Dotoronomio 29:1-29
29 Haya ndi maipfi a mulanga we Yehova a laya Mushe uri a u vhofhe na vhathu vha Isiraele shangoni ḽa Moaba, u engedza kha mulanga we a u vhofha navho ngei Horebe.+
2 Mushe a vhidza Vhaisiraele vhoṱhe a amba navho a ri: “No vhona zwoṱhe zwe Yehova a zwi ita shangoni ḽa Egipita kha Farao, vhashumeli vhawe vhoṱhe na shango ḽawe ḽoṱhe,+
3 khaṱhulo* khulwane dze na dzi vhona, na zwiḽa zwiga zwihulu na vhuṱolo vhuhulu.+
4 Naho zwo ralo, Yehova ho ngo ni ṋea mbilu uri ni pfesese na maṱo uri ni vhone na nḓevhe uri ni pfe u swika na ṋamusi.+
5 ‘Musi ndi tshi khou ni tshimbidza sogani miṅwaha ya 40,+ zwiambaro zwaṋu a zwo ngo ṱahala na thovho* dzaṋu dze na vha no dzi ambara a dzo ngo ṱahala.+
6 A no ngo ḽa vhurotho, a no ngo nwa waini kana halwa uri ni ḓivhe uri ndi nṋe Yehova Mudzimu waṋu.’
7 Mafheleloni na swika hafha fhethu, Sihoni khosi ya Hesiboni+ na Ogo khosi Bashani+ vha lwa na riṋe, fhedzi ra vha kunda.+
8 Nga murahu ra dzhia shango ḽavho ra ḽi ṋea Vharubeni, Vhagada na hafu ya lushaka lwa Manase sa ifa.+
9 Ngauralo, ni tevhedze maipfi a hoyu mulanga, ni a thetshelese uri zwithu zwoṱhe zwi ni tshimbilele zwavhuḓi.+
10 “Ṋamusi noṱhe no ima phanḓa ha Yehova Mudzimu waṋu, vharangaphanḓa vha tshaka dzaṋu, vhahulwane vhaṋu, vhaḓinḓa vhaṋu, vhanna vhoṱhe vha Isiraele,
11 vhana vhaṋu, vhafumakadzi vhaṋu+ na mutsinda+ a re vhukati ha madennde aṋu, u bva kha ane a reḓa khuni u swika kha ane a kelela maḓi.
12 Ni fhano uri ni vhe nga fhasi ha mulanga wa Yehova Mudzimu waṋu na muano wawe, une Yehova Mudzimu waṋu a khou ni anela ṋamusi+
13 uri ṋamusi ni vhe vhathu vhawe,+ ene a vhe Mudzimu waṋu,+ sa zwe a ni fhulufhedzisa, o anela vhomakhulukuku waṋu Abrahamu,+ Isaka+ na Yakobo.+
14 “A si inwi ni noṱhe vhane nda khou vhofha na inwi hoyu mulanga na hoyu muano,
15 fhedzi ndi u vhofha na vho imaho hafha na riṋe ṋamusi phanḓa ha Yehova Mudzimu washu na vhane vha si vhe hone ṋamusi.
16 (Ni a ḓivha zwavhuḓi nḓila ye ra tshila ngayo shangoni ḽa Egipita na nḓila ye ra fhira ngayo tshaka dzo fhambanaho ri lwendoni lwashu.+
17 No vha ni tshi vhona zwithu zwavho zwi nengisaho na midzimu yavho ya zwifanyiso i nengisaho*+ yo itwaho nga thanda, tombo, siḽiva na musuku, ye vha vha vhe nayo.)
18 Ni ṱhogomele uri hu si vhe na munna, mufumakadzi, kha muṱa kana kha lushaka, ane a ṱutshela Yehova Mudzimu washu a shumela midzimu ya dzenedzo tshaka+ uri a si vhe mudzi wa mutshelo u re na mulimo na u kalakataho.*+
19 “Fhedzi arali muṅwe muthu a pfa maipfi a hoyu muano, a zuwa mbiluni yawe a ri: ‘Zwithu zwi ḓo ntshimbilela naho ndi tshi kombetshedza uri ndi tshimbile nga nḓila dzanga,’ ngeno a tshi khou tshinya zwoṱhe zwi re nḓilani yawe,
20 Yehova a nga si mu hangwele.+ Nṱhani hazwo, mbiti khulu dza Yehova dzi ḓo dugela onoyo muthu, masamba oṱhe o ṅwaliwaho kha yeneyi bugu a ḓo mu ḓela,+ Yehova u ḓo fhelisa dzina ḽawe kha ḽifhasi.
21 Yehova u ḓo mu nanga kha tshaka dzoṱhe dza Isiraele uri a welwe nga khombo uri zwi tshimbidzane na masamba oṱhe a mulanga o ṅwaliwaho kha yeneyi bugu ya Mulayo.
22 “Musi murafho wa tshifhingani tshi ḓaho wa vhana vhaṋu na mutsinda a bvaho shangoni ḽa kule vha tshi vhona vhulwadze ho welaho ḽeneḽo shango, malwadze e Yehova a ḽi ḓisela one,
23 musi vha tshi vhona nḓila ye ḽa ḓala ngayo nga muṋo na tsevhela na nḓila ye ḽa fhiswa ngayo, na nḓila ye zwenezwo zwa ita uri ḽi sa limiwe, hu si mele tshithu u fana na Sodoma na Gomora,+ Adema na Zeboimi,+ musi Yehova o a fhelisa nga mbiti dzawe o sinyuwa,
24 vhana vhaṋu na mutsinda na tshaka dzoṱhe vha ḓo kombetshedzea uri: ‘Ndi ngani Yehova o ita zwenezwi zwithu kha ḽeneḽo shango?+ Ndi ngani o sinyuwa zwihulu?’
25 Nga zwenezwo vha ḓo ri: ‘Ndi nge vha si tevhedze mulanga wa Yehova+ Mudzimu wa vhomakhulukuku wavho, we a u vhofha navho musi a tshi vha bvisa shangoni ḽa Egipita.+
26 Fhedzi vho ya vha shumela miṅwe midzimu vha i gwadamela, midzimu ye vha vha vha sa i ḓivhi na ye a vha a songo vha tendela uri vha i gwadamele.+
27 Mbiti dza Yehova dza dugela ḽeneḽo shango nga u ḽi ḓisela masamba oṱhe o ṅwaliwaho kha yeneyi bugu.+
28 Nga zwenezwo, Yehova a vha tupula mavuni avho nga mbiti dzawe,+ o sinyuwa zwihulu, a vha isa kha ḽiṅwe shango, hune vha vha hone ṋamusi.’+
29 “Zwithu zwo dzumbiwaho ndi zwa Yehova Mudzimu washu,+ fhedzi zwithu zwo dzumbululwaho ndi zwashu na vhaḓuhulu vhashu u swika nga hu sa fheli uri ri tevhedze maipfi oṱhe a hoyu Mulayo.+
Ṱhaluso dzi re magumoni a siaṱari
^ Kana “milingo.”
^ Kana “phashane, navhula.”
^ Ipfi ḽine ḽa amba zwenezwi ḽa Tshihevheru ḽi tshimbidzana na ipfi “vhutoko” nahone ḽi shumiswa sa mubulo wa u goḓa.
^ Kana “haṱaho.”
