Dotoronomio 17:1-20
17 “A wo ngo tea u ṱhavhela Yehova Mudzimu wau kholomo kana nngu yo holefhalaho kana i re na tshiṅwe tshithu tsho khakheaho, ngauri i ḓo nengisa Yehova Mudzimu wau.+
2 “Arali munna kana mufumakadzi a wanwa vhukati hau kha muṅwe wa miḓi yau ine Yehova Mudzimu wau a khou u ṋea yone, a tshi khou ita zwi sa takadzi Yehova Mudzimu wau, a pfuka mulanga wawe,+
3 a pambuwa a ya a rabela miṅwe midzimu, a gwadamela yone kana ḓuvha kana ṅwedzi kana mavhuthu oṱhe a ṱaḓulu,+ zwithu zwe ndi si u laye.+
4 Arali wa vhigelwa zwone kana wa pfa nga hazwo, u ṱoḓisise eneo mafhungo nga vhuronwane.+ Arali wa wana i ngoho uri zwenezwo zwithu zwi nengisaho zwo itwa Isiraele,
5 onoyo munna kana mufumakadzi o itaho zwithu zwivhi a bviselwe nnḓa ha khoro dza muḓi, a kanḓwe nga matombo u swika a tshi fa.+
6 Onoyo muthu nga a vhulawe arali hu na ṱhanzi mbili kana tharu.+ A songo vhulawa arali hu na ṱhanzi nthihi.+
7 Musi a tshi vhulawa, dzenedzo ṱhanzi dzi fanela u vha dzone dza u thoma u mu kanḓa nga matombo, nga murahu vhathu vhoṱhe vha mu kanḓe nga matombo. U fhelise vhuvhi vhukati hau.+
8 “Arali ha vha na mafhungo kha muṅwe wa miḓi yau ane a konḓa vhukuma u a haṱula, hu sa londwi uri ndi mafhungo ane a katela u shululwa ha malofha+ kana mulandu we wa vhigwa, kana vhuvemu he ha itwa kana dziphambano, u ye fhethu he Yehova Mudzimu wau a hu nanga.+
9 U ye kha vhotshifhe vha Vhalevi na kha muhaṱuli+ wa misi yeneyo, u vhudzise, vha ḓo u vhudza tsheo ya eneo mafhungo.+
10 U tevhedze tsheo ye vha u vhudza yone vhe henefho fhethu hune Yehova a ḓo hu nanga. U ite vhungoho ha uri u a tendelana na zwoṱhe zwine vha ḓo u laya zwone.
11 U tendelane na mulayo une vha ḓo u sumbedza wone, u tendelane na tsheo ine vha ḓo u vhudza yone.+ U songo pambuwa kha yeneyo tsheo ine vha ḓo u ṋea yone, wa ya kha tsha u ḽa kana kha tsha monde.+
12 Muthu ane a ḓihudza a si thetshelese tshifhe kana muhaṱuli ane a khou shumela Yehova Mudzimu wau u fanela u fa.+ U fhelise vhuvhi Isiraele.+
13 Vhathu vhoṱhe vha ḓo zwi pfa vha ofha, a vha tsha ḓo ḓihudza.+
14 “Musi u tshi dzhena shangoni ḽine Yehova Mudzimu wau a khou u ṋea ḽone, wa ḽi dzhia wa dzula khaḽo, wa ri: ‘Kha ndi ḓivhumbele khosi u fana na dziṅwe tshaka dzo ntangaho,’+
15 kha tshenetsho tshiitea, u vhee khosi ine Yehova a ḓo i nanga.+ U vhee khosi i bvaho kha vhahau. A wo ngo tendelwa u ḓivhetshela mutsinda ane a si vhe wahau.
16 Naho zwo ralo, a songo vha na bere nnzhi+ kana a ita uri vhathu vha vhuyelele Egipita u itela u wana bere nnzhi,+ sa zwe Yehova a ni vhudza a ri: ‘A no ngo tea u vhuyelela Egipita.’
17 A songo ḓivhingela vhafumakadzi vhanzhi uri mbilu yawe i si pambuwe;+ a songo ḓikuvhanganyela siḽiva na musuku zwinzhi.+
18 Musi a tshi dzula kha khuluṋoni ya muvhuso wawe, u tea u ḓikopela wonoyu Mulayo kha bugu,* u bvaho kha une wa vha na vhotshifhe vha Vhalevi.+
19 “A dzule nawo, a vhale maḓuvha oṱhe a vhutshilo hawe,+ uri a gude u ofha Yehova Mudzimu wawe na u tevhedza zwoṱhe zwo ambiwaho kha wonoyu Mulayo na u ita zwi re kha enea maitele.+
20 Nga zwenezwo, mbilu yawe a i nga ḓihudzi kha vhahawe, ha nga litshi ndaela a pambutshela kha tsha u ḽa kana kha tsha monde u itela uri a vhuse lwa tshifhinga tshilapfu kha muvhuso wawe, ene na vhana vhawe vhukati ha Vhaisiraele.
Ṱhaluso dzi re magumoni a siaṱari
^ Kana “mupombo.”