Ekisoda 19:1-25
19 Nga ṅwedzi wa vhuraru musi Vhaisiraele vho no bva shangoni ḽa Egipita, vha swika sogani ḽa Sinai nga ḽeneḽo ḓuvha.
2 Vha takuwa Rafidima+ vha dzhena sogani ḽa Sinai, vha atha madennde henefho sogani. Vhaisiraele vha dzula henefho vho livhana na thavha.+
3 Mushe a gonya thavhani+ uri a ambe na Mudzimu wa ngoho, Yehova a amba nae a ri: “Zwine wa fanela u vhudza vha nnḓu ya Yakobo, vhane vha vha vhana vha Isiraele ndi hezwi,
4 ‘No zwi vhona zwe nda ita Vhaegipita,+ uri ndi ni hwale nga phapha dza goni ndi ni ḓise phanḓa hanga.+
5 Arali na thetshelesa zwavhuḓi zwine nda zwi amba na tevhedza mulanga wanga, ni ḓo vha vhathu vhanga vho khetheaho kha vhathu vhoṱhe,+ ngauri ḽifhasi ḽoṱhe ndi ḽanga.+
6 Ni ḓo vha muvhuso wa vhotshifhe na lushaka lukhethwa.’+ Ndi zwone zwine wa fanela u vhudza Vhaisiraele.”
7 Mushe a ya a vhidza vhahulwane a vha vhudza enea mafhungo oṱhe e a vhudzwa one nga Yehova.+
8 Nga murahu ha zwenezwo, vhathu vhoṱhe vha fhindula nga khathihi vha ri: “Zwoṱhe zwe Yehova a zwi amba ro ḓiimisela u zwi ita.”+ Nga u ṱavhanya Mushe a vhudza Yehova zwe vhathu vha amba.
9 Yehova a amba na Mushe a ri: “Ndi ḓa kha iwe ndi kha gole ḽitswu, uri vhathu vha pfe musi ndi tshi amba na iwe, na uri vha dzule vha tshi u fhulufhela tshifhinga tshoṱhe.” Mushe a vhudza Yehova zwe vhathu vha amba.
10 Yehova a amba na Mushe a ri: “Iya ha vhathu u vha vhudze uri vha ḓikunakise ṋamusi na matshelo, vha kuvhe zwiambaro zwavho.
11 Vha fanela u ḓilugiselela ḓuvha ḽa vhuraru, ngauri nga ḓuvha ḽa vhuraru Yehova u ḓo tsela thavhani ya Sinai vhathu vhoṱhe vha tshi zwi vhona.
12 U vhetshele vhathu mikano thungo dzoṱhe, u vha vhudze uri: ‘Vha ṱhogomele uri vha si ye thavhani kana u sendela tsini nayo. Ane a sendela tsini na thavha u ḓo vhulawa.
13 Hu songo vha na ane a mu kwama, fhedzi u ḓo tou kanḓwa nga matombo kana u pfulwa nga misevhe. A hu na tshine tsha ḓo tshila hu sa londwi uri ndi muthu kana ndi tshifuwo.’+ Musi hu tshi lidzwa luṋanga+ lwa thutha vhathu vha gonye thavhani.”
14 Mushe a tsa thavhani a ya kha vhathu, a thoma u kunakisa vhathu; vha kuvha zwiambaro zwavho.+
15 Ngauralo, Mushe a amba na vhathu a ri: “Ḓilugiseleni ḓuvha ḽa vhuraru. Ni songo ita zwa vhudzekani.”*
16 Nga matsheloni a ḓuvha ḽa vhuraru ha vha na mibvumo na dziphenyo, ha vha na gole ḽitswu-ḽitswu thavhani,+ ha pfala luṋanga lu tshi khou lilela nṱha, vhathu vhoṱhe vha re madenndeni vha thoma u tetemela.+
17 Mushe a bvisa vhathu madenndeni uri vha ye u ṱangana na Mudzimu wa ngoho, vha ya vha ima fhasi ha thavha.
18 Thavha yoṱhe ya Sinai ya vha na mutsi, ngauri Yehova o vha o tsela khayo e kha mulilo;+ mutsi wayo wo vha u tshi khou duba sa wa honndo, thavha yoṱhe yo vha i tshi khou dzinginyea zwihulu.+
19 Musi mubvumo wa luṋanga u tshi khou ḓi bvela phanḓa u tshi lilela nṱha, Mushe a amba, a fhindulwa nga ipfi ḽa Mudzimu wa ngoho.
20 Yehova a tsela Thavhani ya Sinai kha ṱhodzi yayo. Ngauralo, Yehova a vhidza Mushe e kha ṱhodzi ya thavha, Mushe a gonya.+
21 Yehova a amba na Mushe a ri: “Tsela fhasi u vhudze vhathu uri vha songo lingedza u sendela tsini uri vha vhone Yehova, ngauri arali vha ita nga u ralo vhunzhi havho vha ḓo fa.
22 Vhotshifhe vhane vha sendela tsini na Yehova tshifhinga tshoṱhe vha ḓikunakise, uri Yehova a sa ḓo vha pfisa vhuṱungu.”+
23 Mushe a amba na Yehova a ri: “Vhathu vha nga si kone u gonya Thavha ya Sinai, ngauri wo no ḓi ri vhudza wa ri: ‘Vhea mikano u mona na thavha u i ite uri i vhe khethwa.’”+
24 Naho zwo ralo, Yehova a amba nae a ri: “Tsela fhasi, u dovhe u gonye u na Aroni; fhedzi u songo tendela vhotshifhe na vhathu vha tshi kombetshedza u ḓa ha Yehova uri ndi sa ḓo vha vhulaya.”+
25 Mushe a tsa a ya kha vhathu a vha vhudza zwenezwo.
Ṱhaluso dzi re magumoni a siaṱari
^ Thevhedz., “Ni songo sendela tsini na mufumakadzi.”
