Dotoronomio 22:1-30
-
U ṱhonifha zwifuwo zwa vhaṅwe vhathu (1-4)
-
Munna a songo ambara zwa mufumakadzi, na mufumakadzi a songo ambara zwa munna (5)
-
U pfela vhuṱungu zwifuwo (6, 7)
-
Luvhondo luṱuku kha ṱhanga (8)
-
Zwi songo teaho u ṱanganyiswa (9-11)
-
U ita mashaphu kha zwiambaro (12)
-
Nḓila ine vho pfukaho milayo ya zwa vhudzekani vha tea u haṱulwa ngayo (13-30)
22 “Arali wa vhona mboho ya wahau kana nngu yawe yo xela, u songo i litsha nga khole.+ U i humisele kha wahau.
2 Fhedzi arali wahau a sa dzuli tsini na iwe kana u sa mu ḓivhi, u khadele tshenetsho tshifuwo nḓuni yau, tshi fanela u dzula na iwe u swika wahau a tshi tshi ṱoḓa. Nga zwenezwo, u tshi humisele khae.+
3 Ndi zwine wa fanela u zwi ita kha donngi yawe, tshiambaro tshawe na kha tshiṅwe na tshiṅwe tshe wahau a tshi xedza wa tshi wana. A wo ngo tea u sokou tshi litsha.
4 “Arali wa vhona donngi ya wahau kana mboho yawe yo wela fhasi nḓilani, a wo ngo tea u i litsha nga khole. U tea u mu thusa uri a i vuse.+
5 “Mufumakadzi ho ngo tea u ambara zwiambaro zwa munna, na munna a songo ambara zwiambaro zwa mufumakadzi. Ngauri ane a ita zwenezwo u a nengisa kha Yehova Mudzimu wau.
6 “Arali wa wana tshiṱaha tsha tshiṋoni nḓilani tshi na mafhondo kana makumba, hu sa londwi uri tshi kha muri kana tshi fhasi, mme o fukedza mafhondo kana a tshi khou alamela, u songo tshi dzhia khathihi na mafhondo atsho.+
7 Litsha mme a fhufhe, u kone u dzhia mafhondo. U ite zwenezwo uri zwi u tshimbilele zwavhuḓi u lalame.
8 “Arali wa fhaṱa nnḓu ntswa, u tea u dovha wa fhaṱa na luvhondo luṱuku kha ṱhanga+ yau uri muṱa wau u si vhe na mulandu wa malofha musi muthu a tshi wa e khayo.
9 “A wo ngo tea u zwala mifuda mivhili ya mbeu tsimuni yau ya minḓirivhe.+ Arali wa ita nga u ralo tshiṅwe na tshiṅwe tshine tsha ḓo bveledzwa nga mbeu ye wa i zwala khathihi na zwibveledzwa zwa yeneyo tsimu ya minḓirivhe zwi ḓo vha zwa nḓuni khethwa.
10 “U tshi lima u songo pana mboho na donngi.+
11 “U songo ambara tshiambaro tsho lukwaho nga wuḽu na ḽinene.+
12 “U rungelele mashaphu kha lupendelo lwa tshiambaro tshau.+
13 “Arali munna o vhinga mufumakadzi a ita zwa vhudzekani nae, fhedzi a vho mu vhenga,*
14 a mu pomoka uri ho ngo ḓifara zwavhuḓi, a mu tshinya dzina, a ri: ‘Ndo vhinga hoyu mufumakadzi, fhedzi musi ndi tshi ita zwa vhudzekani nae, a tho ngo wana vhuṱanzi ha uri o vha a sa athu u ita zwa vhudzekani,’
15 khotsi na mme a onoyu musidzana vha bvise vhuṱanzi vha sumbedze vhahulwane khoroni ya muḓi uri onoyu musidzana o vha a sa athu u ita zwa vhudzekani.
16 Khotsi a musidzana u fanela u amba na vhahulwane a ri: ‘Ndo ṋea hoyu munna ṅwananyana wanga uri a vhe mufumakadzi wawe, fhedzi u vho mu vhenga,
17 o mu pomoka uri ho ngo ḓifara zwavhuḓi, a ri: “Ndo wana uri ṅwananyana wau o no ita zwa vhudzekani.” Zwino vhuṱanzi ha uri ṅwananyana wanga o vha a sa athu u ita zwa vhudzekani khovhu.’ Vha ḓo petulula labi phanḓa ha vhahulwane vha muḓi.
18 Vhahulwane vha wonoyo muḓi+ vha ḓo fara onoyo munna vha mu rwa.+
19 Vha mu lifhise shekele* dza 100, vha dzi ṋee khotsi a onoyo musidzana, ngauri o nyadzisa musidzana* wa Isiraele,+ u ḓo bvela phanḓa e mufumakadzi wawe. Onoyo munna ha nga ḓo tendelwa u mu ṱala u swika a tshi fa.
20 “Arali zwenezwo zwithu zwi ngoho, hu si na vhuṱanzi ha uri musidzana o vha a sa athu u ita zwa vhudzekani,
21 vha mu bvisele nnḓa ha nnḓu ya khotsi awe, vhanna vha wonoyo muḓi vha fanela u mu kanḓa nga matombo u swika a tshi fa, ngauri o ita zwithu zwi shonisaho+ kha ḽa Isiraele nga u ḓifara luvhi nga zwa vhudzekani* nḓuni ya khotsi awe.+ U fhelise vhuvhi vhukati hau.+
22 “Arali munna a wanwa o lala na mufumakadzi wa muṅwe munna, vhuvhili havho vha vhulawe, onoyo munna khathihi na onoyo mufumakadzi.+ U fhelise vhuvhi kha ḽa Isiraele.
23 “Arali musidzana* o fhulufhedziswa u vhingwa, muṅwe munna a ṱangana nae henefho muḓini a lala nae,
24 vhuvhili havho ni vha bvisele nnḓa ha muḓi, ni vha kanḓe nga matombo u swika vha tshi fa ngauri musidzana u ḓo vha a songo ṱavha mukosi henefho muḓini, na munna a vhulawe ngauri o nyadzisa mufumakadzi wa muṅwe muthu.+ U fhelise vhuvhi vhukati hau.
25 “Naho zwo ralo, arali munna a ṱangana na musidzana o fhulufhedziswaho u vhingwa e ḓakani, a mu fara a lala nae, onoyo munna we a lala nae u tea u fa,
26 musidzana ni songo mu ita tshithu. Ho ngo ita tshivhi tsho tewaho nga lufu. Wonoyu mulandu u fana na wa musi munna a tshi vutshela muṅwe muthu a mu vhulaya.+
27 Ngauri onoyo munna o ṱangana nae ḓakani, musidzana o fhulufhedziswaho u vhingwa a ṱavha mukosi, fhedzi hu si vhe na muthu we a mu lamulela.
28 “Arali munna a ṱangana na musidzana* a songo fhulufhedziswaho u vhingwa, a mu dzhia a ita zwa vhudzekani nae, vha waniwa,+
29 munna we a lala nae u tea u ṋea khotsi a onoyo musidzana shekele dza 50, u ḓo vha mufumakadzi wawe.+ Ngauri o mu nyadzisa, ha nga ḓo tendelwa u mu ṱala u swika a tshi fa.
30 “Hu songo vha na munna ane a vhinga mufumakadzi wa khotsi awe uri a si nyadzise khotsi awe.+
Ṱhaluso dzi re magumoni a siaṱari
^ Kana “a vho mu landula.”
^ Shekele nthihi i lemela gramu dza 11,4. Sedzani Ṱhume. B14.
^ Sedzani Mutevhe Wa Ṱhalutshedzo Ya Maipfi.
^ Kana “u rengisa muvhili.”
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
