Dziphisalema 104:1-35
104 Kha ndi rende Yehova.+
Iwe Yehova Mudzimu wanga, u na maanḓa mahulu.+
Wo ambara vhugala* na lunako.+
2 Wo fuka tshedza+ vhunga tshiambaro;Wo ṱharamudza ḽiṱaḓulu vhunga labi ḽa dennde.+
3 U ṱoka matanda a nnḓu yawe ya nṱha maḓini,+Makole u a ita gariki yawe,+A tshimbila nṱha ha muya.+
4 U ita uri vharuṅwa vhawe vha vhe na maanḓa mahulu,Vhashumeli vhawe u vha ita sa mulilo.+
5 O thea ḽifhasi kha mitheo yaḽo;+A ḽi nga sudzuluwi vhudzuloni haḽo lini na lini.+
6 Wo ḽi fukedza nga mativha zwa nga ndi tshiambaro.+
Maḓi o fukedza dzithavha.
7 Musi u tshi a kaidza o shavha;+Musi a tshi pfa mubvumo wau o tshuwa a shavha
8 Thavha dzo takuwa,+ magovha a tsela fhasi,A ya fhethu he wa a vhetshela hone.
9 Wo a vhetshela mikano uri a si i pfuke,+Uri a si tsha tibedza ḽifhasi.
10 U rumela zwisima magovhani;*Uri zwi elele vhukati ha dzithavha.
11 Zwi ṋea zwivhanda zwoṱhe maḓi;Donngi dza ḓa dza dzimula ḓora.
12 Zwiṋoni zwi dzula henefho;Zwi imba zwi vhukati ha miri.
13 U sheledza dzithavha e nḓuni yawe ya nṱha.+
Ḽifhasi ḽi fushwa nga zwiaṋwiwa zwa mishumo yau.+
14 Kholomo u dzi melisela hatsiZwimela a zwi melisela vhathu uri vha zwi shumise,+Uri vha ṱavhe zwa u ḽa shangoni
15 Na waini i itaho uri mbilu ya muthu i takale,+Mapfura a itaho uri tshifhaṱuwo tshi penye,Zwiḽiwa* zwi fushaho mbilu ya muthu.+
16 Miri ya Yehova i a fushea nga maḓi,Miṱaululo ya Libanoni ye a i ṱavha,
17 Hune zwiṋoni zwa fhaṱa hone zwiṱaha.
Hayani ha ḽiovhelwa+ ndi mirini ya midzhunipa.
18 Thavha ndapfu ndi dza mbudzi dza thavha;+Matombo mahulu ndi vhukhudo ha dzimbila.+
19 O vhumba ṅwedzi uri u swaye tshifhinga tsho vhewaho;Ḓuvha ḽi a ḓivha zwavhuḓi uri ḽi ḓo kovhela lini.+
20 U ḓisa swiswi, ha vha vhusiku,+Phukha dzoṱhe dza ḓaka dza mona-mona.
21 Ndawana dzi a vhomba dzi tshi zwima+Musi dzi tshi ṱoḓa zwiḽiwa zwadzo zwi bvaho kha Mudzimu.+
22 Musi ḓuvha ḽi tshi ṱavha,Dzi a huma, dza lala mabakoni adzo.
23 Muthu u ya mushumoni wawe,A shuma u swika ḽi tshi kovhela.
24 Mishumo yau ndi minzhi lungafhani, Iwe Yehova!+
Wo i ita yoṱhe nga vhuṱali.+
Ḽifhasi ḽo ḓala nga zwe wa zwi sika.
25 Lwanzhe ndi luhulu nga maanḓa, lwo aṱama,Lu tshatshama zwithu zwinzhi zwi sa vhalei, zwiṱuku na zwihulwane.+
26 Zwikepe zwi tshimbila henefho,Na Liviathani*+ ḽe wa ḽi vhumba ḽi tamba khalwo.
27 Zwoṱhe zwo lindela iweUri u zwi ṋee zwiḽiwa zwazwo nga tshifhinga tshazwo.+
28 U tshi zwi ṋea zwi a kuvhanganya.+
Musi u tshi putulula tshanḓa tshau, zwi a fushwa nga zwithu zwavhuḓi.+
29 Wa dzumba tshifhaṱuwo tshau, zwi a hanganea.
Arali wa zwi dzhiela muya wazwo, zwi a fa zwa vhuyelela buseni.+
30 Arali wa ruma muya wau, zwi a vhumbea,+Wa vusulusa ḽifhasi.
31 Vhugala ha Yehova vhu ḓo dzula vhu hone lini na lini.
Yehova u ḓo takalela mishumo yawe.+
32 U lavhelesa ḽifhasi ḽa tetemela;U kwama dzithavha, dza duba vhutsi.+
33 Ndi ḓo imbela Yehova+ vhutshilo hanga hoṱhe;Ndi tshi kha ḓi tshila ndi ḓo imbela Mudzimu wanga thendo.+
34 Ngavhe zwine nda humbula zwi tshi mu takadza.
Ndi ḓo takalela Yehova.
35 Vhaitazwivhi vha ḓo ngala-ngala kha ḽifhasi,Vhavhi a vha tsha ḓo vha hone.+
Kha ndi rende Yehova. Rendani Yehova!*
Ṱhaluso dzi re magumoni a siaṱari
^ Kana “tshirunzi.”
^ Kana “miedzini.”
^ Thevhedz., “Vhurotho.”
^ Sedzani Mutevhe Wa Ṱhalutshedzo Ya Maipfi.
^ Kana “Haleluya!”
