Vhahaṱuli 8:1-35
8 Vhanna vha Vhaefuraimi vha amba na Gidioni vha ri: “Wo ri itani? Ndi ngani u songo ri vhidza musi u tshi ya u lwa na Vhamidiani?”+ Vha mu sema vho sinyuwa.+
2 Fhedzi a amba navho a ri: “Naa zwe nda zwi ita zwi nga vhambedzwa na zwe na zwi ita? Naa ṱhalane dza Efuraimi+ a dzi fhiri khaṋo ya nḓirivhe ya Abiesere?+
3 Mudzimu o kumedzela Orebe na Siebe+ vhakololo vha Midiani zwanḓani zwaṋu, naa zwe nda zwi ita zwi nga vhambedzwa na zwe na zwi ita?” Musi a tshi amba navho nga yeneyo nḓila, vha dzika.
4 Gidioni a wela Mulambo wa Yorodane. Ene na vhanna vha 300 vhe a vha e navho vho vha vho neta, fhedzi vha bvela phanḓa vha tshi vha pandamedza.
5 Nga murahu a amba na vhanna vha Sukothe a ri: “Ndi khou humbela uri ni ṋee vhathu vhane vha khou ntevhela ḽofo dza vhurotho, ngauri vho neta, ndi khou pandamedza Zeba na Tsalamuna mahosi a Midiani.”
6 Fhedzi vhakololo vha Sukothe vha ri: “Naa Zeba na Tsalamuna vho no kumedzelwa zwanḓani zwau lune ra fanela u ṋea mmbi yau vhurotho?”
7 Gidioni a ri: “Musi Yehova a tshi kumedzela Zeba na Tsalamuna zwanḓani zwanga, mivhili yaṋu ndi ḓo i hwaya nga mipfa ya sogani.”+
8 A fhira henefho a gonya Penuele a swika a humbela zwi fanaho, fhedzi vhanna vha Penuele vha mu fhindula u fana na vhanna vha Sukothe.
9 A dovha a amba na vhenevho vhanna vha Penuele a ri: “Musi ndi tshi vhuya nga mulalo, ndi ḓo thutha hoyu mutsheṱo.”+
10 Zeba na Tsalamuna vho vha vhe Karakoro na mmbi dzavho, vho vha vhe vhanna vha ṱoḓaho u vha 15 000. Vhenevho vhoṱhe ndi vho salaho kha mmbi yoṱhe ya vhathu vha Vhubvaḓuvha,+ ngauri ho vhulawa vhanna vha 120 000 nga mabanga.
11 Gidioni a gonya nga nḓila i yaho kha vhathu vhane vha dzula madenndeni vhubvaḓuvha ha Noba na Yogobeha,+ a vutshela vhathu vha madenndeni, vha songo zwi lavhelela.
12 Musi Zeba na Tsalamuna vha tshi shavha, a vha pandamedza, a thuba eneo mahosi mavhili a Vhamidiani, Zeba na Tsalamuna, zwa tshuwisa vhoṱhe vha re madenndeni.
13 Gidioni murwa wa Yoasi a vhuya nndwani nga nḓila i gonyaho Heresi.
14 Musi e nḓilani a fara muṅwe muṱhannga a bvaho Sukothe, a mu sengisa. Onoyo muṱhannga a mu ṅwalela madzina a vhakololo na a vhahulwane vha Sukothe vhane vha vha vhanna vha 77.
15 Nga zwenezwo, a ya kha vhanna vha Sukothe a ri: “Zeba na Tsalamuna ngevha vhe na ngoḓa ngavho na ri: ‘Naa Zeba na Tsalamuna vho no kumedzelwa zwanḓani zwau lune ra fanela u ṋea mmbi yau vhurotho?’”+
16 A dzhia vhahulwane vha wonoyo muḓi a vha hwaya nga mipfa ya sogani, a laṱisa vhenevho vhanna vha Sukothe.+
17 A thutha mutsheṱo wa Penuele,+ a vhulaya vhanna vha wonoyo muḓi.
18 A vhudzisa Zeba na Tsalamuna a ri: “Vhanna vhe na vha vhulaya ngei Thaboro vho vha vhe vhathu-ḓe?” Vha fhindula vha ri: “Vho vha vha tshi fana na iwe, muṅwe na muṅwe wavho o vha a tshi fana na murwa wa khosi.”
19 Gidioni a ri: “Ndi vhakomana vhanga, vhana vha mme anga. Ndi ana nga Yehova a tshilaho, arali ni vhe ni songo vha vhulaya, ndi musi ndi sa ni vhulayi.”
20 Ngauralo, a amba na Yethere tanzhe ḽawe a ri: “Takuwa u vha vhulaye.” Fhedzi onoyo muṱhannga a si ṱomole banga ḽawe; o vha a tshi khou ofha ngauri o vha a tshee muṱuku.
21 Zeba na Tsalamuna vha ri: “Iwe takuwa u ri vhulaye, ngauri munna u vhonala nga maanḓa awe.” Gidioni a takuwa a vhulaya Zeba na Tsalamuna,+ a dzhia madzanga a tshivhumbeo tshi ngaho ṅwedzi e a vha e mikuloni ya gamela dzavho.
22 Nga murahu vhanna vha Isiraele vha amba na Gidioni vha ri: “Ri vhuse iwe na murwa wau na muḓuhulu wau, ngauri wo ri tshidza zwanḓani zwa Vhamidiani.”+
23 Fhedzi Gidioni a vha fhindula a ri: “A thi nga ni vhusi, na murwa wanga ha nga ni vhusi. Yehova ndi ene ane a ḓo ni vhusa.”+
24 Gidioni a dovha a amba navho a ri: “Tshine nda khou ni humbela ndi hetshi: Muṅwe na muṅwe waṋu kha nṋee tshiṅiṋa tsha ningoni kha zwe a zwi thuba.” (Vho vha vhe na zwiṅiṋa zwa ningoni zwa musuku ngauri vho vha vhe Vhaishimaele.)+
25 Vha fhindula vha ri: “Ri ḓo u ṋea zwone.” Vha adza tshiambaro, muthu muṅwe na muṅwe a posa tshiṅiṋa tsha ningoni kha zwe a zwi thuba.
26 Tshileme tsha zwiṅiṋa zwa ningoni zwa musuku zwe a zwi humbela tsho ita shekele* dza 1 700 dza musuku, hu sa vhalwi madzanga a tshivhumbeo tshi ngaho ṅwedzi, zwikhavhisi zwa vhulungu, zwiambaro zwa wuḽu ya phephulu zwi ambarwaho nga mahosi a Midiani na malungu a bvaho kha gamela.+
27 Gidioni a ita efodo*+ ngazwo, a i vhea muḓini wawe wa Ofura;+ Vhaisiraele vhoṱhe vha i gwadamela,*+ zwenezwo zwa vha tshikwekwe kha Gidioni na muṱa wawe.+
28 Vhamidiani+ vha kundwa nga Vhaisiraele, vha si tsha dovha vha dina Vhaisiraele; misini ya Gidioni shango ḽa lala lwa miṅwaha ya 40.+
29 Ngauralo, Yerubaali+ murwa wa Yoasi a humela hayani hawe a dzula henefho.
30 Gidioni a vha na vharwa vha 70, ngauri o vha e na vhafumakadzi vhanzhi.
31 Mufumakadzi wawe wa vhuimo ha fhasi* wa ngei Shikeme na ene o mu bebela murwa a mu ira dzina ḽa Abimeleke.+
32 Mafheleloni Gidioni murwa wa Yoasi a fa o no vha mualuwa, a vhulungwa vhiḓani ḽa Yoasi khotsi awe ngei Ofura ḽa Vhaabiesere.+
33 Musi Gidioni a tshi tou fa, Vhaisiraele vha dovha vha gwadamela* Vhobaali,+ vha vhea Baali-beritha uri a vhe mudzimu wavho.+
34 Vhaisiraele a vho ngo tsha humbula Yehova Mudzimu wavho,+ we a vha tshidza zwanḓani zwa maswina avho oṱhe o vha tangaho;+
35 vha si tsha sumbedza lufuno lu sa shanduki kha muṱa wa Yerubaali, ane a vha Gidioni, uri vha livhuwe zwithu zwoṱhe zwavhuḓi zwe a zwi itela Vhaisiraele.+
Ṱhaluso dzi re magumoni a siaṱari
^ Shekele nthihi i lemela gramu dza 11,4. Sedzani Ṱhume. B14.
^ Sedzani Mutevhe Wa Ṱhalutshedzo Ya Maipfi.
^ Kana “vha ita vhupombwe ha lwa muya nayo.”
^ Sedzani Mutevhe Wa Ṱhalutshedzo Ya Maipfi.
^ Kana “ita vhupombwe ha lwa muya na.”
