Vhahaṱuli 7:1-25
7 Yerubaali, ane a vha Gidioni+ na vhathu vhoṱhe vhe a vha e navho, vha vuwa nga matsheloni-tsheloni vha atha madennde Tshisimani tsha Harode, ngeno madennde a Vhamidiani e nga thungo ya devhula hawe, tshikwarani tsha More ngei govhani.
2 Yehova a amba na Gidioni a ri: “Vhathu vhane wa vha navho ndi vhanzhi lune ndi nga si ḓo kona u kumedzela Vhamidiani zwanḓani zwavho.+ Vhaisiraele vha nga ḓikukumusa, vha ri: ‘Ro ḓitshidza nga zwanḓa zwashu.’+
3 Zwino ndi humbela uri u ḓivhadze vhathu uri: ‘Ane a khou ofha na u tetemela kha vhuyelele hayani.’”+ Ngauralo, Gidioni a vha linga. Vhathu vha 22 000 vha vhuyelela hayani, ha sala vha 10 000.
4 Naho zwo ralo, Yehova a amba na Gidioni a ri: “Vhathu vha kha ḓi vha vhanzhisa. Vha ise maḓini uri ndi vha linge henefho. Musi ndi tshi amba na iwe uri: ‘Uyu u ḓo ṱuwa na iwe,’ a ṱuwe na iwe, fhedzi musi ndi tshi amba na iwe uri: ‘Uyu ha nga ḓo ṱuwa na iwe,’ a songo ṱuwa na iwe.”
5 Ngauralo, a ṱuwa na vhathu vha tsela tshisimani.
Yehova a amba na Gidioni a ri: “Ane a tou kapela maḓi nga lulimi sa mmbwa u mu imise thungo ha vhane vha nwa maḓi vho gwadama nga magona.”
6 Tshivhalo tsha vhe vha nwa maḓi nga lulimi vha tshi khou kapela maḓi mulomoni nga zwanḓa zwavho ndi vhanna vha 300. Vhaṅwe vhoṱhe vho nwa maḓi vho gwadama nga magona.
7 Yehova a amba na Gidioni a ri: “Ndi ḓo u tshidza nga vhanna vha 300 vhe vha nwa maḓi nga lulimi, ndi ḓo kumedzela Vhamidiani zwanḓani zwau.+ Fhedzi vhaṅwe vhoṱhe nga vha vhuyelele hayani.”
8 Musi vho no dzhia mbuvha na ṋanga kha vhaḽa vhaṅwe. Vhanna vhaṅwe vhoṱhe vha Isiraele vha vhuyelela hayani, a sala na vhanna vha 300 fhedzi. Madennde a Vhamidiani o vha e nga fhasi hawe govhani.+
9 Nga honoho vhusiku Yehova a amba nae a ri: “Vha vutshele madenndeni, ngauri ndo vha kumedzela zwanḓani zwau.+
10 Fhedzi arali u tshi ofha u vha vutshela, tsela madenndeni na muḓinḓa wau Phura.
11 U thetshelese zwine vha ḓo zwi amba, nga murahu ha zwenezwo u ḓo vha na tshivhindi tsha u vha vutshela henefho madenndeni.” Gidioni na muḓinḓa wawe Phura vha tsela he madennde a mmbi a guma hone.
12 Vhamidiani, Vhaamaleke na vhoṱhe vha Vhubvaḓuvha+ vho vha vho phaḓalala na govha vho anda vhunga guma* ḽa nzie, gamela dzavho dzo vha dzi sa vhalei,+ dzo ḓala sa muṱavha wa khunzi-khunzini.
13 Musi Gidioni a tshi swika, a pfa muṅwe munna a tshi khou anetshela khonani yawe zwe a ḽora, a tshi ri: “Ndo ḽora hezwi. Ho vha hu na ḽofo ya vhurotho ya baḽi i tshi khou kungulutshela madenndeni a Vhamidiani. Ya swika denndeni ya ḽi kuḓa ḽa wa.+ Ya ḽi phigulusa ḽa ṱoka fhasi nga ṱhanga.”
14 Khonani yawe ya ri: “Hezwi zwi amba uri ndi banga ḽa Gidioni+ murwa wa Yoasi, munna wa Isiraele. Mudzimu o kumedzela Vhamidiani na madennde avho oṱhe zwanḓani zwawe.”+
15 Nga u ṱavhanya musi Gidioni a tshi mu pfa a tshi khou anetshela wonoyo muḽoro na ṱhalutshedzelo yawo,+ a gwadama a rabela. Nga murahu ha zwenezwo, a humela madenndeni a Vhaisiraele a ri: “Takuwani, ngauri Yehova o kumedzela madennde a Vhamidiani zwanḓani zwaṋu.”
16 Ngauralo, a fhandekanya vhanna vha 300 vha bva zwigwada zwiraru, vhoṱhe a vha ṋea dziṋanga+ na mvuvhelo khulwane dzi si na tshithu dza u dzhenisa mbone nga ngomu.
17 A amba navho a ri: “Ni ntsedze, ni ite zwine nda khou ita zwone. Musi ndi tshi swika he madennde a guma hone, ni ite zwine nda khou ita zwone.
18 Musi ndi tshi lidza luṋanga, nṋe na vhoṱhe vhane nda ḓo vha ndi navho, na inwi ni lidze ṋanga u mona na madennde, ni ṱavhe mikosi ni ri: ‘Banga ḽa Yehova na ḽa Gidioni!’”
19 Gidioni na vhanna vha 100 vhe a vha e navho vha swika he madennde a guma hone hu sa athu u vha vhukati ha vhusiku,* musi vhalindi vha tshi kha ḓi bva u sendelelana. Vha lidza phalaphala,+ vha kwasha mvuvhelo khulwane dza maḓi dze vha vha vho dzi fara.+
20 Ngauralo, zwigwada zwiraru zwa lidza ṋanga, zwa kwasha mvuvhelo khulwane. Vha fara mbone nga zwanḓa zwavho zwa monde, vha lidza phalaphala vho dzi fara nga zwanḓa zwavho zwa u ḽa, vha vhidzelela vha ri: “Banga ḽa Yehova na ḽa Gidioni!”
21 Munna muṅwe na muṅwe a ima kha vhuimo hawe u mona na madennde, mmbi yoṱhe ya shavha, i tshi khou ṱavha mikosi.+
22 Vhanna vha 300 vha bvela phanḓa vha tshi lidza phalaphala, Yehova a ita uri vha vhulayane nga mabanga u mona na madennde;+ mmbi ya shavha ya swika Bethe-sita, Tserera, u swika mikanoni ya Abele-mehola+ tsini na Thabate.
23 Vhanna vha Isiraele vha vhidzwa u bva kha Vhanafutali, Vhaashere na Vhamanase+ vhoṱhe, vha pandamedza Vhamidiani.
24 Gidioni a rumela vhaḓinḓa dzinguni ḽa thavhani dza Efuraimi vhe na mulaedza une wa ri: “Itsani ni ye u vutshela Vhamidiani, ni thube zwisima u swika Bethabara na Mulamboni wa Yorodane.” Ngauralo, vhanna vhoṱhe vha Vhaefuraimi vha kuvhangana, vha thuba zwisima u swika Bethabara na Mulamboni wa Yorodane.
25 Vho dovha vha thuba na vhakololo vhavhili vha Midiani, Orebe na Siebe; vha vhulaya Orebe tomboni ḽa Orebe,+ Siebe vha mu vhulayela fhethu ha Siebe hune ha sukiwa hone nḓirivhe. Vha bvela phanḓa vha tshi khou pandamedza Vhamidiani,+ vha ḓisa ṱhoho ya Orebe na ya Siebe kha Gidioni ngei dzinguni ḽa Mulambo wa Yorodane.
