Esera 8:1-36
8 Vharangaphanḓa vha miṱa ya vhokhotsi na mutevhe wa lushaka lwa vhe vha bva na nṋe Babele tshifhingani tsha vhuhosi ha Khosi Arithasasitha+ ndi havha:
2 kha vharwa vha Finiasi+ ndi Gerisomi; kha vharwa vha Ithamara+ ndi Daniele; kha vharwa vha Davida ndi Hatusi;
3 kha vharwa vha Shekanya na vha Pareosi ndi Sakaria, vhe vha ṅwaliswa vhe nae ndi vhanna vha 150;
4 kha vharwa vha Phahathi-moaba+ ndi Elihoenai murwa wa Zeraya, e na vhanna vha 200;
5 kha vharwa vha Sathu+ na vha Shekanya murwa wa Yahasiele, e na vhanna vha 300;
6 kha vharwa vha Adini+ ndi Ebede murwa wa Yonathani, e na vhanna vha 50;
7 kha vharwa vha Elamu,+ Yeshaya murwa wa Athalia, e na vhanna vha 70;
8 kha vharwa vha Shefatia,+ Sebadiya murwa wa Mikaele, e na vhanna vha 80;
9 kha vharwa vha Yoaba, Obadia murwa wa Yehiele, e na vhanna vha 218;
10 kha vharwa vha Bani, Selomithi murwa wa Yosifia, e na vhanna vha 160;
11 kha vharwa vha Bebai,+ Sakaria murwa wa Bebai, e na vhanna vha 28;
12 kha vharwa vha Asigada,+ Yohanani murwa wa Hakatani, e na vhanna vha 110;
13 kha vharwa vha Adonikamu,+ vho salaho, madzina avho ndi: Eliphelete, Yeiele na Shemaya, vhe na vhanna vha 60;
14 kha vharwa vha Bigivai,+ ho vha hu Uthai na Sabudu, vhe na vhanna vha 70.
15 Nda vha kuvhanganya mulamboni une wa elela u tshi ya Ahava,+ ra atha madennde henefho maḓuvha mararu. Fhedzi musi ndi tshi sedzulusa vhathu na vhotshifhe, nda wana Vhalevi vhe siho.
16 Nga zwenezwo, nda ruma vhathu uri vha vhidze Eliesere, Ariele, Shemaya, Elinathani, Yaribi, Elinathani, Nathani, Sakaria na Meshulamu, vha re vharangaphanḓa na Yoyaribi na Elinathani vhane vha funza.
17 Nda vha laya uri vha ye kha murangaphanḓa Ido fhethu hune ha pfi Kesifiya. Nda vha vhudza uri vha vhudze Ido na vhahawe, vhashumi vha thembeleni* vha re ngei Kesifiya, uri vha ri ḓisele vhaḓinḓa nḓuni ya Mudzimu washu.
18 Samusi tshanḓa tsha Mudzimu washu tsha vhuthu tsho vha tshi na riṋe, vha ri ḓisela munna o ṱalifhaho kha vharwa vha Mahali+ muḓuhulu wa Levi murwa wa Isiraele, ho vha hu Sherebia+ na vharwa vhawe na vhahawe, vho vha vhe vhanna vha 18;
19 na Hasabia khathihi na Yeshaya a bvaho kha lushaka lwa Merari,+ vhahawe na vharwa vhawe, vho vha vhe vhanna vha 20.
20 Ho vha hu na vhashumi vha thembeleni* vha 220, vhe Davida na vhakololo vha vha vhea uri vha shumele Vhalevi, vhoṱhe vho vha vho vhewa u ya nga madzina avho.
21 Henefho mulamboni wa Ahava nda ḓivhadza uri ri ḓidzime zwiḽiwa, ri ḓiṱukufhadze kha Mudzimu washu, ri ṱoḓe vhulivhisi khae musi ri lwendoni lwashu, u itela riṋe na vhana vhashu na thundu yashu yoṱhe.
22 Ndo vha ndi tshi shona u humbela khosi uri i ri ṋee maswole na vhaṋameli vha bere uri vha ri tsireledze kha maswina nḓilani, ngauri ro vha ro vhudza khosi uri: “Tshanḓa tsha Mudzimu washu tsha vhuthu tshi kha ane a mu ṱoḓa,+ fhedzi maanḓa awe na mbiti dzawe zwi kha vhane vha mu ṱutshela.”+
23 Ra ḓidzima zwiḽiwa, ra humbela Mudzimu washu nga ha zwenezwo, a thetshelesa zwine ra humbela.+
24 Nda nanga vhahulwane vha vhotshifhe vha 12, vhane vha vha Sherebia na Hasabia+ na vhahavho vha fumi.
25 Nda vha kalela siḽiva na musuku na zwishumiswa, miṋeelo ye khosi na vhaeletshedzi vhayo na vharangaphanḓa vhayo na Vhaisiraele vhoṱhe vha re henefho vha i bvisela nnḓu ya Mudzimu washu.+
26 Nda vha kalela zwanḓani zwavho talente* dza siḽiva dza 650 na zwishumiswa zwa siḽiva zwa 100 zwa tshileme tsha talente mbili, talente dza 100 dza musuku,
27 zwigoḓelo zwiṱuku zwa musuku zwa 20 zwine mutengo wazwo wa vha dariki* dza 1 000, zwishumiswa zwivhili zwa koporo yavhuḓi tswuku i penyaho ine ya tamisa sa musuku.
28 Nda amba navho nda ri: “Ni vhakhethwa kha Yehova+ na zwishumiswa ndi zwikhethwa, siḽiva na musuku ndi zwifhiwa zwa u ḓifunela zwa Yehova Mudzimu wa vhomakhulukuku waṋu.
29 Ni zwi linde nga vhuronwane u vhuya u swika ni tshi zwi kala phanḓa ha vhahulwane vha vhotshifhe na Vhalevi na vhakololo vha miṱa ya vhokhotsi vha Isiraele ngei Yerusalema,+ na kamarani khulwane* dza nḓuni ya Yehova.”
30 Vhotshifhe na Vhalevi vha ṱanganedza siḽiva na musuku na zwishumiswa zwe vha kalelwa zwone, uri vha zwi ḓise Yerusalema nḓuni ya Mudzimu washu.
31 Ra takuwa mulamboni wa Ahava+ nga ḓuvha ḽa vhu 12 ḽa ṅwedzi wa u thoma+ ra ya Yerusalema, tshanḓa tsha Mudzimu washu tsho vha tshi na riṋe, a ri tsireledza zwanḓani zwa maswina na uri ri si lalelwe nḓilani.
32 Ngauralo, ra swika Yerusalema+ ra dzula henefho maḓuvha mararu.
33 Nga ḓuvha ḽa vhuṋa, ra kala siḽiva na musuku na zwishumiswa zwa nḓuni ya Mudzimu washu+ ra zwi ṋea Meremothe+ murwa wa tshifhe Uriya, o vha e na Eliasara murwa wa Finiasi, vhe na Yosabada+ murwa wa Yeshua na Noadya murwa wa Binui+ vha Vhalevi.
34 Vha vhala zwithu zwoṱhe na u zwi kala, tshileme tshazwo tsha ṅwaliwa fhasi.
35 Vha bvaho vhuthubwani, vha ḓisela Mudzimu wa Isiraele zwiṱhavhelo zwa u fhiswa, mboho dza 12,+ dzi tshi bva kha Vhaisiraele vhoṱhe, thutha dza 96,+ ngwana dza nduna dza 77 na zwibokoṱo zwa 12+ zwa tshifhiwa tsha u pfumelela tshivhi; zwenezwo zwoṱhe zwa ṋekedzwa Yehova sa tshifhiwa tsha u fhiswa.+
36 Ra ṋea magota* na vhavhusi vha khosi vha dzinguni ḽa Seli ha Mulambo*+ milayo ya khosi,+ vha tikedza vhathu na nnḓu ya Mudzimu wa ngoho.+
Ṱhaluso dzi re magumoni a siaṱari
^ Kana “Vhanethinimu.” Thevhedz., “vho kumedzwaho.”
^ Kana “Vhanethinimu.” Thevhedz., “vho kumedzwaho.”
^ Talente i lingana na khilogramu dza 34,2. Sedzani Ṱhume. B14.
^ Dariki ndi tshelede ya tsimbi ya musuku ya ngei Peresia. Sedzani Ṱhume. B14.
^ Kana “holoni dza u ḽela.”
^ Ndi dzina ḽine ḽa amba “vhatsireledzi vha muvhuso,” hafha ḽi ambela kha vhavhusi vha mavunduni a Muvhuso wa Peresia.
^ Kana “Yufuratha.”
