Dotoronomio 24:1-22
24 “Arali munna a vhinga mufumakadzi, fhedzi onoyo mufumakadzi a si mu takadze, ngauri onoyo munna o wana hu na tshithu tshine a si tshi takalele nga onoyo mufumakadzi, a mu ṅwalele luṅwalo lwa u mu ṱala,+ a mu ṋee lwone, a mu pandele nḓuni yawe.+
2 A ṱuwe nḓuni yawe, a nga vha mufumakadzi wa muṅwe.+
3 Arali na munna wa vhuvhili a si mu takalele, a mu ṅwalela luṅwalo lwa u mu ṱala, a mu ṋea lwone, a mu pandela nḓuni yawe, kana arali munna wa vhuvhili o vhingaho onoyo mufumakadzi a fa,
4 munna wa u thoma we a pandela onoyo mufumakadzi a nga si tendelwe uri a mu dzhie uri a dovhe a vhe mufumakadzi wawe musi o no tshikafhadzwa, ngauri zwenezwo ndi zwithu zwi nengisaho kha Yehova. U songo tshikafhadza nga tshivhi shango ḽine Yehova Mudzimu wau a khou ṋea ḽone.
5 “Musi munna a tshi kha ḓi bva u vhinga, a songo ya nndwani kana u ṋewa miṅwe mishumo. Nga a dzule ṅwaha woṱhe hayani a takadze mufumakadzi wawe.+
6 “Hu songo vha na muthu ane a dzhia guyo kana tombo ḽa guyo sa tshithu tshine a tshi fara u swika a tshi lifhelwa zwe a kolodisa+ ngauri tshenetsho tshithu tshine a khou tshi fara ndi tshine onoyo muthu a ḓitshidza ngatsho.
7 “Arali ha wanwa uri muṅwe muthu o tswa muṅwe wa vhahawe wa Muisiraele,+ a mu tambudza a mu rengisa,+ o tswaho u tea u vhulawa. U fhelise vhuvhi vhukati hau.+
8 “Musi hu na vhulwadze ha mapele,* ni ite vhungoho ha uri ni tevhedza zwoṱhe zwine vhotshifhe vha Vhalevi vha ḓo ni laya.+ Ni ite nga vhuronwane zwoṱhe zwe nda vha laya.
9 U humbule zwe Yehova Mudzimu wau a zwi ita Miriamu nḓilani musi u tshi bva Egipita.+
10 “Arali wa hadzimisa muhura wau tshithu,+ u songo dzhena nḓuni yawe wa mu dzhiela tshe a fhulufhedzisa uri u ḓo u ṋea tshone sa tsha u farela mulandu.
11 U ime nnḓa, muthu we wa mu hadzimisa a u ḓisele tshine a khou u ṋea tshone sa tsha u farela mulandu.
12 Arali onoyo muthu e mushai, u songo eḓela u tshi kha ḓi vha na tshe a u ṋea tshone sa tsha u farela mulandu.+
13 U mu humisele tshe a u ṋea tshone sa tsha u farela mulandu musi ḽi tshi tou kovhela, u ḓo eḓela e na nguvho yawe,+ ndi hone a tshi ḓo humbela Mudzimu uri a u fhaṱutshedze; zwi ḓo u tshimbilela zwavhuḓi phanḓa ha Yehova Mudzimu wau.
14 “U songo fhura mushumi we wa mu thola a re mushai ane a dzula nḓuni yau hu sa londwi uri ndi wahau kana ndi mutsinda a re muḓini* wahau.+
15 U mu ṋee malamba awe nga ḽeneḽo ḓuvha,+ musi ḽi sa athu u kovhela, ngauri ndi mushai na uri o ḓitika nga eneo malamba. Arali wa sa ita nga u ralo, u ḓo lilela Yehova, iwe wa vha na mulandu wa tshivhi.+
16 “Vhokhotsi vha songo fela zwivhi zwa vhana vhavho na vhana vha songo fela zwivhi zwa vhokhotsi avho.+ Muthu u ḓo fela zwivhi zwawe fhedzi.+
17 “U songo kundisa mutsinda kana ṅwana a si na khotsi*+ u wana pfanelo dzawe, u songo dzhia nguvho ya tshilikadzi uri i vhe yone ya u farela zwe a hadzima.+
18 U humbule uri wo vha u phuli ngei Egipita, Yehova Mudzimu wau a u rengulula u henefho.+ Ndi ngazwo ndi tshi khou u laya uri u ite zwenezwi.
19 “Musi u tshi kaṋa tsimuni yau, wa hangwa khuḽane tsimuni, u songo huma wa ya u i dzhia. U i siele mutsinda, ṅwana a si na khotsi na tshilikadzi,+ uri Yehova Mudzimu wau a u fhaṱutshedze kha zwoṱhe zwine wa zwi ita.+
20 “Musi u tshi kulula muṱwari wau, u songo humela wa ya wa sedza ṱhwari dzo salaho kha matavhi awo. Zwo salaho zwi vhe zwa mutsinda, ṅwana a si na khotsi na tshilikadzi.+
21 “Musi u tshi fula nḓirivhe tsimuni yau ya munḓirivhe, u songo humela wa ya wa kuvhanganya dzo salaho. Dzo salaho dzi vhe dza mutsinda, ṅwana a si na khotsi na tshilikadzi.
22 U humbule uri wo vha u phuli shangoni ḽa Egipita. Ndi ngazwo ndi tshi khou u laya uri u ite zwenezwi.
Ṱhaluso dzi re magumoni a siaṱari
^ Ipfi ḽa Tshihevheru ḽo ṱalutshedzelwaho sa “mapele” ḽi angaredza zwithu zwinzhi zwine zwa katela malwadze a lukanda o fhambanaho ane a pfukela. Ḽi nga dovha ḽa katela mubvuḓu wa kha zwiambaro na mugugumela wa kha nnḓu.
^ Thevhedz., “khoroni.”
^ Kana “tshisiwana.”
