Vhahaṱuli 19:1-30
-
Vhabenyamini vha tzhipa mufumakadzi ngei Gibia (1-30)
19 Misini yeneyo, musi hu sa athu u vha na khosi kha ḽa Isiraele.+ Mulevi we nga tshenetsho tshifhinga a vha a tshi dzula fhethu hune ha vha kule dzinguni ḽa thavhani dza Efuraimi+ a vhinga mufumakadzi a bvaho Betlehema+ ngei Yuda, onoyo a vha mufumakadzi wawe wa vhuimo ha fhasi.*
2 Fhedzi mufumakadzi wawe wa vhuimo ha fhasi* a ita vhupombwe, a mu ṱutshela a ya nḓuni ya khotsi awe Betlehema ngei Yuda. Onoyo mufumakadzi a dzula henefho miṅwedzi miṋa.
3 Ngauralo, munna wawe a mu tevhela u itela u mu luvhelela uri a vhuye; o vha e na muḓinḓa wawe na donngi mbili. A ṱanganedza onoyo munna nḓuni ya khotsi awe. Musi khotsi awe a tshi vhona onoyo munna, a mu ṱanganedza o takala.
4 Makhulu wa onoyo munna, ane a vha khotsi a mufumakadzi wawe, a mu kombetshedza uri a dzule nae maḓuvha mararu; vha ḽa vha nwa, a eḓela henefho.
5 Nga ḓuvha ḽa vhuṋa, musi vha tshi vuwa nga matsheloni-tsheloni uri vha ṱuwe, khotsi a onoyo mufumakadzi a amba na mukwasha wawe a ri: “Iḽa uri u wane maanḓa uri u kone u ṱuwa.”
6 Vha dzula fhasi vha ḽa, vha nwa; nga murahu khotsi a onoyo mufumakadzi a amba na onoyo mukwasha a ri: “Ndi khou humbela uri u eḓele fhano u ḓiphiṋe.”
7 Musi onoyo mukwasha a tshi vuwa uri a ṱuwe, makhulu wawe vha mu luvhelela, a dovha a eḓela henefho.
8 Musi a tshi vuwa nga matsheloni-tsheloni nga ḓuvha ḽa vhuṱanu uri a ṱuwe, khotsi a onoyo mufumakadzi a ri: “Ndi khou humbela uri u ḽe uri u wane maanḓa uri u kone u ṱuwa.” Vha dzula ḽa vhuya ḽa kovhela, vha bvela phanḓa vha tshi khou ḽa.
9 Musi onoyo mukwasha a tshi vuwa uri a ṱuwe na mufumakadzi wawe wa vhuimo ha fhasi* na muḓinḓa wawe, makhulu wawe, ane a vha khotsi a mufumakadzi wawe, a amba nae a ri: “Vhona, ḽi khou kovhela zwino. Ndi khou humbele uri u eḓele. Ho no vha vhusiku. Eḓela fhano u ḓiphiṋe. Matshelo u nga vuwa nga matsheloni-tsheloni wa fara lwendo wa ya hayani hau.”
10 Naho zwo ralo, onoyo munna a si tsha ṱoḓa u eḓela henefho, a ṱuwa a ya Yebusi, hune ha vha Yerusalema.+ O vha e na donngi mbili dze dza vha dzo vhofhelelwa sale, mufumakadzi wawe wa vhuimo ha fhasi* na muḓinḓa wawe.
11 Musi vhe tsini na Yebusi, ḽo vha ḽi tshi vho kovhela. Ngauralo, muḓinḓa a amba na muṋe wawe a ri: “Naa ri nga si dzhene muḓini wa Vhayebusi ra eḓela hone?”
12 Fhedzi muṋe wawe a ri: “Ri nga si dzhene muḓini wa vhatsinda vhane vha si vhe Vhaisiraele. Kha ri fhirele Gibia.”+
13 A amba na muḓinḓa wawe a ri: “Kha ri ṱuwe ri lingedze u swika kha muṅwe wa yeneyo miḓi; ri ḓo eḓela Gibia kana Rama.”+
14 Vha bvela phanḓa vha tshi tshimbila, ḓuvha ḽa kovhela musi vhe tsini na Gibia, une wa vha wa Vhabenyamini.
15 Vha dzhena henefho uri vha eḓele Gibia. Musi vho no dzhena, vha dzula khoroni ya muḓi, fhedzi hu si vhe na muthu we a vha ṱanganedza nḓuni yawe uri vha eḓele hone.+
16 Ha vhuya ha swika muṅwe mukalaha nga madekwana we a vha a tshi khou bva u shuma tsimuni. O vha a tshi bva dzinguni ḽa thavhani dza Efuraimi,+ o vha o no dzula Gibia lwa tshifhinganyana; fhedzi vhadzulapo vha wonoyo muḓi vho vha vhe Vhabenyamini.+
17 Musi onoyo mukalaha a tshi lavhelesa a vhona munna, ane a vha mutshimbili* o dzula khoroni ya muḓi. Ngauralo, onoyo mukalaha a ri: “U khou ya ngafhi, u bva ngafhi?”
18 A fhindula a ri: “Ri bva Betlehema ngei Yuda ri khou ya fhethu hune ha vha kule dzinguni ḽa thavhani dza Efuraimi, ndi henefho hune nda dzula hone. Ndo vha ndo ya Betlehema ngei Yuda,+ ndi khou ya nḓuni ya Yehova,* fhedzi a hu na muthu na muthihi we a ri ṱanganedza nḓuni yawe.
19 Ri na maṱanga na furu zwo eḓanaho donngi dzashu,+ nṋe, mufumakadzi wanga na muḓinḓa wanga ri na vhurotho+ na waini. A hu na tshine ra tshi shaya.”
20 Naho zwo ralo, onoyo mukalaha a ri: “Mulalo nga u vhe na iwe! Ndi ḓo ṱhogomela zwoṱhe zwine wa zwi shaya. Fhedzi u songo eḓela hafha khoroni.”
21 A mu isa nḓuni yawe, a ṋea donngi zwiḽiwa. Nga murahu vha ṱamba milenzhe, vha ḽa vha nwa.
22 Musi vha tshi khou ḓiphiṋa, vhaṅwe vhanna vha sa ḓivhalei vha wonoyo muḓi vha tanga yeneyo nnḓu vha tshi khou gikhinya vothi, vha amba na onoyo mukalaha ane a vha muṋe wa nnḓu vha ri: “Bvisa uyo munna we a ḓa nḓuni yau uri ri ite zwa vhudzekani nae.”+
23 Nga zwenezwo, muṋe wa nnḓu a bvela nnḓa a amba navho a ri: “Aiwa, vhahashu, ni songo ita hezwi zwithu zwivhi. Ndi khou tou humbela, hoyu munna ndi mueni nḓuni yanga. Ni songo ita hezwi zwithu zwi shonisaho.
24 Dzhiani ṅwananyana wanga ane a kha ḓivha musidzana* na mufumakadzi wa vhuimo ha fhasi* wa uyu munna. Ndi ḓo vha bvisela nnḓa na vha tzhipa, na vha ita zwiṅwe na zwiṅwe zwine na funa.+ Fhedzi ni songo ita zwithu zwi shonisaho kha hoyu munna.”
25 Fhedzi vhenevho vhanna vha hana u mu thetshelesa, uḽa munna a dzhia mufumakadzi wawe wa vhuimo ha fhasi,*+ a mu bvisela nnḓa khavho. Vha mu tzhipa na u mu tambudza vhusiku hoṱhe u swika ḽi tshi tsha. Vha mu litsha musi ḽo no tsha.
26 Nga matsheloni-tsheloni onoyo mufumakadzi a ḓa a wela muṋangoni wa nnḓu ya onoyo mukalaha he ha vha hu na muṋe wawe, a eḓela henefho u swika ḽi tshi tsha.
27 Musi muṋe wawe a tshi vuwa nga matsheloni, a tshi vula mavothi a nnḓu uri a bvele phanḓa na lwendo lwawe, a vhona mufumakadzi wawe wa vhuimo ha fhasi* o wela henefho muṋangoni wa nnḓu, zwanḓa zwawe zwi muṋangoni.
28 A amba nae a ri: “Vuwa ri ṱuwe.” Fhedzi onoyo mufumakadzi a si fhindule. Onoyo munna a mu hwala a mu vhea kha donngi, vha ya hayani hawe.
29 Musi a tshi swika hayani hawe, a dzhia lufhanga, a tumukanya mufumakadzi wawe wa vhuimo ha fhasi* a bva zwipiḓa zwa 12, a zwi rumela kha shango ḽiṅwe na ḽiṅwe ḽa Isiraele.
30 Muṅwe na muṅwe we a zwi vhona a ri: “Zwithu zwo raloho a zwi athu u vhuya zwa itea kana u vhonwa u bva tshee Vhaisiraele vha bva shangoni ḽa Egipita u swika ṋamusi. Humbulani nga hazwo, langanani,+ ni ri vhudze zwine ra fanela u zwi ita.”
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Kana “muendi.”
^ Kana khamusi, “ndi shuma nḓuni ya Yehova.”
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
