Dotoronomio 2:1-37
2 “Nga murahu ra huma ra livha sogani nga nḓila i yaho Lwanzheni Lutswuku, samusi Yehova o mmbudza nga u ralo;+ ra tshimbila maḓuvha manzhi ri tshi mona na Thavha ya Seiri.
2 Mafheleloni Yehova a amba na nṋe a ri:
3 ‘Ndi kale ni tshi khou mona na heyi thavha. Zwino iyani thungo ya devhula.
4 U laye vhathu u ri: “Ni ḓo pfuka mukano wa vhahaṋu, vhaḓuhulu vha Esau,+ vhane vha dzula Seiri,+ vha ḓo ni ofha,+ ni tea u ṱhogomela vhukuma.
5 Ni songo lwa navho,* ngauri a thi nga ni ṋei shango ḽavho naho ḽi ḽifhio naho hu fhethu hune na nga kanda hone, ngauri ndo ṋea Esau fhethu ha Thavha ya Seiri uri hu vhe hawe.+
6 Ni renge zwiḽiwa zwine na ḓo zwi ḽa, ni renge na maḓi ane na ḓo a nwa.+
7 Ngauri Yehova Mudzimu waṋu o ni fhaṱutshedza kha zwoṱhe zwe na zwi ita. O vha a tshi khou ni vhona musi ni tshi khou tshimbila kha ḽeneḽi soga ḽihulu. Yehova Mudzimu waṋu o vha e na inwi miṅwaha ya 40, no vha ni sa shayi tshithu.”’+
8 Ngauralo, ra fhira nga henefho hu re na vhahashu, vhaḓuhulu vha Esau,+ vhane vha dzula Seiri, ra fara nḓila i re kule na Araba, Elatha na Etsioni-gebere.+
“Ra huma ra fara nḓila ya soga ḽa Moaba.+
9 Yehova a amba na nṋe a ri: ‘Ni songo lwa na Vhamoaba ngauri a thi nga ni ṋei shango naho ḽi ḽifhio ḽavho, ngauri shango ḽa Ari ndo ḽi ṋea vhaḓuhulu vha Loto uri ḽi vhe ḽavho.+
10 (Vhaemi+ vho vha vha tshi dzula henefho tshifhingani tsho fhiraho, vho vha vhe vhathu vha re na maanḓa, vhe vhanzhi, vho lapfa sa Vhaenaki.
11 Na Vharefaimi+ vho vha vha tshi dzhiiwa vha tshi fana na Vhaenaki,+ Vhamoaba vho vha vha tshi vha vhidza Vhaemi.
12 Tshifhingani tsho fhiraho Vhahori+ vho vha vha tshi dzula Seiri, fhedzi vhaḓuhulu vha Esau vha vha dzhiela shango vha vha fhelisa, vha dzula shangoni ḽavho,+ u fana na zwine Vhaisiraele vha ḓo zwi ita shangoni ḽine vha ḓo dzula khaḽo, ḽine Yehova a ḓo vha ṋea ḽone.)
13 Zwino tshimbilani ni wele Govha* ḽa Sarede.’ Ra wela Govha* ḽa Sarede.+
14 Ro fhedza miṅwaha ya 38 ri tshi khou tshimbila u bva Kadese-baranea u swika ri tshi wela Govha* ḽa Sarede, u vhuya u swika murafho woṱhe wa vhanna vha yaho nndwani u tshi fa henefho madenndeni, sa zwe Yehova a vha anela.+
15 Tshanḓa tsha Yehova tsha vha rwa tsha vha fhedza henefho madenndeni u swika vha tshi fhela.+
16 “Nga u ṱavhanya musi vhanna vhoṱhe vhane vha ya nndwani vho no fa,+
17 Yehova a dovha a amba na nṋe a ri:
18 ‘Ṋamusi ni ḓo pfuka nga shangoni ḽa Vhamoaba, hune ha vha Ari.
19 Musi ni tshi sendela tsini na Vhaamoni, ni songo vha levhela kana u vha sinyusa, ngauri a thi nga ni ṋei shango naho ḽi ḽifhio ḽa Vhaamoni uri ni dzule khaḽo, ngauri ndo ḽi ṋea vhaḓuhulu vha Loto uri ḽi vhe ḽavho.+
20 Na ḽeneḽi ḽo vha ḽi tshi dzhiiwa sa shango ḽa Vharefaimi.+ (Vharefaimi vho vha vha tshi dzula henefho tshifhingani tsho fhiraho, Vhaamoni vho vha vha tshi vha vhidza Vhasamasumi.
21 Vho vha vhe vhathu vha re na maanḓa, vhe vhanzhi, vho lapfa sa Vhaenaki;+ fhedzi Yehova a vha fhelisa, Vhaamoni vha tshi zwi vhona, vhenevho vha dzula shangoni ḽavho.
22 Ndi zwe a ita kha vhaḓuhulu vha Esau, vhane zwino vha dzula Seiri,+ musi a tshi fhelisa Vhahori+ phanḓa havho uri a kone u vha pandela, vha dzula shangoni ḽavho u swika na ṋamusi.
23 Vhaavimi vhone vho vha vha tshi dzula miḓini ye ya vha i tshi bva Gaza+ u swika Kafutori, vha bvaho Kafutori,*+ vha tshi vha fhelisa, vha dzula shangoni ḽavho.)
24 “‘Takuwani, ni wele Govha ḽa Arinoni.*+ Sihoni,+ khosi ya Vhaamori ya Hesiboni ndo i kumedzela zwanḓani zwaṋu. Ngauralo, dzhiani shango ḽayo ni lwe nayo.
25 U bva ṋamusi ndi ḓo ita uri vhathu vhoṱhe vha re nga fhasi ha ḽiṱaḓulu vha ofhe musi vha tshi pfa nga ha inwi. Vha ḓo ni ofha vha tetemela.’+
26 “Nda ruma vhaḓinḓa ri sogani ḽa Kedemothe+ vha ya ha Sihoni khosi ya Hesiboni vhe na mafhungo a mulalo+ vha ri:
27 ‘Ntendele ndi fhire nga shangoni ḽau. Ndi ḓo tshimbila nḓilani, a thi nga pambutsheli kha tsha u ḽa kana kha tsha monde.+
28 Ndi ḓo ḽa zwiḽiwa na u nwa maḓi zwine wa ḓo nthengisela zwone. Ntendele ndi fhire nga milenzhe,
29 samusi vhaḓuhulu vha Esau vha dzulaho ngei Seiri na Vhamoaba vha dzulaho ngei Ari vho ntendela, u swika ndi tshi wela Yorodane nda dzhena shangoni ḽe Yehova Mudzimu washu a ri ṋea ḽone.’
30 Fhedzi Sihoni khosi ya Hesiboni ho ngo ri tendela ri tshi fhira, ngauri Yehova Mudzimu waṋu o rindidza muya wawe+ na mbilu yawe, uri a mu kumedzele zwanḓani zwaṋu samusi zwo vha nga u ralo.+
31 “Yehova a amba na nṋe a ri: ‘Ndo no thoma u ni ṋea Sihoni na shango ḽawe. Thomani u dzula shangoni ḽawe.’+
32 Musi Sihoni a tshi bva khathihi na vhathu vhawe vhoṱhe u itela u lwa na riṋe ngei Yahazi,+
33 Yehova Mudzimu washu o ri kumedzela ene, ra mu kunda, ra kunda vharwa vhawe na vhathu vhawe vhoṱhe.
34 Ro thuba miḓi yawe yoṱhe nga tshenetsho tshifhinga, ra fhelisa miḓi yawe yoṱhe, vhanna, vhafumakadzi na vhana. A hu na we a ponyoka.+
35 Ro dzhia zwifuwo fhedzi khathihi na thundu dza yeneyo miḓi ye ra i kunda.
36 U bva Aroere,+ hune ha vha mukanoni wa Govha ḽa Arinoni* (u katela na muḓi u re govhani), u swika Giḽiada, a hu na muḓana we ri si u kunde. Yehova Mudzimu washu o i kumedzela yoṱhe kha riṋe.+
37 Naho zwo ralo, a no ngo swika shangoni ḽa Vhaamoni,+ Govhani* ḽoṱhe ḽa Yaboko+ kana miḓini i re dzinguni ḽa dzithavhani kana huṅwe fhethu he Yehova Mudzimu washu a ri thivhela.
Ṱhaluso dzi re magumoni a siaṱari
^ Kana “Ni songo vha sinyusa.”
^ Kana “Muedzi.”
^ Kana “Muedzi.”
^ Kana “Muedzi.”
^ Ndi Kereta.
^ Kana “Muedzi wa Arinoni.”
^ Kana “Muedzi wa Arinoni.”
^ Kana “Muedzini.”
