Esera 1:1-11
1 Nga ṅwaha wa u thoma hu tshi khou vhusa Korese+ khosi ya Peresia, Yehova a ita uri hu itee zwe a zwi amba a tshi shumisa Yeremia,+ Yehova a ṱuṱuwedza Khosi Korese wa Peresia uri a ḓivhadze muvhusoni wawe woṱhe, a dovhe a ṅwale+ uri:
2 “Khosi Korese wa Peresia u ri: ‘Yehova Mudzimu wa ṱaḓulu o nṋea mivhuso yoṱhe ya kha ḽifhasi,+ o nndaedza uri ndi mu fhaṱele nnḓu ngei Yerusalema,+ kha ḽa Yuda.
3 Ndi nnyi kha inwi a re muṅwe wa vhathu vhawe? Onoyo nga a ye Yerusalema, kha ḽa Yuda, Mudzimu wawe a vhe nae. A fhaṱulule nnḓu ya Yehova Mudzimu wa Isiraele, ndi ene Mudzimu wa ngoho we nnḓu yawe ya vha i Yerusalema.*
4 Muṅwe na muṅwe a re mutsinda,+ hu sa londwi hune a vha hone, vhahura vhawe nga vha mu thuse nga u mu ṋea siḽiva na musuku, thundu na zwifuwo, khathihi na tshifhiwa tsha u ḓifunela hu u itela nnḓu ya Mudzimu wa ngoho,+ ye ya vha i Yerusalema.’”
5 Ngauralo, vharangaphanḓa vha miṱa ya vhokhotsi avho vha Vhayuda na vha Vhabenyamini, vhotshifhe na Vhalevi, vhoṱhe vhe vha ṱuṱuwedzwa nga muya wa Mudzimu wa ngoho, vha lugiselela u ya u fhaṱulula nnḓu ya Yehova, ye ya vha i Yerusalema.
6 Vhoṱhe vho dzulaho tsini navho vha tikedza nga u vha ṋea zwishumiswa zwa siḽiva na zwa musuku, thundu, zwifuwo na zwithu zwa mutengo muhulu, hu sa vhalwi zwifhiwa zwa u ḓifunela.
7 Khosi Korese na ene a bvisa thundu dza nḓuni ya Yehova dze Nebukadanetsara a vha o dzi thuba ngei Yerusalema dza vhewa nḓuni ya mudzimu wawe.+
8 Korese khosi ya Peresia a dzi bvisa nga fhasi ha vhulivhisi ha Mithiridatha mufaragwama, onoyo a dzi vhalela Sheshebatsara*+ murangaphanḓa wa Yuda.
9 Tshivhalo tshadzo ndi hetshi: midzio ya musuku ya 30 ine ya fana na mimanngi, midzio ya siḽiva ya 1 000 ine ya fana na mimanngi na miṅwe midzio ya 29,
10 zwigoḓelo zwiṱuku zwa 30 zwa musuku, zwigoḓelo zwiṱuku zwa 410 zwa siḽiva na dziṅwe thundu dza 1 000.
11 Thundu dzoṱhe dza musuku na dza siḽiva dzo vha dzi 5 400. Sheshebatsara o ḓa nadzo dzoṱhe musi mathubwa+ a tshi bva Babele a tshi vhuyelela Yerusalema.
Ṱhaluso dzi re magumoni a siaṱari
^ Kana khamusi, “ane a vha Yerusalema.”
