Esera 7:1-28
7 Nga murahu ha zwenezwo zwithu, tshifhingani tsha vhuhosi ha Arithasasitha+ khosi ya Peresia, Esera*+ a vhuya. O vha e murwa wa Seraya,+ murwa wa Asaria, murwa wa Hilikia,+
2 murwa wa Shalumu, murwa wa Tsadoko, murwa wa Ahitobo,
3 murwa wa Amaria, murwa wa Asaria,+ murwa wa Merayothe,
4 murwa wa Zeraya, murwa wa Usi, murwa wa Buki,
5 murwa wa Abishua, murwa wa Finiasi,+ murwa wa Eliasara,+ murwa wa Aroni+ muhulwane wa vhotshifhe.
6 Onoyo Esera o vha a tshi bva Babele. O vha e mukopololi* a tshi ḓivha zwavhuḓi* Mulayo wa Mushe,+ we wa ṋewa nga Yehova Mudzimu wa Isiraele. Khosi yo mu ṋea zwoṱhe zwe a humbela, ngauri tshanḓa tsha Yehova Mudzimu wawe tsho vha tshi nae.
7 Vhaṅwe Vhaisiraele, vhotshifhe, Vhalevi,+ vhaimbi,+ vhalindakhoro+ na vhashumi vha thembeleni,*+ vha ya Yerusalema nga ṅwaha wa vhusumbe wa Khosi Arithasasitha.
8 Esera a swika Yerusalema nga ṅwedzi wa vhuṱanu, nga ṅwaha wa vhusumbe wa vhuhosi ha yeneyo khosi.
9 Nga ḓuvha ḽa u thoma ḽa ṅwedzi wa u thoma, a fara lwendo lwa u bva Babele a swika Yerusalema nga ḓuvha ḽa u thoma ḽa ṅwedzi wa vhuṱanu, ngauri tshanḓa tshavhuḓi tsha Mudzimu wawe tsho vha tshi nae.+
10 Esera o vha o lugiselela mbilu yawe* uri a ṱoḓe Mulayo wa Yehova na u u tevhedza,+ uri a funze maitele na mahaṱulele awo kha ḽa Isiraele.+
11 Vhurifhi he Khosi Arithasasitha a vhu ṋea tshifhe Esera ane a vha mukopololi* na muḓivhi wa maitele a Yehova na ndaela dze a ṋea Vhaisiraele ndi hovhu:
12 “Arithasasitha,+ khosi ya mahosi u ṅwalela tshifhe Esera, mukopololi wa Mulayo wa Mudzimu wa ṱaḓulu: Ngavhe u tshi vha na mulalo.
13 Zwino ndi khou laedza uri muṅwe na muṅwe wa muvhusoni wanga wa vhathu vha Isiraele na vhotshifhe vhavho na Vhalevi ane a ṱoḓa u ya Yerusalema na iwe, nga a ṱuwe.+
14 Ngauri wo rumiwa nga khosi na vhaeletshedzi vhayo vha sumbe uri u ṱoḓisise arali Mulayo wa Mudzimu wau, une wa u ḓivha, u tshi khou tevhedzwa ngei Yuda na Yerusalema,
15 na uri u dzhie siḽiva na musuku zwe khosi na vhaeletshedzi vhayo vha zwi ṋea Mudzimu wa Isiraele nga u ḓifunela, ane a dzula ngei Yerusalema,
16 na siḽiva yoṱhe na musuku zwine wa zwi wana mavunduni oṱhe a* Babele, u katela na tshifhiwa tshine vhathu na vhotshifhe vha tshi ṋekedza nnḓu ya Mudzimu wavho nga u ḓifunela, ine ya vha ngei Yerusalema.+
17 Nga yeneyi tshelede u tea u ṱavhanya wa renga mboho,+ thutha,+ ngwana+ khathihi na zwifhiwa zwazwo zwa thoro+ na zwifhiwa zwazwo zwa u nwiwa,+ u zwi ṋekedze kha aḽeṱare ya nnḓu ya Mudzimu wau ngei Yerusalema.
18 “Zwine zwa vhonala zwi zwavhuḓi kha iwe na kha vhahau u zwi ite, u nga shumisa siḽiva na musuku zwo salaho, u ya nga hune Mudzimu wau a zwi funa ngaho.
19 Midzio yoṱhe ye wa ṋewa uri u i shumise nḓuni ya Mudzimu wau, u i ise phanḓa ha Mudzimu ngei Yerusalema.+
20 Zwiṅwe zwoṱhe zwine zwa ṱoḓea nḓuni ya Mudzimu wau zwine wa tea u zwi ṋea, u zwi dzhie mbulungeloni ya musanda.+
21 “Nṋe Khosi Arithasasitha, ndi khou ṋea ndaela vhoṱhe vhane vha ṱhogomela mbulungelo dza dzinguni ḽa Seli ha Mulambo,* uri zwoṱhe zwine tshifhe Esera,+ mukopololi wa Mulayo wa Mudzimu wa ṱaḓulu, a zwi humbela kha inwi zwi itwe nga u ṱavhanya,
22 ni songo fhirisa talente* dza 100 dza siḽiva, koro* dza 100 dza goroi, nkho* dza 100 dza waini,+ nkho dza 100 dza mapfura+ na muṋo+ munzhi.
23 Zwoṱhe zwine zwa laedzwa nga Mudzimu wa ṱaḓulu zwi itwe nga u fhisetshela nnḓu ya Mudzimu wa ṱaḓulu,+ uri hu si sinyutshelwe muvhuso wa khosi na vharwa vhayo.+
24 U khou dovha wa eletshedzwa uri a zwo ngo tendelwa u bvisisa muthelo naho u ufhio, nduvho+ kana muthelo wa u tendelwa u fhira kha vhotshifhe na kha Vhalevi, vhaimbi,+ vhalindi vha miṋango, vhashumi vha thembeleni*+ na vhashumi vha nḓuni yeneyi ya Mudzimu.
25 “Iwe Esera, u ya nga vhuṱali he wa vhu wana kha Mudzimu, vhea vhomadzhisiṱaraṱa na vhahaṱuli uri vha haṱule vhathu vhoṱhe vha dzingu ḽa Seli ha Mulambo, vhoṱhe vhane vha ḓivha milayo ya Mudzimu wau; vha fanela u gudisa vha sa i ḓivhi.+
26 Ane a si tevhedze Mulayo wa Mudzimu wau na mulayo wa khosi a haṱulwe nga u ṱavhanya, hu sa londwi uri ndi nga u vhulawa, u pandelwa, u lifhiswa kana nga u valelwa dzhele.”
27 Ngavhe Yehova Mudzimu wa vhomakhulukuku washu we a ṱuṱuwedza mbilu ya khosi uri i nakise nnḓu ya Yehova ngei Yerusalema+ a tshi rendwa!
28 O ntsumbedza lufuno lu sa shanduki phanḓa ha khosi+ na vhaeletshedzi vhayo+ na vhaḓinḓa vhoṱhe vhahulwane vha khosi vha re na maanḓa. Ndo vha na tshivhindi* ngauri tshanḓa tsha Yehova Mudzimu wanga tsho vha tshi na nṋe, nda kuvhanganya vharangaphanḓa vha Isiraele uri vha ṱuwe na nṋe.
Ṱhaluso dzi re magumoni a siaṱari
^ Zwine zwa amba uri “Thuso.”
^ Kana “wa maṅwalo.”
^ Kana “O vha e mukopololi a re na vhutsila kha.”
^ Kana “Vhanethinimu.” Thevhedz., “vho kumedzwaho.”
^ Kana “o ḓiimisela mbiluni yawe.”
^ Kana “wa maṅwalo.”
^ Kana “wana zwiṱirikini zwoṱhe zwi re na maanḓa zwa.”
^ Kana “Yufuratha.”
^ Talente i lingana na khilogramu dza 34,2. Sedzani Ṱhume. B14.
^ Nga Tshihevheru ndi “bathi,” ine ya lingana na ḽithara dza 22. Sedzani Ṱhume. B14.
^ Koro nthihi i lingana na ḽithara dza 220. Sedzani Ṱhume. B14.
^ Kana “Vhanethinimu.” Thevhedz., “vho kumedzwaho.”
^ Kana “Ndo ḓikhwaṱhisa.”
