Dotoronomio 14:1-29
14 “Inwi ni vhana vha Yehova Mudzimu waṋu. Ni songo ḓitshetshekanya+ kana u vheula mavhudzi a re kha phanḓa dzaṋu ni tshi itela mufu.+
2 Ni vhathu vhakhethwa+ kha Yehova Mudzimu waṋu, Yehova o ni nanga uri ni vhe vhathu vhawe vho khetheaho kha vhathu vhoṱhe vha re kha ḽifhasi.+
3 “A no ngo tea u ḽa naho tshi tshini tshi nengisaho.+
4 Zwipuka zwine na nga zwi ḽa ndi hezwi:+ mboho, nngu, mbudzi,
5 ntsa, phala, mbavhala, mbudzi ya ḓaka, phalaphala, nngu ya ḓaka na nngu ya thavha.
6 Ni nga ḽa tshipuka tshiṅwe na tshiṅwe tshine tsha vha na khwanḓa dzo fhandekanaho dza vha mbili, tshine tsha dzeula.
7 Naho zwo ralo, a no ngo tea u ḽa zwipuka zwi tevhelaho zwine zwa dzeula kana zwi re na khwanḓa dzo fhandekanaho: gamela, muvhuḓa na mbila, ngauri zwi a dzeula, fhedzi a zwi na khwanḓa dzo fhandekanaho. Zwi na tshika.+
8 Na nguluvhe, khwanḓa dzayo dzo fhandekana, fhedzi a i dzeuli. I na tshika. A no ngo tea u ḽa ṋama yazwo kana u kwama mitumbu yazwo.
9 “Kha zwoṱhe zwine zwa tshila maḓini, ni nga ḽa hezwi: Zwoṱhe zwi re na khwea na makwanda, ni nga zwi ḽa.+
10 Fhedzi a no ngo tea u ḽa naho tshi tshini tshi si na khwea na makwanda. Tshi na tshika.
11 “Ni nga ḽa tshiṋoni tshiṅwe na tshiṅwe tsho kunaho.
12 Fhedzi a no ngo tea u ḽa hezwi: goni, lurwanzhivha, ḽianga,+
13 lurwanzhivha lutswuku, lurwanzhivha lutswu, na mifuda yoṱhe ya luvhimba,
14 na mifuda yoṱhe ya mafunguvhu,
15 mphwe, gwitha, begwa, na mifuda yoṱhe ya ṱhamba-lwanzhe,
16 kugwitha, gwitha ḽihulu, dandila,
17 ḽiṋulakhovhe, ḽianga, ṱhungununu,
18 ḽiovhelwa, mifuda yoṱhe ya ḽiṋulakhovhe, khororo na nyamulemalema.
19 Zwikhokhonono zwoṱhe zwi re na phapha na zwone zwi na tshika. A zwo ngo fanela u ḽiwa.
20 Zwikhokhonono zwoṱhe zwi re na phapha zwi si na tshika ni nga zwi ḽa.
21 “A no ngo tea u ḽa tshipuka naho tshi tshifhio tsho wanalaho tsho fa.+ Ni nga tshi ṋea mutsinda ane a dzula miḓini* yaṋu, a nga tshi ḽa, kana na mu rengisela tshone. Ngauri ni vhathu vhakhethwa kha Yehova Mudzimu waṋu.
“Ni songo vholomisa ṋama ya tshibudzana nga mafhi a mme atsho.+
22 “Ni songo vhuya na litsha u bvisa tshafumi tsha zwoṱhe zwe mbeu yaṋu ya zwi medza tsimuni ṅwaha muṅwe na muṅwe.+
23 Ni ḓo ḽa tshipiḓa tshithihi kha zwa fumi zwa thoro yaṋu, waini yaṋu ntswa, mapfura aṋu, na matanzhe a kholomo dzaṋu na a nngu dzaṋu phanḓa ha Yehova Mudzimu waṋu fhethu hune a ḓo vha o hu nanga uri dzina ḽawe ḽi dzule hone,+ uri ni gude u ofha Yehova Mudzimu waṋu tshifhinga tshoṱhe.+
24 “Fhedzi arali na vhona uri lwendo lwaṋu ndi lulapfu, zwenezwo zwithu ni sa koni u zwi hwala u swika fhethu he Yehova Mudzimu waṋu a hu nanga sa fhethu hune dzina ḽawe ḽa dzula hone+ ngauri ndi kulesa kha inwi, (ngauri Yehova Mudzimu waṋu u ḓo ni fhaṱutshedza),
25 ni nga zwi rengisa na wana tshelede, ni fare lwendo ni na yeneyo tshelede ni ye fhethu hune Yehova Mudzimu waṋu a ḓo hu nanga.
26 Ni nga renga tshine na tshi tama nga yeneyo tshelede: kholomo, nngu, mbudzi, waini na halwa na tshine na tshi takalela; ni zwi ḽe ni phanḓa ha Yehova Mudzimu waṋu, ni takale inwi na miṱa yaṋu.+
27 Ni songo hangwa Mulevi a re miḓini yaṋu,+ ngauri ho ngo wana mukovhe kana ifa u fana na inwi.+
28 “Musi ho no fhela miṅwaha miraru ni bvise tshipiḓa tshithihi kha zwa fumi tsha zwibveledzwa zwaṋu zwa wonoyo ṅwaha, ni zwi kuvhanganye miḓini yaṋu.+
29 Nga murahu ha zwenezwo, Mulevi a si na mukovhe kana ifa u fana na inwi, mutsinda, ṅwana a si na khotsi* na tshilikadzi, vha re miḓini yaṋu, vha ḓo ḓa vha ḽa vha fura,+ uri Yehova Mudzimu waṋu a ni fhaṱutshedze kha mishumo yaṋu yoṱhe ine na i ita.+
