Vhahaṱuli 21:1-25
-
Vhabenyamini vha a tshidzwa (1-25)
21 Vhanna vha Isiraele vho ana ngei Mitsipa+ vha ri: “A hu na na muthihi kha riṋe ane a ḓo tenda Mubenyamini a tshi vhinga ṅwananyana wawe.”+
2 Nga zwenezwo, vhathu vha ḓa Bethele,+ vha dzula henefho phanḓa ha Mudzimu wa ngoho u swika ḽi tshi kovhela vha tshi khou lila na u zhamba.
3 Vha tshi ri: “Yehova Mudzimu wa Isiraele, ndi ngani zwenezwi zwithu zwo itea kha ḽa Isiraele? Ndi ngani ṋamusi luṅwe lushaka lu si tsheeho Isiraele?”
4 Nga ḓuvha ḽi tevhelaho vhathu vha vuwa nga matsheloni-tsheloni vha fhaṱa aḽeṱare henefho u itela u ṋekedza zwifhiwa zwa u fhiswa na zwifhiwa zwa u pfumedzana.+
5 Vhathu vha Isiraele vha ri: “Ndi lufhio lushaka kha tshaka dzoṱhe dza Isiraele lwe lwa si ḓe u kuvhangana phanḓa ha Yehova?” Ngauri vho vha vho ita muano wa ndeme wa uri muṅwe na muṅwe we a si ḓe phanḓa ha Yehova ngei Mitsipa o vha a tshi ḓo vhulawa.
6 Nga zwenezwo, vhathu vha Isiraele vha pfa vhuṱungu nga zwe zwa itea kha Vhabenyamini vhahavho. Vha ri: “Ṋamusi lushaka luthihi lwo fheliswa kha ḽa Isiraele.
7 Ri fanela u ita mini u itela u ṋea vho salaho vhafumakadzi, samusi zwino ro anela Yehova+ uri a ri nga vha tendeli vha tshi vhinga vhananyana vhashu?”+
8 Vha vhudzisa vha ri: “Ndi lushaka lufhio kha tshaka dza Isiraele lwe lwa si ḓe phanḓa ha Yehova ngei Mitsipa?”+ Ho vha hu si na na muthihi wa lushaka lwa Yabese-giḽiada we a ḓa madenndeni he tshivhidzo tsha vha tshi hone.
9 Musi vhathu vha tshi vhalwa, vha ṱhogomela uri henefho ho vha hu si na na mudzulapo na muthihi wa Yabese-giḽiada.
10 Ngauralo, tshitshavha tsha rumela vhanna vha re na maanḓa vhukuma vha 12 000 henengei. Tsha vha laya tsha ri: “Iyani ni vhulaye vhadzulapo vha Yabese-giḽiada nga banga, ni vhulaye na vhafumakadzi na vhana.+
11 Zwine na fanela u zwi ita ndi hezwi: Ni vhulaye vhanna vhoṱhe, na vhafumakadzi vhoṱhe vho no itaho zwa vhudzekani na munna.”
12 Kha vhenevho vhathu vha Yabese-giḽiada vha wana hu na vhasidzana vha 400 vha sa athu u itaho zwa vhudzekani na munna. Vha vhuya navho madenndeni a Shiḽo,+ hune ha vha ngei shangoni ḽa Kanana.
13 Tshitshavha tshoṱhe tsha rumela mulaedza kha Vhabenyamini vha re luwani lwa Rimoni+ uri vha ite mulalo navho.
14 Vhabenyamini vha vhuya nga tshenetsho tshifhinga. Vha vha ṋea vhafumakadzi vhe vha si vha vhulaye kha vhafumakadzi vha Yabese-giḽiada,+ fhedzi vha si vha lingane.
15 Vhathu vha pfa vhuṱungu nga zwe zwa bvelela kha Vhabenyamini+ ngauri Yehova o vha o fhandekanya tshaka dza Isiraele.
16 Nga zwenezwo, vhahulwane vha tshitshavha vha ri: “Ri ite mini uri ri wanele avha vhanna vho salaho vhafumakadzi, samusi vhafumakadzi vhoṱhe vha Vhabenyamini vho vhulawa?”
17 Vha ri: “Vho salaho vha Vhabenyamini vha fanela u wana ifa uri lwonolwu lushaka lu si fheliswe kha ḽa Isiraele.
18 Fhedzi a ro ngo tendelwa u vha ṋea vhananyana vhashu uri vha vha vhinge, ngauri vhathu vha Isiraele vho ana vha ri: ‘Hu ḓo semiwa ane a tenda ṅwana wawe wa musidzana a tshi vhingwa nga Mubenyamini.’”+
19 Mafheleloni vha ri: “Hu na vhuṱambo ha Yehova ṅwaha muṅwe na muṅwe ngei Shiḽo,+ hune ha vha devhula ha Bethele na vhubvaḓuvha ha nḓila khulwane ine ya gonya i tshi bva Bethele u swika Shikeme na tshipembe ha Lebona.”
20 Vha laya Vhabenyamini vha ri: “Iyani ni lalele masimuni a minḓirivhe.
21 Musi ni tshi vhona vhasidzana vha Shiḽo vha tshi bva uri vha ye u tshina, muṅwe na muṅwe waṋu u fanela u bva masimuni a minḓirivhe, a dzhie mufumakadzi nga khani kha vhenevho vhasidzana vha Shiḽo, ni humele shangoni ḽa Benyamini.
22 Arali vhokhotsi avho kana khaladzi dzavho dza ḓa u ni gungulela kha riṋe, ri ḓo vha vhudza uri: ‘Ri sumbedzeni vhuthu nga u vha thusa ngauri a ro ngo kona u thubela muṅwe na muṅwe wavho mufumakadzi,+ a no ngo vha ṋea vhana vhaṋu vha vhasidzana nga u tou ḓifunela ngauri no vha ni tshi ḓo vha na mulandu.’”+
23 Vhanna vha Benyamini vha ita nga u ralo, muṅwe na muṅwe a dzhia mufumakadzi kha vhafumakadzi vhane vha khou tshina. Nga murahu vha humela shangoni ḽa ifa ḽavho, vha fhaṱulula miḓi yavho+ vha dzula khayo.
24 Vhaisiraele vha balangana henefho nga tshenetsho tshifhinga, muṅwe na muṅwe a humela kha lushaka lwa hawe na muṱa wa hawe, vha ṱuwa henefho, muṅwe na muṅwe a humela shangoni ḽa ifa ḽawe.
25 Misini yeneyo ho vha hu si na khosi kha ḽa Isiraele.+ Muṅwe na muṅwe o vha a tshi ita zwine a vhona zwo tea khae.
