Vhahaṱuli 9:1-57
9 Nga murahu ha tshifhinga Abimeleke+ murwa wa Yerubaali a ya ha vhomalume vhawe ngei Shikeme, a amba navho na vhoṱhe vha muṱa wa makhulu wawe a ri:
2 “Ndi khou humbela uri ni vhudzise vharangaphanḓa* vhoṱhe vha Shikeme uri: ‘Ndi zwifhio zwa khwine kha inwi, naa ndi u vhuswa nga vharwa vhoṱhe vha 70 vha Yerubaali,+ kana ndi u vhuswa nga munna muthihi? Ni humbule uri nṋe ndi shaka ḽaṋu.’”
3 Vhomalume awe vha mu ambela kha vharangaphanḓa vhoṱhe vha Shikeme, mbiluni dzavho vho vha vha tshi takalela Abimeleke, ngauri vho vha vha tshi ri: “Ndi wahashu.”
4 Vha mu ṋea shekele* dza 70 dza siḽiva dzi bvaho nḓuni* ya Baali-beritha,+ Abimeleke a dzi shumisa u itela u thola vhanna vha si na mushumo na vha re na lunyadzo uri vha ṱuwe nae.
5 Nga murahu ha zwenezwo, a ya nḓuni ya khotsi awe ngei Ofura,+ a vhulaya vhana vha hawe,+ vharwa vha Yerubaali vhane vha vha vhanna vha 70 kha tombo ḽithihi. Ha ponyoka Yothamu fhedzi, murwa muṱukusa wa Yerubaali, ngauri o vha o dzumbama.
6 Nga zwenezwo, vharangaphanḓa vhoṱhe vha Shikeme na vha Bethe-milo vha kuvhangana vha vhea Abimeleke uri a vhe khosi,+ tsini na muri muhulu, tsini na phuphu i re Shikeme.
7 Musi vha tshi vhudza Yothamu a ṱavhanya a ya a ima ṱhodzini ya Thavha ya Garitsimi.+ A vha vhidzelela nga ipfi ḽihulu a ri: “Nthetsheleseni, inwi vharangaphanḓa vha Shikeme, Mudzimu u ḓo ni thetshelesa.
8 “Ho vha hu na miri ye ya ya u nanga khosi uri i i vhuse. Ya amba na muṱwari ya ri: ‘Ri vhuse.’+
9 Fhedzi muṱwari wa amba nayo wa ri: ‘Naa ndi tea u ṱutshela mapfura anga, ane a shumiswa u hulisa Mudzimu na vhathu uri ndi ye ndi vhuse miṅwe miri?’
10 Miri ya amba na muhuyu ya ri: ‘Iḓa u ri vhuse.’
11 Fhedzi muhuyu wa amba nayo wa ri: ‘Naa ndi fanela u ṱutshela muḓifho wanga na mitshelo yanga yavhuḓi ndi ye ndi vhuse miṅwe miri?’
12 Miri ya amba na munḓirivhe ya ri: ‘Iḓa u ri vhuse.’
13 Munḓirivhe wa amba nayo wa ri: ‘Naa ndi fanela u ṱutshela waini yanga ntswa ine ya ita uri Mudzimu na vhathu vha takale, ndi ye ndi vhuse miṅwe miri?’
14 Mafheleloni miṅwe miri yoṱhe ya amba na muunga ya ri: ‘Iḓa u ri vhuse.’+
15 Muunga wa amba na miri wa ri: ‘Arali ni tshi khou nnanga zwa vhukuma uri ndi vhe khosi yaṋu, iḓani ni khude fhasi ha murunzi wanga. Fhedzi arali zwi songo ralo, hu ḓo bva mulilo kha muunga wa fhisa miṱaululo ya Libanoni.’
16 “Naa no vha ni tshi khou fhulufhedzea musi ni tshi vhea Abimeleke uri a vhe khosi?+ Naa no sumbedza Yerubaali na muṱa wawe vhuthu na mu fara nga nḓila yo mu teaho?
17 Musi khotsi anga a tshi ni lwela,+ o vhea vhutshilo hawe khomboni u itela u ni tshidza zwanḓani zwa Vhamidiani.+
18 Fhedzi ṋamusi no vutshela nnḓu ya khotsi anga na vhulaya vharwa vhawe, vhanna vha 70, kha tombo ḽithihi.+ Na vhea Abimeleke murwa wa phuli yawe ya mufumakadzi,+ uri a vhe khosi ya vharangaphanḓa vha Shikeme ngauri ndi wahaṋu.
19 Zwino arali ni tshi khou fhulufhedzea kha Yerubaali na muṱa wawe, takalelani Abimeleke na ene u ḓo ni takalela.
20 Fhedzi arali zwi songo ralo, ngavhe hu tshi bva mulilo kha Abimeleke wa fhisa vharangaphanḓa vha Shikeme na Bethe-milo,+ ngavhe hu tshi bva mulilo kha vharangaphanḓa vha Shikeme na Bethe-milo wa fhisa Abimeleke.”+
21 Yothamu+ a shavhela Beera, a dzula henengei nga nṱhani ha u shavha mukomana wawe Abimeleke.
22 Abimeleke a fhedza miṅwaha miraru a tshi khou vhusa* Vhaisiraele.
23 Mudzimu a ita uri hu vhe na vhuswina vhukati ha Abimeleke na vharangaphanḓa vha Shikeme, vha itela Abimeleke tshimbevha.
24 Zwo itea nga yeneyo nḓila uri vhuvemu he ha itwa kha vharwa vha 70 vha Yerubaali vhu lifhedzwe uri ṅwana wa khotsi avho Abimeleke a vhe na vhuḓifhinduleli ha u vha vhulaya,+ u katela na vharangaphanḓa vha Shikeme vhe vha mu thusa uri a vhulaye vhana vha khotsi awe.
25 Vharangaphanḓa vha Shikeme vha vhea vhathu uri vha mu lalele ṱhodzini dza dzithavha, vha tshi dzhiela zwithu vhathu vhoṱhe vha fhiraho nga henefho nḓilani. Nga murahu ha tshifhinga, Abimeleke a vhigelwa eneo mafhungo.
26 Gaali murwa wa Ebede na vhahawe vha wetshela Shikeme,+ vharangaphanḓa vha Shikeme vha mu fhulufhela.
27 Vha bva vha ya vha kuvhanganya nḓirivhe masimuni avho a minḓirivhe, vha dzi suka, vha ita vhuṱambo, nga murahu vha ya nḓuni ya mudzimu wavho,+ vha ḽa na u nwa, vha sema Abimeleke.
28 Gaali murwa wa Ebede a ri: “Abimeleke ndi nnyi, Shikeme ndi nnyi ane nda fanela u mu shumela? Naa a si murwa wa Yerubaali,+ naa Sebulu a si mulanguli wawe? Shumelani vhanna vha Hemoro khotsi a Shikeme! Fhedzi ndi ngani ri tshi fanela u shumela Abimeleke?
29 Ngavhe havha vhathu vho vha vha tshi langwa nga nṋe, ndo vha ndi tshi ḓo bvisa Abimeleke.” Nga zwenezwo, a amba na Abimeleke a ri: “Engedza mmbi yau u ḓe u lwe na nṋe.”
30 Musi Sebulu muvhusi wa muḓi a tshi pfa zwe Gaali murwa wa Ebede a zwi amba a sinyuwa.
31 A rumela vhaḓinḓa ha Abimeleke tshiphirini a ri: “Gaali murwa wa Ebede na vhahawe vho ḓa Shikeme, vha khou ṱuṱuwedza vhathu vha muḓini uri vha u vutshele.
32 Zwino iwe na vhanna vhau ni ḓe vhusiku ni lalele ḓakani.
33 U vuwe nga matsheloni-tsheloni, musi ḓuvha ḽi tshi tou ṱavha u lwe na vhathu vha muḓini; musi ene na vhanna vhawe vha tshi ḓa u lwa na iwe, u ite zwoṱhe zwine wa nga kona uri u mu kunde.”*
34 Ngauralo, Abimeleke na vhathu vhoṱhe vhe a vha e navho vha vuwa vhusiku vha lalela muḓi wa Shikeme vhe zwigwada zwiṋa.
35 Musi Gaali murwa wa Ebede a tshi bvela nnḓa, a ima muṋangoni wa khoro ya muḓi, Abimeleke na vhathu vhe a vha e navho vha bva he vha vha vho mu lalela hone.
36 Musi Gaali a tshi vhona vhathu a amba na Sebulu a ri: “Vhona hu na vhathu vhane vha khou tsa vha tshi bva ṱhodzini dza dzithavha.” Fhedzi Sebulu a amba nae a ri: “A si vhathu, fhedzi u khou vhona mirunzi ya dzithavha.”
37 Nga murahu Gaali a dovha a ri: “Vhona vhathu vha khou tsa vha tshi bva vhukati ha shango, tshiṅwe tshigwada tshi khou ḓa nga nḓila i yaho murini muhulu wa Meonenimi.”
38 Sebulu a amba nae a ri: “Zwino hu ngafhi uḽa u zuwa hau u tshi ri, ‘Abimeleke ndi nnyi ane ra fanela u mu shumela?’+ Naa avha a si vhone vhathu vhe wa vha landula? Zwino i bva u ye u lwe navho.”
39 Gaali a ranga phanḓa vhanna vha Shikeme, vha lwa na Abimeleke.
40 Abimeleke a mu pandamedza, a shavha, vhathu vhanzhi vha vhulawa nga banga u vhuya u swika muṋangoni wa khoro ya muḓi.
41 Abimeleke a bvela phanḓa a tshi khou dzula Aruma, Sebulu+ a pandela Gaali na vhahawe ngei Shikeme.
42 Nga ḓuvha ḽi tevhelaho vhathu vha bva vha ya ḓakani, vha vhudza Abimeleke eneo mafhungo.
43 A dzhia vhathu a vha fhandekanya vha vha zwigwada zwiraru, vha lalela ḓakani. Musi a tshi vhona vhathu vha tshi khou bva muḓini, a vha vutshela a vha vhulaya.
44 Abimeleke na zwigwada zwe a vha e nazwo vha gidimela phanḓa vha ima muṋangoni wa khoro ya muḓi, ngeno zwiṅwe zwigwada zwi tshi khou lwa na vhoṱhe vha re ḓakani, zwa vha vhulaya.
45 Abimeleke a lwa na wonoyo muḓi a u thuba. A vhulaya vhathu vhawo, a thutha wonoyo muḓi,+ a u shela muṋo.
46 Musi vharangaphanḓa vhoṱhe vha mutsheṱoni wa Shikeme vha tshi pfa nga ha zwenezwo, vha ṱavhanya vha shavhela fhethu ho dzumbamaho nḓuni* ya Ele-beritha.+
47 Musi Abimeleke a tshi vhigelwa uri vharangaphanḓa vhoṱhe vha mutsheṱoni wa Shikeme vho kuvhangana,
48 Abimeleke na vhanna vhoṱhe vhe a vha e navho vha gonya Thavha ya Tsalimoni. Abimeleke a dzhia mbaḓo a rema davhi ḽa muri, a ḽi vhea kha shaḓa ḽawe. A amba na vhathu vhe a vha e navho a ri: “Zwe na vhona ndi tshi zwi ita, ṱavhanyani ni ite zwi fanaho!”
49 Muṅwe na muṅwe a rema davhi ḽa muri a tevhela Abimeleke. Vha a tika he vha vha vho dzumbama hone, vha a funga nga mulilo. Vhathu vhoṱhe vha re mutsheṱoni wa Shikeme na vhone vha fa, vhanna na vhafumakadzi vha ṱoḓaho u vha 1 000.
50 Abimeleke a ya muḓini wa Thebetse; a atha madennde u itela u lwa na wonoyo muḓi, a u thuba.
51 Ho vha hu na mutsheṱo wo khwaṱhaho henefho vhukati ha muḓi, vhanna na vhafumakadzi vhoṱhe na vharangaphanḓa vha muḓi vha shavhela henefho. Vha ḓivalela nga ngomu, vha gonya nṱha ha ṱhanga ya mutsheṱo.
52 Abimeleke a swika mutsheṱoni uri a u vutshele. A sendela muṋangoni wa mutsheṱo uri a u fhise.
53 Nga zwenezwo, muṅwe wa vhafumakadzi a posela fhasi guyo ḽa wela kha ṱhoho ya Abimeleke ḽa kwasha dethele ḽawe.+
54 A ṱavhanya a vhidza muḓinḓa we a vha a tshi mu hwalela zwiṱhavhane zwawe a amba nae a ri: “Ṱomola banga ḽau u mmbulaye uri vha si ambe nga ha nṋe vha ri: ‘O vhulawa nga mufumakadzi.’” Ngauralo, muḓinḓa wawe a mu rumbula nga banga a fa.
55 Musi vhanna vha Isiraele vha tshi vhona uri Abimeleke o fa, vhoṱhe vha vhuyelela muḓini.
56 Nga zwenezwo, Mudzimu o lifhedza Abimeleke vhuvhi he a vhu ita kha khotsi awe ha u vhulaya vhakomana vhawe vha 70.+
57 Mudzimu a dovha a ita uri vhuvhi hoṱhe ha vhanna vha Shikeme vhu vhuyelele kha ṱhoho dzavho. Samba ḽa Yothamu+ murwa wa Yerubaali+ ḽa ḓa khavho.
Ṱhaluso dzi re magumoni a siaṱari
^ Kana khamusi, “vhaṋe vha mashango.”
^ Shekele nthihi i lemela gramu dza 11,4. Sedzani Ṱhume. B14.
^ Kana “thembeleni.”
^ Kana “ḓiita mukololo kha.”
^ Kana “u mu ite zwine tshanḓa tshau tsha nga kona.”
^ Kana “thembeleni.”
