Ekisoda 16:1-36
16 Musi vho no ṱuwa Elima, tshitshavha tshoṱhe tsha Vhaisiraele tsha fheleledza tsho swika sogani ḽa Sini,+ hune ha vha vhukati ha Elima na Sinai, nga ḓuvha ḽa vhu 15 nga ṅwedzi wa vhuvhili musi vho no pfuluwa shangoni ḽa Egipita.
2 Tshitshavha tshoṱhe tsha Vhaisiraele tsha thoma u gungulela Mushe na Aroni sogani.+
3 Vhaisiraele vho vha vha tshi dzulela u amba navho vha tshi ri: “Ngavhe ri vhulawe nga tshanḓa tsha Yehova ngei shangoni ḽa Egipita he ra vha ri tshi dzula phanḓa ha bodo dza ṋama,+ he ra vha ri tshi ḽa vhurotho ra fura. Zwino no ri ḓisa fhano sogani uri tshivhidzo tshoṱhe tshi fe nga nḓala.”+
4 Yehova a amba na Mushe a ri: “Ndi ḓo ni nisela vhurotho vhu bvaho ṱaḓulu,+ muṅwe na muṅwe u fanela u bva uri a kumbele zwo mu eḓanaho ḓuvha ḽiṅwe na ḽiṅwe,+ uri ndi vha linge uri ndi vhone arali vha tshi ḓo thetshelesa mulayo wanga kana vha sa ḓo u thetshelesa.+
5 Fhedzi nga ḓuvha ḽa vhurathi+ musi vha tshi lugiselela zwe vha zwi kumbela, zwo vha zwi tshi fhira kavhili zwine vha zwi dobela nga maṅwe maḓuvha.”+
6 Mushe na Aroni vha amba na Vhaisiraele vhoṱhe vha ri: “Nga madekwana ni ḓo ḓivha uri ndi Yehova we a ni bvisa shangoni ḽa Egipita.+
7 Nga matsheloni ni ḓo vhona vhugala ha Yehova, ngauri Yehova o pfa ni tshi mu gungulela. Riṋe ri vhonnyi vhane na fanela uri gungulela?”
8 Mushe a bvela phanḓa a ri: “Musi Yehova a tshi ni ṋea ṋama ya u ḽa nga madekwana na vhurotho ha u ḽa nga matsheloni uri ni fure, ni ḓo zwi vhona uri Yehova o zwi pfa ni tshi gungula uri no vha ni tshi khou gungulela ene. Fhedzi riṋe ri vhonnyi? A ni khou gungulela riṋe, fhedzi ni khou gungulela Yehova.”+
9 Mushe a amba na Aroni a ri: “Vhudza tshitshavha tshoṱhe tsha Isiraele u ri: ‘Sendelani tsini na Yehova, ngauri o pfa u gungula haṋu.’”+
10 Musi Aroni a tshi tou fhedza u amba na tshitshavha tshoṱhe tsha Isiraele, vha rembuluwa vha sedza thungo ya sogani, vhugala ha Yehova ha vhonala kha gole.+
11 Yehova a dovha a amba na Mushe a ri:
12 “Ndo pfa u gungula ha Vhaisiraele.+ Vha vhudze uri: ‘Nga madekwana* ni ḓo ḽa ṋama, nga matsheloni ni ḓo ḽa vhurotho na fura;+ ndi hone ni tshi ḓo ḓivha uri ndi nṋe Yehova Mudzimu waṋu.’”+
13 Nga eneo madekwana ha ḓa khwali dza ḓala henefho madenndeni,+ nga matsheloni ha vha na ṅwando u mona na madennde oṱhe.
14 Musi ṅwando u tshi fhufha, ho vha hu na thoro fhasi dzi ngaho mahaḓa henefho sogani.+
15 Musi Vhaisiraele vha tshi zwi vhona, vha vhudzisana nga tshavho vha ri: “Ndi mini zwenezwi?” Ngauri vho vha vha sa ḓivhi uri ho vha hu mini. Mushe a amba navho a ri: “Ndi vhurotho he Yehova a ni ṋea hone uri vhu vhe zwiḽiwa zwaṋu.+
16 Yehova o laya a ri: ‘Muṅwe na muṅwe u fanela u dobela u ya nga zwine a nga kona u zwi ḽa. Muthu muṅwe na muṅwe a dobele zwine zwa nga lingana muelo* wa omere+ u ya nga tshivhalo tsha vhathu tshine muṅwe na muṅwe a vha natsho denndeni ḽawe.’”
17 Vhaisiraele vha thoma u ita nga u ralo; vha zwi dobela, vhaṅwe vha dobela zwinzhi, vhaṅwe vha dobela zwiṱuku.
18 Musi vha tshi zwi kala nga muelo wa omere, we a dobela zwinzhi ho ngo vha na zwinzhi-zwinzhi, we a dobela zwiṱuku ho ngo ṱahelelwa.+ Muṅwe na muṅwe o dobela u ya nga zwine a nga kona u zwi ḽa.
19 Mushe a amba navho a ri: “Hu songo vha na ane a zwi siela matshelo.”+
20 Fhedzi a vho ngo thetshelesa Mushe. Musi vhaṅwe vhathu vha tshi zwi siela matshelo, zwa bva mbungu zwa nukha, Mushe a vha sinyutshela.
21 Vho vha vha tshi zwi dobela nga matsheloni maṅwe na maṅwe, muṅwe na muṅwe o vha tshi dobela zwine a nga kona u zwi ḽa. Musi ḓuvha ḽi tshi vho fhisa zwo vha zwi tshi ṋoka.
22 Nga ḓuvha ḽa vhurathi vho vha vha tshi dobela honoho vhurotho luvhili,+ muṅwe na muṅwe o vha a tshi dobela mielo mivhili ya omere. Ngauralo, vharangaphanḓa vhoṱhe vha tshitshavha vha ḓa vha zwi vhudza Mushe.
23 A amba navho a ri: “Hezwi ndi zwe Yehova a amba. Matshelo ḽi ḓo vha ḽi ḓuvha ḽa u awela tshoṱhe,* ndi savhatha khethwa ya Yehova.+ Bakani zwine na ṱoḓa u baka, ni vholomise zwine na ṱoḓa u zwi vholomisa;+ vheani tshiṅwe na tshiṅwe tsho salaho u swika nga matsheloni a ḓuvha ḽi tevhelaho.”
24 Vha zwi vhea u swika nga matsheloni a ḓuvha ḽi tevhelaho, sa zwe Mushe a vha laya, zwi si nukhe, zwi si bve mbungu.
25 Mushe a ri: “Zwi ḽeni ṋamusi, ngauri ṋamusi ndi savhatha ya Yehova. Ni nga si zwi wane fhasi ṋamusi.
26 Ni zwi dobele maḓuvha a rathi, fhedzi nga ḓuvha ḽa vhusumbe, ndi Savhatha,+ hu ḓo vha hu si na tshithu.”
27 Naho zwo ralo, nga ḓuvha ḽa vhusumbe vhaṅwe vho bva vha tshi ya u zwi dobela, fhedzi vha si wane tshithu.
28 Yehova a amba na Mushe a ri: “Ni ḓo litsha lini u pfuka ndaela dzanga na milayo yanga?+
29 Ni ṱhogomele uri Yehova o ni ṋea Savhatha.+ Ndi ngazwo a tshi khou ni ṋea vhurotho ha maḓuvha mavhili nga ḓuvha ḽa vhurathi. Muṅwe na muṅwe a dzule hune a vha hone; hu songo vha na muthu ane a bva hune a dzula hone nga ḓuvha ḽa vhusumbe.”
30 Vhathu vha tevhedza mulayo wa Savhatha* nga ḓuvha ḽa vhusumbe.+
31 Vha nnḓu ya Isiraele vha vhidza honoho vhurotho uri ndi “mana.”* Zwo vha zwo tshena sa mbeu ṱhukhu, zwi tshi ḓifha sa khekhe dzi re na mutoli.+
32 Nga zwenezwo, Mushe a ri: “Yehova o laya a ri: ‘Ḓadzani muelo wa omere ni u vhulungele mirafho yaṋu,+ uri vha vhone vhurotho he nda ni ṋea hone sogani musi ndi tshi ni bvisa shangoni ḽa Egipita.’”
33 Mushe a amba na Aroni a ri: “Dzhia mvuvhelo u shele muelo wa omere wa mana khayo, u i vhee phanḓa ha Yehova sa tshithu tshine tsha tea u humbulwa nga mirafho yoṱhe.”+
34 Vhunga Yehova o laya Mushe, Aroni a u vhea phanḓa ha Vhuṱanzi*+ uri u vhulungwe.
35 Vhaisiraele vho ḽa mana miṅwaha ya 40,+ u swika vha tshi dzhena shangoni ḽine ha dzulwa khaḽo.+ Vho ḽa mana vha vhuya vha swika mukanoni wa shango ḽa Kanana.+
36 Muelo wa omere ndi tshipiḓa tshithihi kha zwa fumi tsha muelo wa tshikalo tsha efa.*
Ṱhaluso dzi re magumoni a siaṱari
^ Thevhedz., “Vhukati ha madekwana mavhili.”
^ Ḽithara dzi ṱoḓaho u vha 2,2. Sedzani Ṱhume. B14.
^ Kana “u pembelela savhatha.”
^ Kana “Vhathu vha awela.”
^ Khamusi ḽi bva kha mubulo wa Tshihevheru une wa ri “Ndi mini zwenezwi?”
^ Ipfi “Vhuṱanzi” hafha zwi vhonala ḽi tshi ambela kha bogisi ḽa u vhulunga maṅwalo a ndeme.
^ Efa i lingana na ḽithara dza 22. Sedzani Ṱhume. B14.
