Dotoronomio 16:1-22
16 “U humbule ṅwedzi wa Abibi,* u pembelele Paseka ya Yehova Mudzimu wau,+ ngauri nga ṅwedzi wa Abibi Yehova Mudzimu wau o u bvisa Egipita vhusiku.+
2 U ṱhavhele Yehova Mudzimu wau tshifhiwa tsha Paseka,+ tshi bvaho kha nngu dzau na kholomo dzau,+ u fhethu hune Yehova a hu nanga uri dzina ḽawe ḽi dzule hone.+
3 A wo ngo tea u tshi ḽa na tshithu tshi re na mbiliso;+ u tea u ḽa vhurotho vhu si na mbiliso maḓuvha a sumbe, vhurotho ha u tambula, ngauri wo bva shangoni ḽa Egipita nga u ṱavhanya.+ U ite zwenezwi vhutshiloni hau hoṱhe uri u humbule ḓuvha ḽe wa bva ngaḽo shangoni ḽa Egipita.+
4 Hu songo wanala suko ḽi re na mbiliso shangoni ḽau ḽoṱhe maḓuvha a sumbe,+ na ṋama ine wa ḓo ita ngayo tshiṱhavhelo nga madekwana a ḓuvha ḽa u thoma i songo sala u vhuya u swika nga matsheloni a ḓuvha ḽi tevhelaho.+
5 A u nga tendelwi u ṱhavha tshifhiwa tsha Paseka kha muḓi naho u ufhio une Yehova Mudzimu wau a khou ṋea wone.
6 Fhedzi tshi ṱhavhiwe fhethu he Yehova Mudzimu wau a hu nanga uri dzina ḽawe ḽi dzule hone. U ṱhavhe tshifhiwa tsha Paseka nga madekwana musi ḽi tshi tou kovhela,+ nga tshifhinga tsho vhewaho tshe wa bva ngatsho Egipita.
7 U i bike na u i ḽa+ u fhethu hune Yehova Mudzimu wau a ḓo hu nanga,+ nga matsheloni u nga humela denndeni ḽau.
8 U ḽe vhurotho vhu si na mbiliso maḓuvha a rathi, nga ḓuvha ḽa vhusumbe hu ḓo vha na muṱangano mukhethwa wa Yehova Mudzimu wau. A wo ngo tea u shuma.+
9 “U vhalele vhege dza sumbe. U thome u vhalela vhege dza sumbe u bva nga tshifhinga tshe wa thoma u kaṋa thoro dzi re tsimuni.+
10 Nga murahu u pembelele Vhuṱambo ha Dzivhege ha Yehova Mudzimu+ wau nga zwifhiwa zwa u ḓifunela zwi bvaho kha iwe zwine wa zwi ṋekedza zwi tshi ya nga nḓila ye Yehova Mudzimu wau a u fhaṱutshedza ngayo.+
11 U takale phanḓa ha Yehova Mudzimu wau, iwe, murwa wau, ṅwananyana wau, phuli yau ya munna, phuli yau ya mufumakadzi, Mulevi ane wa dzula nae muḓini* wau, mutsinda, ṅwana a si na khotsi* na tshilikadzi vha re vhukati hau, fhethu he Yehova Mudzimu wau a hu nanga uri dzina ḽawe ḽi dzule hone.+
12 U humbule uri wo vha u phuli ngei Egipita,+ u tea u tevhedza na u ita zwi re kha enea maitele.
13 “U pembelele Vhuṱambo ha Mishasha*+ maḓuvha a sumbe musi u tshi kuvhanganya zwi bvaho fhethu hau hune wa fhefhera hone* na hune ha itwa hone mapfura na hune ha sukiwa hone nḓirivhe.
14 U takale nga vhuṱambo hau,+ iwe na murwa wau, ṅwananyana wau, phuli yau ya munna, phuli yau ya mufumakadzi, Mulevi, mutsinda, ṅwana a si na khotsi na tshilikadzi vha re muḓini wau.
15 U ḓo pembelela vhuṱambo ha Yehova Mudzimu wau maḓuvha a sumbe+ u fhethu he Yehova a hu nanga, ngauri Yehova Mudzimu u ḓo fhaṱutshedza zwibveledzwa zwau zwoṱhe na zwoṱhe zwine wa zwi ita,+ u ḓo takala zwihulu.+
16 “Vhanna vhoṱhe vha fanela u ḓa luraru phanḓa ha Yehova Mudzimu wau fhethu he a hu nanga: Vhuṱamboni ha Vhurotho vhu si na Mbiliso,+ Vhuṱamboni ha Dzivhege,+ na Vhuṱamboni ha Mishasha,*+ hu songo vha na ane a ḓa phanḓa ha Yehova a songo fara tshithu.
17 Tshifhiwa tshine muṅwe na muṅwe a ḓo tshi ḓisa tshi tshimbidzane na nḓila ye Yehova Mudzimu a mu fhaṱutshedza ngayo.+
18 “U vhee vhahaṱuli+ na vhaḓinḓa kha lushaka luṅwe na luṅwe miḓini yoṱhe* ine Yehova Mudzimu wau a khou u ṋea yone, vha haṱule vhathu nga khaṱhulo yo lugaho.
19 A wo ngo tea u ita uri hu si haṱulwe nga nḓila yo teaho,+ u vha na tshiṱalula,+ kana u ṱanganedza tshanḓanguvhoni, ngauri tshanḓanguvhoni tshi swingisa maṱo a muṱali+ na u shanda maipfi a vhavhuya.
20 Khaṱhulo yo teaho, u tea u tovhola khaṱhulo yo teaho+ uri u tshile, u dzhie shango ḽine Yehova Mudzimu wau a khou u ṋea ḽone.
21 “U songo ṱavha muri naho u ufhio uri u vhe thanda khethwa*+ tsini na aḽeṱare ya Yehova Mudzimu wau ye wa ḓiitela yone.
22 “U songo ḓiimisela phuphu khethwa,+ ndi zwine Yehova Mudzimu wau a zwi vhenga.
Ṱhaluso dzi re magumoni a siaṱari
^ Sedzani Ṱhume. B15.
^ Thevhedz., “khoroni.”
^ Kana “tshisiwana.”
^ Kana “Vhudzulo ha Tshifhinganyana.”
^ Kana “luvhatani.”
^ Kana “Vhudzulo ha Tshifhinganyana.”
^ Thevhedz., “nga ngomu khoroni dzaṋu dzoṱhe.”
^ Sedzani Mutevhe Wa Ṱhalutshedzo Ya Maipfi.
