Daniele 8:1-27
8 Nga ṅwaha wa vhuraru hu tshi khou vhusa Khosi Beḽesatsara,+ nṋe Daniele ndo dovha nda vhona ḽiṅwe bono.+
2 Musi ndi pfamoni* ya ngei Shushani,*+ vunduni* ḽa Elamu,+ ndo vhona bono ndi tsini na mugero wa ngei Ulai.
3 Musi ndi tshi sedza nda vhona thutha+ i re na maṋanga mavhili+ yo ima phanḓa ha mugero. Eneo maṋanga mavhili o vha e malapfu, ḽo melaho nga murahu ḽo vha ḽi ḽone ḽo lapfesaho.+
4 Nda vhona thutha i tshi khou ṱungedza nga maṋanga thungo ya vhukovhela, devhula na tshipembe, hu si na zwivhanda zwine zwa nga i thivhela, ho vha hu si na ane a nga zwi tshidza kha maanḓa* ayo.+ Yo vha i tshi ita zwine ya funa, i tshi ḓihudza.
5 Ndi tshee ndo lavhelesa, nda vhona tshibokoṱo+ tshi tshi bva vhukovhela tshi tshi khou pfukekanya ḽifhasi ḽoṱhe tshi sa kwami fhasi. Tsho vha tshi na luṋanga luhulu vhukati ha maṱo.+
6 Tsho vha tshi tshi khou ḓa tsho livha iḽa thutha i re na maṋanga mavhili, ye nda i vhona yo ima phanḓa ha mugero; tsho vha tshi tshi khou i ḓela tsho halifha vhukuma.
7 Nda vhona tshi tshi swika tsini na thutha, tsho i halifhela. Tsha kuḓa thutha, tsha vunḓa maṋanga ayo mavhili, thutha yo vha i si na nungo dza u lwa. Tsha thudzela thutha fhasi, tsha i kandekanya, ho vha hu si na ane a nga i tshidza kha maanḓa* atsho.
8 Tshenetsho tshibokoṱo tsha ḓihudza lwo kalulaho, fhedzi tshi tshi tou vha na maanḓa mahulu, luṋanga lwatsho luhulu lwa vunḓea; ha mela maṅwe maṋanga maṋa mahulu vhudzuloni halwo o sedzaho thungo dzoṱhe dza ṱaḓulu.+
9 Kha ḽiṅwe ḽa eneo maṋanga, ho mela luṅwe luṋanga luṱuku, lwa hula nga maanḓa thungo ya tshipembe, vhubvaḓuvha na thungo ya shango ḽa Lunako.+
10 Lwa hula nga maanḓa lwa swika kha mavhuthu a ṱaḓulu, lwa ita uri maṅwe mavhuthu na dziṅwe ṋaledzi zwi wele kha ḽifhasi, lwonolwo luṋanga lwa zwi kandekanya.
11 Lwa ḓihudza na kha Mukololo wa mavhuthu, a dzhielwa tshiṱhavhelo tsha ḓuvha ḽiṅwe na ḽiṅwe, nnḓu yawe khethwa ya wiselwa fhasi.+
12 Nga nṱhani ha vhukhakhi, ho kumedzelwa mavhuthu na tshiṱhavhelo tsha ḓuvha ḽiṅwe na ḽiṅwe; lwonolwo luṋanga lwa bvela phanḓa lu tshi posela ngoho fhasi, lwa dzhia vhukando lwa kunda.
13 Nda pfa mukhethwa a tshi amba, muṅwe mukhethwa ngae a mu vhudzisa a ri: “Ḽeneḽo bono ḽa tshiṱhavhelo tsha ḓuvha ḽiṅwe na ḽiṅwe na ḽa vhukhakhi vhune ha ita uri hu tshinyadzwe, u itela uri fhethu hukhethwa na mavhuthu zwi kandekanywe zwi ḓo guma lini?”+
14 A amba na nṋe a ri: “Hu ḓo fhela maḓuvha* a 2 300; ndi hone fhethu hukhethwa hu tshi ḓo vhuyedzedzwa kha vhuimo haho ho teaho.”
15 Musi nṋe Daniele ndi tshee ndo lavhelesa ḽeneḽo bono, ndi tshi khou lingedza u ḽi pfesesa, nda vhona we a vha a tshi nga munna o ima phanḓa hanga.
16 Nda pfa ipfi ḽa munna we a vha o ima vhukati ha Ulai,+ a tshi vhidzelela a tshi ri: “Gabriele,+ ita uri onoyo a pfesese zwe a vhona.”+
17 A ḓa tsini na he nda vha ndo ima hone, musi a tshi tou sendela nda tshuwa lwe nda gwadama. A amba na nṋe a ri: “Pfesesa iwe murwa muthu uri ḽeneḽi bono ndi ḽa maḓuvhani a vhufhelo.”+
18 Musi a tshi kha ḓi amba na nṋe, nda farwa nga khofhe nda eḓela henefho fhasi. A mpfara a nnyimisa he nda vha ndo ima hone.+
19 A ri: “Ndi khou u ḓivhadza zwine zwa ḓo itea maḓuvhani a vhufhelo a khaṱhulo, ngauri ndi zwa tshifhingani tsho vhewaho tsha vhufhelo.+
20 “Thutha i re na maṋanga mavhili ye wa i vhona i imela mahosi a Meda na a Peresia.+
21 Tshibokoṱo* tshi imela khosi ya Gerika;+ luṋanga luhulu lwe lwa vha lu vhukati ha maṱo atsho lu imela khosi ya u thoma.+
22 Maṋanga maṋa e a dzhiela vhudzulo luṋanga luhulu lwe lwa vunḓea,+ ndi mivhuso miṋa ine ya ḓo ima i tshi bva kha lushaka lwa yeneyo khosi, fhedzi yeneyo mivhuso a i nga vhi na maanḓa u fana nayo.
23 “Mafheleloni a mivhuso yao, musi o no ita vhukhakhi ho eḓanaho, hu ḓo ima khosi i ofhisaho ine ya pfesesa zwithu zwi konḓaho.
24 I ḓo vha na maanḓa mahulu, fhedzi hu si nga maanḓa ayo. I ḓo fhelisa nga nḓila i songo ḓoweleaho,* i ḓo dzhia vhukando zwa i tshimbilela. I ḓo fhelisa vhahali na vhathu vhakhethwa.+
25 I ḓo kona u fhura; ya ḓihudza mbiluni yayo; i ḓo tshinyadza vhanzhi tshifhingani tsha u tsireledzea.* I ḓo lwa na Mukololo wa vhakololo, fhedzi i ḓo vunḓwa, hu si nga tshanḓa tsha muthu.
26 “Maḓuvha* e ha ambiwa nga hao kha bono ndi ngoho, fhedzi ḽeneḽi bono u ḽi ite tshiphiri, ngauri ndi ḽa tshifhingani tshi ḓaho.”+
27 Nṋe Daniele nda pfa ndo neta, nda lwala maḓuvha o vhalaho.+ Nda vuwa nda shumela khosi;+ fhedzi ndo vha ndo mangadzwa nga zwe nda vhona, hu si na ane a nga zwi pfesesa.+
Ṱhaluso dzi re magumoni a siaṱari
^ Kana “fhethu ha dzhavhelo.”
^ Kana “Susa.”
^ Kana “tshiṱirikini tshi re na maanḓa.”
^ Thevhedz., “tshanḓa.”
^ Thevhedz., “tshanḓa.”
^ Thevhedz., “vhusiku na matsheloni.”
^ Thevhedz., “Tshibokoṱo tsha mamvele manzhi.”
^ Kana “tshinyadza nga nḓila i ofhisaho.”
^ Kana khamusi, “zwi songo lavhelelwa.”
^ Thevhedz., “Vhusiku na matsheloni.”
