nḓuni ya muṱhannga wa Mulevi,+ ine ya vha nnḓu ya Mika, vha mu vhudzisa mutakalo.
16 Vhenevho vhanna vha Dani vha 600,+ vho ḓiṱamaho u itela u lwa, vha ima muṋangoni wa khoro.
17 Vhaḽa vhanna vhaṱanu vho yaho u ṱola shango+ vha dzhena nga ngomu u itela u dzhia tshifanyiso tsho vhaḓwaho, efodo,+ zwifanyiso zwa terafimi*+ na tshifanyiso tsha tsimbi.+ (Tshifhe+ o vha o ima muṋangoni wa khoro na vhanna vha 600 vho ḓiṱamaho u itela u lwa.)
18 Vha dzhena nḓuni ya Mika vha dzhia tshifanyiso tsho vhaḓwaho, efodo, zwifanyiso zwa terafimi* na tshifanyiso tsha tsimbi. Tshifhe a vha vhudzisa a ri: “Ni khou ita mini?”
19 Fhedzi vha amba nae vha ri: “Fhumula. U songo amba tshithu, ṱuwa na riṋe uri u vhe mueletshedzi* na tshifhe washu. Ndi zwifhio zwa khwine, ndi u vha tshifhe kha nnḓu ya muthu muthihi+ kana u vha tshifhe wa lushaka na muṱa kha ḽa Isiraele?”+
20 Tshifhe a zwi takalela, a dzhia efodo, zwifanyiso zwa terafimi* na tshifanyiso tsho vhaḓwaho+ a ṱuwa na vhenevho vhathu.
21 Musi vha tshi huma, vha rangisa phanḓa vhana, zwifuwo na zwithu zwa ndeme.
22 Vho vha vho no tshimbila tshikhala u bva nḓuni ya Mika musi vhanna vha dzulaho nḓuni dza tsini na nnḓu ya Mika vha tshi rambana u itela u tevhela Vhadani.
23 Musi vha tshi vhidzelela Vhadani, vha rembuluwa vha amba na Mika vha ri: “Mulandu ndi mini? Ndi ngani no rambana?”
24 A ri: “No dzhia midzimu yanga ye nda i ita, no dovha na ṱuwa na tshifhe. Zwino ndo salelwa nga mini? Ndi ngani ni tshi nga mmbudzisa uri: ‘Mulandu ndi mini nga iwe?’”
25 Ngauralo, Vhadani vha fhindula vha ri: “U songo ri fhunga; arali zwa ralo vhanna vho sinyuwaho vha nga u rwa vha vhulaya iwe na muṱa wau.”
26 Vhadani vha ṱuwa; Mika a vhona uri vha na maanḓa u mu fhira, a rembuluwa a vhuyelela nḓuni yawe.
27 Musi vho no dzhia midzimu ye Mika a i ita, u katela na tshifhe wawe, vha ya Laisi,+ hune ha vha na vhathu vho dzikaho vha sa vhilaeli nga tshithu.+ Vha vha vhulaya nga mabanga, vha fhisa muḓi nga mulilo.
28 Ho vha hu si na we a vha a tshi nga vha lamulela ngauri Laisi wo vha u kule na Sidoni, vho vha vha sa shumisani na vhaṅwe, wo vha u govhani ḽa Bethe-rehobo.+ Vha fhaṱulula muḓi vha dzula khawo.
29 Zwiṅwe hafhu, vha ri wonoyo muḓi u pfi Dani+ ḽine ḽa vha dzina ḽa khotsi avho Dani, we a bebelwa Isiraele.+ Naho zwo ralo, dzina ḽawo ḽa kale ndi Laisi.+
30 Nga murahu ha zwenezwo, Vhadani vha imisa tshenetsho tshifanyiso tsho vhaḓwaho,+ Yonathani+ murwa wa Gerisomi,+ murwa wa Mushe na vharwa vhawe vha vha vhotshifhe vha lushaka lwa Vhadani u swika nga ḓuvha ḽe vhadzulapo vha ḽeneḽo shango vha ya vhuthubwani.
31 Vha imisa tshifanyiso tsho vhaḓwaho tshe Mika a tshi ita, tsha dzula henefho misi yoṱhe musi nnḓu ya Mudzimu wa ngoho i ngei Shiḽo.+
Ṱhaluso dzi re magumoni a siaṱari
^ Zwine zwa amba uri “Madennde A Dani.”
^ Sedzani Mutevhe Wa Ṱhalutshedzo Ya Maipfi.
^ Kana “midzimu ya muṱani; midzimu ya zwifanyiso.”
^ Kana “midzimu ya muṱani; midzimu ya zwifanyiso.”
^ Kana “midzimu ya muṱani; midzimu ya zwifanyiso.”
^ Thevhedz., “khotsi.”
^ Kana “midzimu ya muṱani; midzimu ya zwifanyiso.”
