Dotoronomio 13:1-18
-
Nḓila ine vhagunei vha tea u farwa ngayo (1-18)
13 “Arali ha vha na muporofita kana muḽori vhukati haṋu, a ni ṋea tshiga kana vhuṱolo,
2 tshiga kana vhuṱolo he a ni vhudza hone ha itea musi a tshi ri: ‘Kha ri tevhele miṅwe midzimu, ye na vha ni sa i ḓivhi, ri i shumele,’
3 a no ngo tea u thetshelesa zwine zwa ambiwa nga onoyo muporofita kana onoyo muḽori,+ ngauri Yehova Mudzimu waṋu u khou ni linga+ u itela u ḓivha arali ni tshi funa Yehova Mudzimu waṋu nga mbilu yaṋu yoṱhe na nga zwoṱhe zwine na vha zwone.+
4 Ni tevhele Yehova Mudzimu waṋu, ni mu ofhe, ni tevhedze ndaela dzawe, ni thetshelese zwine a zwi amba; ndi ene ane na fanela u shumela ene, ni farelele ene.+
5 Fhedzi onoyo muporofita kana muḽori a vhulawe,+ ngauri o ni ṱuṱuwedza uri ni shandukele Yehova Mudzimu waṋu, we a ni bvisa shangoni ḽa Egipita a ni rengulula nḓuni ya vhupuli, uri a ni pambuse nḓilani ye Yehova Mudzimu waṋu a ni laya uri ni tshimbile khayo; ni tea u bvisa zwi re zwivhi vhukati haṋu.+
6 “Arali wahau, ṅwana wa mme au kana murwa wau kana ṅwananyana wau kana mufumakadzi wau ane wa mu funa kana khonani yau ya tsini-tsini, a lingedza u u kunga tshiphirini a ri: ‘Kha ri ṱuwe ri ye u shumela miṅwe midzimu,’+ ine iwe kana vhomakhulukuku wau vha si i ḓivhe,
7 kha midzimu ya vhathu vho u tangaho, hu sa londwi uri ndi vha re tsini na iwe kana kule hau, u bva magumoni a shango u swika kha maṅwe magumo a shango,
8 u songo mu tendela kana u mu thetshelesa+ kana u mu pfela vhuṱungu kana u mu tsireledza;
9 nṱhani hazwo u ite vhungoho ha uri u a mu vhulaya.+ Ndi iwe ane wa ḓo thoma u mu kanḓa nga matombo, nga murahu vhathu vhoṱhe vha mu kanḓe nga matombo.+
10 Ni tea u mu kanḓa nga matombo u vhuya u swika a tshi fa,+ ngauri o vha a tshi khou ṱoḓa u ni pambusa kha Yehova Mudzimu waṋu, we a ni bvisa shangoni ḽa Egipita, nḓuni ya vhupuli.
11 Vhaisiraele vhoṱhe vha ḓo zwi pfa vha tshuwa, vha si tsha dovha vha ita zwithu zwivhi zwi fanaho na zwenezwi vhukati haṋu.+
12 “Arali na pfa hu tshi pfi kha muṅwe wa miḓi yaṋu ine Yehova Mudzimu waṋu a khou ni ṋea uri ni dzule khayo,
13 ‘Ho bva vhathu vha si na mushumo vhukati haṋu u itela u lingedza u pambusa vhadzulapo vha muḓini wavho, vha tshi ri: “Kha ri shumele miṅwe midzimu,” ine ni si i ḓivhe,’
14 ni tea u vhudzisa nga ha eneo mafhungo, ni ṱoḓisise nga vhuḓalo;+ arali zwenezwi zwithu zwi nengisaho zwo itwa vhukati haṋu, zwa khwaṱhisedzwa uri ndi ngoho,
15 ni fanela u ita vhungoho ha uri ni vhulaya vhadzulapo vha wonoyo muḓi nga banga.+ Ni fhelise+ zwoṱhe zwine zwa vha khawo nga banga, u katela na zwifuwo.
16 Ni kuvhanganyele thundu dzoṱhe vhukati ha khoro dzawo, ni fhise wonoyo muḓi, thundu dzawo dzi ḓo shuma sa tshifhiwa tsho fhelelaho kha Yehova Mudzimu waṋu. U ḓo vha mashubi a tshoṱhe. A u nga ḓo vhuya wa fhaṱululwa.
17 A no ngo fanela u dzhia tshithu tshine tsha fanela u fheliswa,+ uri Yehova a si ni sinyutshele, fhedzi a ni khathutshele na u ni pfela vhuṱungu, a ni andise, samusi o anela vhomakhulukuku waṋu.+
18 Ngauri ni fanela u pfa* Yehova Mudzimu waṋu na u tevhedza ndaela dzawe dzoṱhe dzine nda khou ni ṋea dzone ṋamusi uri ni ite zwo lugaho phanḓa ha Yehova Mudzimu waṋu.+
Ṱhaluso dzi re magumoni a siaṱari
^ Kana “u thetshelesa ipfi ḽa.”
