Dotoronomio 9:1-29
9 “Thetshelesa iwe Isiraele, ṋamusi u khou wela Yorodane+ uri u dzhene u thube tshaka khulwane dzine dza vha na maanḓa u u fhira,+ miḓi mihulu yo tsireledzwaho nga mbondo dzi swikaho makoleni,+
2 dzi re na vhathu vhanzhi na vhane vha vha vhalapfu vha Vhaenaki,+ vhane wa vha ḓivha na vhe wa pfa nga havho hu tshi pfi: ‘Ndi nnyi ane a nga lwa na Vhaenaki?’
3 Ngauralo, ḓivha ṋamusi uri Yehova Mudzimu wau u ḓo u ranga phanḓa.+ Ndi mulilo u tshinyadzaho,+ u ḓo vha fhelisa. U ḓo vha kunda u tshi zwi vhona, uri u vha pandele nga u ṱavhanya u vha fhelise, sa zwe Yehova a u fhulufhedzisa.+
4 “Musi Yehova Mudzimu wau a tshi vha pandela phanḓa hau u songo amba mbiluni yau wa ri: ‘Ndi nga zwivhuya zwanga zwe zwa ita uri Yehova a nḓise kha ḽino shango uri ndi ḽi dzhie.’+ Nṱhani hazwo, ndi nga vhuvhi ha dzenedzi tshaka+ zwine zwa ita uri Yehova Mudzimu wau a dzi pandele phanḓa hau.
5 A si nga nṱhani ha zwivhuya zwau kana u luga ha mbilu yau zwine zwa ita uri u vha dzhiele shango ḽavho ḽi vhe ḽau. Nṱhani hazwo, ndi nga nṱhani ha vhuvhi ha dzenedzi tshaka zwine zwa ita uri Yehova Mudzimu wau a dzi pandele phanḓa hau,+ uri a ite zwe a amba musi Yehova a tshi anela vhomakhulukuku wau Abrahamu,+ Isaka+ na Yakobo.+
6 U ḓivhe uri a si nga nṱhani ha zwivhuya zwau zwine zwa ita uri Yehova Mudzimu wau a u ṋee ḽeneḽi shango ḽavhuḓi uri ḽi vhe ḽau, ngauri u lushaka lu re na tshikhuna.+
7 “U songo hangwa nḓila ye wa sinyusa ngayo Yehova Mudzimu wau ngei sogani.+ Wa shandukela Yehova u bva nga ḓuvha ḽe wa pfuluwa ngaḽo shangoni ḽa Egipita u vhuya u swika henefha fhethu.+
8 Wo sinyusa Yehova na ngei Horebe, Yehova o vha o u sinyutshela lwe a vha o ḓiimisela u u fhelisa.+
9 Musi ndi tshi gonya thavha u itela u wana mbaba dza matombo,+ mbaba dza mulanga we Yehova a u vhofha na iwe,+ ndo dzula thavhani maḓuvha a 40 na vhusiku hao,+ ndi sa ḽi zwiḽiwa na u nwa maḓi.
10 Yehova o nṋea mbaba mbili dza matombo dzo ṅwaliwa nga munwe wawe, khadzo ho vha hu na maipfi oṱhe e Yehova a u vhudza one thavhani e vhukati ha mulilo nga ḓuvha ḽe wa vha wo kuvhangana ngaḽo.+
11 Musi hu tshi fhela maḓuvha a 40 na vhusiku hao, Yehova o nṋea mbaba mbili dza matombo, mbaba dza mulanga,
12 Yehova a amba na nṋe a ri: ‘Takuwa u ṱavhanye u tse, ngauri vhathu vhau vhe wa vha bvisa Egipita vho tshinya.+ Vho ṱavhanya vha laṱa nḓila ye nda vha laya uri vha i tevhele. Vho ḓiitela mudzimu wa tshifanyiso nga tsimbi.’+
13 Nga zwenezwo, Yehova a amba na nṋe a ri: ‘Ndo vha vhona uri ndi vhathu vha re na tshikhuna.*+
14 Nnditshe ndi vha fhelise uri ndi thuthe madzina avho a si tsha pfala kha ḽifhasi, iwe ndi u ite lushaka lu re na maanḓa na lune lwa vha vhanzhi u vha fhira.’+
15 “Nga murahu ha zwenezwo, nda tsa thavhani musi i tshi khou duga mulilo,+ ndo vha ndo fara mbaba mbili dza mulanga.+
16 Nda lavhelesa nda vhona uri no khakhela Yehova Mudzimu waṋu! No ḓiitela ṋamana nga tsimbi. No ṱavhanya na laṱa nḓila ye Yehova a ni laya uri ni i tevhele.+
17 Nda laṱa dzenedzo mbaba mbili dze nda vha ndo dzi fara, nda dzi kwasha ni tshi zwi vhona.+
18 Nda luvha phanḓa ha Yehova, sa zwe nda zwi ita u thomani, lwa maḓuvha a 40 na vhusiku hao. Ndi si ḽe zwiḽiwa kana u nwa maḓi,+ nga nṱhani ha zwivhi zwoṱhe zwe na zwi ita ni tshi ita zwi sa takadzi Yehova na mu sinyusa.
19 Ngauri ndo vha ndi tshi khou ofha nga nṱhani ha uri Yehova o vha o ni sinyutshela zwihulu,+ o ḓiimisela u ni fhelisa. Naho zwo ralo, Yehova a dovha a nthetshelesa nga tshenetsho tshifhinga.+
20 “Yehova o vha o sinyutshela Aroni zwihulu lwe a vha o ḓiimisela u mu fhelisa,+ fhedzi nṋe nda humbelela Aroni nga thabelo nga tshenetsho tshifhinga.
21 Nda dzhia ṋamana+ ye na i ita ine ya vha tshivhi nda i fhisa nga mulilo; nda i kwashekanya, nda i kuya u swika i tshi vha luphuse, nda lu shela mulamboni we wa vha u tshi elela u tshi bva thavhani.+
22 “Zwiṅwe hafhu, no sinyusa Yehova na ngei Thabera,+ Masaha+ na ngei Kibirotho-hatava.+
23 Musi Yehova a tshi ni ruma ni ngei Kadese-baranea+ a tshi ri: ‘Gonyani ni dzhie shango ḽine nda ḓo ni ṋea ḽone!’ No dovha na shandukela ndaela ya Yehova Mudzimu waṋu,+ ni si vhe na lutendo+ khae, ni si mu thetshelese.
24 No shandukela Yehova u bva tshee nda ni ḓivha.
25 “Nda luvha phanḓa ha Yehova maḓuvha a 40 na vhusiku hao,+ ndo luvha nga yeneyo nḓila ngauri Yehova o vha o amba uri u ḓo ni fhelisa.
26 Nda ni pfumelela ha Yehova nda ri: ‘Iwe Yehova Murena Muvhusahoṱhe, u songo fhelisa vhathu vhau. Ndi vhathu vhau vho khetheaho,+ vhe wa vha rengulula nga vhuhulu hau, wa vha bvisa Egipita nga tshanḓa tshau tsha maanḓa.+
27 Humbula vhashumeli vhau Abrahamu, Isaka na Yakobo.+ U songo vha na ndavha na tshikhuna tsha havha vhathu, vhuvhi havho na zwivhi zwavho.+
28 Arali wa ita nga u ralo, vhathu vha shango ḽe wa ri bvisa khaḽo vha ḓo ri: “Yehova o vha a tshi khou kundelwa u vha isa kha shango ḽe a vha fhulufhedzisa ḽone, na nga nṱhani ha uri o vha a tshi vha vhenga ndi ngazwo o vha bvisa fhano uri a vha vhulaye sogani.”+
29 Ngauri ndi vhathu vhau vho khetheaho*+ vhe wa vha bvisa nga tshanḓa tshau tsha maanḓa mahulu.’+
