Daniele 5:1-31
5 Khosi Beḽesatsara+ a itela vhaḓivhalea vhawe vha tshigidi tshimima tshihulu, o vha a tshi khou nwa waini phanḓa havho.+
2 Musi Beḽesatsara o no kambiwa nga waini, a ri hu ḓiswe midzio ya musuku na ya siḽiva ye khotsi awe Nebukadanetsara a i dzhia thembeleni ngei Yerusalema,+ uri ene na vhaḓivhalea vhawe na vhafumakadzi vhawe vha vhuimo ha fhasi* vha nwele khayo.
3 Vha ḓisa midzio ya musuku ye ya vha yo dzhiiwa thembeleni ya nnḓu ya Mudzimu ya ngei Yerusalema, khosi na vhaḓivhalea vhayo na vhafumakadzi vhayo vha vhuimo ha fhasi,* vha nwela khayo.
4 Vha nwa waini, vha renda midzimu ya musuku na siḽiva, ya koporo, tsimbi, thanda na tombo.
5 Nga tshenetsho tshifhinga ha bvelela tshanḓa tsha thoma u ṅwala kha luvhondo lwa pfamo ya khosi tsini na tshiṱomambone, khosi ya vhona tshenetsho tshanḓa tshi tshi khou ṅwala.
6 Khosi ya tshuwa, tshifhaṱuwo tshayo tsha tshenuluwa,* milenzhe na magona zwa tetemela.+
7 Khosi ya vhidza mingome, Vhakaladea* na vhaḓivhi vha ṋaledzi.+ Ya amba na vhanna vho ṱalifhaho vha Babele ya ri: “Muthu ane a nga vhala zwo ṅwaliwaho na u nṱalutshedza zwine zwa amba zwone u ḓo ambadzwa zwiambaro zwa phephulu, a ambadzwa vhulungu ha musuku mukuloni,+ a vha ene wa vhuraru a re na maanḓa muvhusoni wanga.”+
8 Vhanna vhoṱhe vho ṱalifhaho vha khosi vha ḓa, fhedzi vha si kone u vhala zwo ṅwaliwaho kana u ṱalutshedza khosi zwine zwa amba zwone.+
9 Khosi Beḽesatsara o vha o tshuwa nga maanḓa na tshifhaṱuwo tshawe tsho tshenuluwa; na vhaḓivhalea vhawe vho ḓaḓa.+
10 Mufumakadzi wa khosi a dzhena holoni ya tshimima nge a vha o vhidziwa nga khosi na vhaḓivhalea vhayo. Mufumakadzi wa khosi a ri: “Iwe thovhela, ngavhe u tshi tshila tshoṱhe. U songo tshuwa kana u tendela tshifhaṱuwo tshau tshi tshi tshenuluwa.
11 Hu na munna* muvhusoni wau ane a vha na maanḓa a midzimu mikhethwa. Misini ya khotsi au, o vha o itwa uri a pfesese, a ṱalukanye, e na vhuṱali vhune ha fana na ha midzimu.+ Nebukadanetsara khotsi au o mu vhea uri a vhe muhulwane wa vhotshifhe vha manditi, mingome, Vhakaladea* na vhaḓivhi vha ṋaledzi;+ khotsi au o ita zwenezwi zwithu, Iwe thovhela.
12 Daniele we khosi ya ri u pfi Beḽetsatsara,+ o vha o ṱalifha nga maanḓa, e na nḓivho na ṱhalukanyo ya u ṱalutshedza zwine miḽoro ya amba zwone, ya u ṱalutshedza thai na ya u tandulula thaidzo khulwane.+ Zwino vhidza Daniele, u ḓo u ṱalutshedza uri zwi amba mini.”
13 Daniele a ḓiswa phanḓa ha khosi. Khosi ya mu vhudzisa uri: “Naa ndi iwe Daniele muṅwe wa mathubwa a bvaho Yuda,+ we khotsi anga a u ḓisa u tshi bva Yuda?+
14 Ndo pfa uri iwe u na maanḓa a midzimu+ na uri wo itwa uri u pfesese, u na ṱhalukanyo na vhuṱali vhuhulu.+
15 Vhanna vho ṱalifhaho na mingome vho ḓiswa phanḓa hanga uri vha mmbalele zwo ṅwaliwaho hafha na u nṱalutshedza uri zwi amba mini, fhedzi a vho ngo kona u nṱalutshedza zwine wonoyu mulaedza wa amba zwone.+
16 Fhedzi ndo pfa hu tshi pfi iwe u a kona u ṱalutshedza+ zwithu na u tandulula thaidzo khulwane. Arali wa nga kona u vhala zwo ṅwaliwaho na u nṱalutshedza zwine zwa amba zwone, u ḓo ambadzwa zwiambaro zwa phephulu, wa ambadzwa vhulungu ha musuku mukuloni, wa vha wa vhuraru a re na maanḓa muvhusoni wanga.”+
17 Daniele a fhindula khosi a ri: “Zwifhiwa zwau u nga zwi ṋea vhaṅwe. Naho zwo ralo, ndi ḓo u vhalela zwo ṅwaliwaho na u u ṱalutshedza zwine zwa amba zwone.
18 Iwe thovhela, Mudzimu Wa-Ṱaḓulu-ṱaḓulu o ṋea Nebukadanetsara khotsi au muvhuso, maanḓa, khuliso na vhugala.+
19 Vhathu vhoṱhe vha tshaka na nyambo dzo fhambanaho vho vha vha tshi mu ofha ngauri Mudzimu o vha o mu ṋea maanḓa.+ O vha a tshi vhulaya kana u tshidza ane a funa na u hulisa kana u shonisa ane a funa.+
20 Musi a tshi thoma u ḓihudza na u vha na tshikhuna, o ḓikukumusa,+ a bvisiwa kha khuluṋoni muvhusoni wawe, a dzhielwa na tshirunzi tshe a vha e natsho.
21 O pandelwa vhathuni, mbilu yawe ya nga ya tshivhanda, a dzula na donngi. A ḽa hatsi sa kholomo, muvhili wawe wa ṋukadzwa nga ṅwando, u swikela a tshi ḓivha uri Mudzimu Wa-Ṱaḓulu-ṱaḓulu ndi ene Muvhusi wa mivhuso ya vhathu na uri u ṋea vhuhosi ane a funa.+
22 “Fhedzi iwe murwa wawe Beḽesatsara, a wo ngo ḓiṱukufhadza naho wo vha u tshi zwi ḓivha.
23 Nṱhani hazwo, wo ḓikukumusa phanḓa ha Murena wa ṱaḓulu,+ wa ri vha u ḓisele midzio ye ya vha i tshi bva nḓuni yawe.+ Iwe na vhaḓivhalea vhau na vhafumakadzi vhau vha vhuimo ha fhasi* na nwela khayo waini, na renda midzimu ya musuku na siḽiva, ya koporo, tsimbi, thanda na tombo, midzimu i sa vhoni, i sa pfi na i sa ḓivhiho tshithu.+ U si hulise Mudzimu ane vhutshilo hau ha vha zwanḓani zwawe.+
24 Ndi ngazwo Mudzimu o rumela tshenetsho tshanḓa uri tshi ṅwale zwenezwi zwoṱhe.+
25 Ho ṅwaliwa u pfi: MENE, MENE, TEKELE na PARISINI.
26 “Enea maipfi a amba zwi tevhelaho: MENE, zwi amba uri Mudzimu o vhalela maḓuvha a muvhuso wau na u u fhelisa.+
27 “TEKELE, zwi amba uri iwe wo kaliwa, wa wanala u sa lemeli.
28 “PERESE, zwi amba uri muvhuso wau wo fhandekanywa wa ṋewa Vhameda na Vhaperesia.”+
29 Beḽesatsara a ri Daniele a ambadzwe zwiambaro zwa phephulu, a ambadzwe na vhulungu ha musuku mukuloni; vha ḓivhadze uri u khou ḓo vha ene wa vhuraru a re na maanḓa muvhusoni.+
30 Beḽesatsara khosi ya Vhakaladea o vhulawa nga honoho vhusiku.+
31 Dario+ wa Mumeda a vha khosi; o vha e na miṅwaha i ṱoḓaho u vha 62.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Kana “shanduka.”
^ Ndi tshigwada tshi re na vhukoni ha zwa vhungome na u ḓivha ṋaledzi.
^ Kana “munna a re na vhukoni.”
^ Ndi tshigwada tshi re na vhukoni ha zwa vhungome na u ḓivha ṋaledzi.
^ Sedzani Mutevhe Wa Ṱhalutshedzo Ya Maipfi.
