Ekisoda 26:1-37
26 “U ite dennde ḽikhethwa*+ nga malabi a fumi avhuḓi a ḽinene o lukwaho nga harane ya muvhala wa lutombo, wuḽu ya phephulu na labi ḽitswuku. U rungelele na zwifanyiso zwa vhakerube.+
2 Vhulapfu ha labi ḽiṅwe na ḽiṅwe vhu fanela u vha khubithi* dza 28, vhuphara haḽo vhu vhe khubithi dza 4. Malabi oṱhe a fanela u vha na muelo u fanaho.+
3 Malabi maṱanu a ṱumekanywe a vhe labi ḽithihi, maṅwe malabi maṱanu na one a ṱumekanywe a vhe labi ḽithihi.
4 U ite mapfundo nga harane ya muvhala wa lutombo kha lupendelo lwa labi ḽithihi ḽa u fhedzisela ḽa ayo maṅwe; u fanela u ita zwi fanaho na kha lupendelo lwa maṅwe malabi hune a ḓo ṱanganyiswa hone.
5 U ite mapfundo a 50 kha labi ḽithihi, kha ḽiṅwe labi u ite mapfundo a 50 uri a livhane hune ha ṱumetshedzwa hone.
6 U ite zwihovhi zwa 50 nga musuku, u ṱanganye eneo malabi nga zwenezwo zwihovhi, hu fhaṱwe dennde ḽikhethwa ḽithihi.+
7 “U ite na malabi nga mamvele a mbudzi+ a u fulela dennde ḽikhethwa. U ite malabi a 11.+
8 Labi ḽiṅwe na ḽiṅwe ḽi fanela u vha ḽa vhulapfu ha khubithi dza 30, vhuphara haḽo vhu vhe khubithi dza 4. Malabi oṱhe a 11 a fanela u vha na muelo u fanaho.
9 U ṱanganye malabi maṱanu, u ṱanganye na maṅwe malabi a rathi, ḽa vhurathi u ḽi pete phanḓa ha dennde.
10 U ite mapfundo a 50 kha lupendelo lwa labi ḽithihi, kha maṅwe malabi o ṱanganywaho, u ite mapfundo a 50 kha lupendelo lwa labi kha iṅwe thungo hune a ṱangana hone.
11 U ite zwihovhi zwa 50 nga koporo, u vhee zwenezwo zwihovhi kha mapfundo, u ṱanganye eneo malabi uri a vhe tshithu tshithihi.
12 Tshipiḓa tsho salaho tsha malabi a dennde tshi ḓo kapeiwa. Tshiṅwe tshipiḓa tsha labi ḽo nembelelaho tshi ḓo kapeiwa nga murahu ha dennde ḽikhethwa.
13 Malabi o nembelelaho o tibedzaho dennde a ḓo kapeiwa a vha khubithi nthihi matungo oṱhe a dennde ḽikhethwa.
14 “U tibedze dennde nga mikumba ya thutha yo daiwaho nga muvhala mutswuku, nga nṱha hawo u tibedze nga mikumba ya tshiphu.+
15 “U ite fureme dza mabulannga+ dza dennde ḽikhethwa nga thanda dza muunga, dzi ime dzi tou tswii.+
16 Fureme iṅwe na iṅwe ya mabulannga, u ya nṱha i fanela u vha vhulapfu ha khubithi dza fumi, vhuphara hayo vhu vhe khubithi na hafu.
17 Fureme iṅwe na iṅwe ya mabulannga i vhe na mikungelo mivhili yo ṱumanaho. Yeneyo ndi nḓila ine wa fanela u ita ngayo fureme dzoṱhe dza mabulannga dza dennde ḽikhethwa.
18 U ite fureme dza mabulannga dza 20 dza thungo ya tshipembe ha dennde ḽikhethwa dzo lavhelesa tshipembe.
19 “U ite milenzhe+ ya 40 ya siḽiva nga fhasi ha fureme dza mabulannga dza 20; milenzhe mivhili nga fhasi ha fureme nthihi ya mabulannga u itela mikungelo yayo mivhili na milenzhe mivhili nga fhasi ha fureme iṅwe na iṅwe ya mabulannga u itela mikungelo yayo mivhili.+
20 Kha iṅwe thungo ya dennde ḽikhethwa, thungo ya devhula, u ite fureme dza mabulannga dza 20,
21 milenzhe yayo ya 40 ya siḽiva, milenzhe mivhili nga fhasi ha fureme nthihi ya mabulannga na milenzhe mivhili nga fhasi ha fureme iṅwe na iṅwe ya mabulannga.
22 Nga murahu ha dennde ḽikhethwa thungo ya vhukovhela u ite fureme dza mabulannga dza rathi.+
23 U ite fureme mbili dza mabulannga kha thungo mbili dza dennde ḽikhethwa dzi re nga murahu.
24 Dzi fanela u vha mbili u bva fhasi u ya nṱha, u swika kha rinngi ya u thoma. Zwenezwi zwi fanela u itwa kha vhuvhili hadzo, dzenedzi fureme dzi ḓo tika thungo mbili dza dennde ḽikhethwa dzi re nga murahu.
25 Hu fanela u vha na fureme dza mabulannga dza malo na milenzhe yadzo ya 16 ya siḽiva, hu fanela u vha na milenzhe mivhili nga fhasi ha fureme nthihi ya mabulannga na milezhe mivhili kha fureme ya mabulannga iṅwe na iṅwe ine ya tevhela.
26 “U ite mbalelo nga thanda dza muunga, ṱhanu dzi ḓo vha dza u ita fureme dza mabulannga kha iṅwe thungo ya dennde ḽikhethwa,+
27 hu vhe na mbalelo ṱhanu dza u ita fureme dza mabulannga kha iṅwe thungo ya dennde ḽikhethwa na mbalelo ṱhanu dza fureme dza mabulannga kha iṅwe thungo ya dennde ḽikhethwa nga murahu nga thungo ya vhukovhela.
28 Luvhalelo lwa vhukati lune lwa pfuka nga vhukati ha fureme dza mabulannga lu fanela u lapfa u bva magumoni u swika kha maṅwe magumo.
29 “U ḓodze fureme dza mabulannga nga musuku,+ rinngi yadzo u dzi ite nga musuku dzi vhe rinngi dza u fara mbalelo, u ḓodze dzenedzo mbalelo nga musuku.
30 U ite dennde ḽikhethwa u tshi tevhedza pulane yaḽo ye wa sumbedzwa yone thavhani.+
31 “U ite khetheni+ nga harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho. Ḽi fanela u rungelelwa na zwifanyiso zwa vhakerube.
32 U ḽi nembeledze kha phuphu nṋa dzo itwaho nga muunga dzo ḓodziwaho musuku. Zwihovhi zwa hone zwi fanela u vha zwa musuku. Phuphu dzi fanela u dzhena kha milenzhe miṋa ya siḽiva.
33 U nembeledze khetheni nga fhasi ha zwihovhi, u ḓise mbulungelo ya mulanga*+ henefho nga ngomu ha khetheni. Ḽeneḽo khetheni ḽi ḓo ni fhandekanyela fhethu Hukhethwa+ na fhethu Hukhethwa-khethwa.+
34 U tibe mbulungelo ya mulanga* i re fhethu Hukhethwa-khethwa.
35 “U vhee ṱafula nga nnḓa ha khetheni, tshiṱomambone+ tsho livhanaho na ṱafula tshi vhe nga thungo ya tshipembe ha dennde ḽikhethwa; u i vhee thungo ya devhula.
36 U ite labi* ḽa u vala muṋango wa dennde nga harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho, u ya nga nḓila ine muluki a luka ngayo.+
37 Ḽeneḽo labi* ḽa u vala u ḽi itele phuphu ṱhanu dzo itwaho nga muunga, u dzi ḓodze musuku. Na zwihovhi zwa hone zwi fanela u vha zwa musuku, u zwi itele milenzhe miṱanu ya koporo.
Ṱhaluso dzi re magumoni a siaṱari
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Khubithi nthihi i lingana na senthimithara dza 44,5. Sedzani Ṱhume. B14.
^ Thevhedz., “mbulungelo i re na zwine zwa vha vhuṱanzi.”
^ Thevhedz., “mbulungelo i re na zwine zwa vha vhuṱanzi.”
^ Kana “khetheni.”
^ Kana “khetheni.”
