Dziphisalema 33:1-22
33 Fhululedzani Yehova inwi no lugaho.+
Zwo tea uri vho lugaho vha mu rende.
2 Livhuwani Yehova nga haripa;Mu imbeleni thendo nga tshilidzo tshi re na ṱhale dza fumi.
3 Mu imbeleni luimbo luswa;+Lidzani tshilidzo tshi re na ṱhale nga vhutsila, ni tshi fhululedza nga dakalo.
4 Ngauri ipfi ḽa Yehova ḽo luga,+Ri nga fhulufhela zwoṱhe zwine a zwi ita.
5 U funa u luga na khaṱhulo yo teaho.+
Ḽifhasi ḽo ḓala nga lufuno lwa Yehova lu sa shanduki.+
6 Ḽiṱaḓulu ḽo itwa nga ipfi ḽa Yehova,+Na zwoṱhe zwi re khaḽo* zwo itwa nga muya* wa mulomo wawe.
7 U kuvhanganya maḓi a lwanzhe vhunga maḓi a damuni;+U vhea magabelo a lwanzhe maḓuluni.
8 Ḽifhasi ḽoṱhe nga ḽi ofhe Yehova.+
Vha dzulaho shangoni nga vha mu ofhe.
9 Ngauri o amba, zwa vha nga u ralo;+O laya, zwa ima zwo khwaṱha.+
10 Yehova o kanganyisa vhukwila* ha dzitshaka;+O thithisa maano* a vhathu.+
11 Fhedzi phetho* dza Yehova dzi ḓo dzula dzi hone lini na lini;+Zwine a humbula mbiluni yawe ndi zwa lini na lini.
12 Hu takala lushaka lune Mudzimu walwo a vha Yehova,+Vhathu vhe a vha nanga uri vha vhe vhawe.+
13 Yehova u lavhelesa fhasi e ṱaḓulu;U vhona vhana vhoṱhe vha vhathu.+
14 U sedza vhane vha dzula kha ḽifhasi,E fhethu hune a dzula hone.
15 Ndi ene muvhumbi wa mbilu dzoṱhe;U ṱolisisa mishumo yadzo yoṱhe.+
16 A hu na khosi ine ya tshidzwa nga mmbi yayo khulu;+Munna wa maanḓa ha tshidzwi nga maanḓa awe mahulu.+
17 U songo fhulufhela bere uri i u tshidze, i ḓo u fhura;+Nungo dzayo khulu a dzi khwaṱhisedzi uri u ḓo ponyoka.
18 Ḽiṱo ḽa Yehova ḽi lavhelesa vhoṱhe vhane vha mu ofha,+Vhane vha lindela lufuno lwawe lu sa shanduki,
19 Uri a vha tshidze lufuniNa u vha tshidza tshifhingani tsha nḓala.+
20 Ro lavhelela Yehova.
Ndi muthusi washu na tshiṱangu tshashu.+
21 Mbilu dzashu dzi a mu takalela,Ngauri ri fhulufhela dzina ḽawe ḽikhethwa.+
22 Iwe Yehova, ngavhe u tshi ri sumbedza lufuno lwau lu sa shanduki,+Musi ro dzula ro u lindela.+
Ṱhaluso dzi re magumoni a siaṱari
^ Thevhedz., “mavhuthu aḽo oṱhe.”
^ Kana “mufemo.”
^ Kana “mihumbulo.”
^ Kana “zwiṱuṱuwedzi.”
^ Kana “nyeletshedzo.”
