Esera 9:1-15
9 Musi ho no itwa zwenezwo zwithu, vhakololo vha ḓa vha amba na nṋe vha ri: “Vhathu vha Isiraele na vhotshifhe na Vhalevi a vho ngo ḓikhetha kha vhathu vha maṅwe mashango na kha maitele avho a nengisaho+ a Vhakanana, Vhahethe, Vhapheresi, Vhayebusi, Vhaamoni, Vhamoaba, Vhaegipita+ na Vhaamori.+
2 Vho ḓivhingela vhaṅwe vha vhananyana vhavho vha dovha vha vhingela na vharwa vhavho.+ Vhenevho vha re vhana* vhakhethwa,+ vho ḓiṱanganya na vhathu vha maṅwe mashango.+ Vhakololo na vhathusi vha vhavhusi ndi vhone vho ṋaṋisaho honoho vhukhakhi ha u sa fhulufhedzea.”
3 Musi ndi tshi tou pfa zwenezwo, nda kherukanya zwiambaro zwanga nda ṱunya maṅwe a mavhudzi a ṱhohoni yanga na ndebvu dzanga, nda dzula fhasi ndo hanganea.
4 Nga zwenezwo, vhathu vhoṱhe vha ṱhonifhaho* zwe Mudzimu wa Isiraele a zwi amba, vha nkuvhanganela nga nṱhani ha u sa fhulufhedzea ha mathubwa, ngeno nṋe ndo dzula ndo hanganea u swika nga tshifhinga tsha tshifhiwa tsha thoro tsha nga madekwana.+
5 Nga tshifhinga tsha tshifhiwa tsha thoro tsha nga madekwana,+ nda takuwa fhethu he nda vha ndo dzula hone ndo ṱungufhala, ndo ambara zwiambaro zwanga zwo kherukanaho, nda gwadama nga magona nda imisela nṱha zwanḓa zwanga ha Yehova Mudzimu wanga.
6 Nda ri: “Iwe Mudzimu wanga, ndi pfa ndi tshi shona na u farwa nga ṱhoni musi ndi tshi lavhelesa tshifhaṱuwo tshau iwe Mudzimu wanga ngauri vhuvhi hashu ho anda kha ṱhoho dzashu, milandu yashu i swika ṱaḓulu.+
7 U bva misini ya vhomakhulukuku washu u swika ṋamusi mulandu washu wo vha muhulu;+ nga nṱhani ha vhuvhi hashu, riṋe na mahosi ashu na vhotshifhe vhashu ro kumedzelwa zwanḓani zwa mahosi a maṅwe mashango, ra vhulawa nga banga,+ ra thubiwa,+ ra dzhielwa thundu+ dzashu na u shoniswa, samusi zwo tou ralo na ṋamusi.+
8 Fhedzi Yehova Mudzimu washu o ri takalela lwa tshifhinganyana nga u tendela masalela a tshi ponyoka na nga u ri ṋea fhethu ho tsireledzeaho fhethu hawe hukhethwa uri ri takale,+ Iwe Mudzimu washu, nge wa ri ṋea nungo musi ri vhupulini.
9 Naho ri dziphuli,+ Mudzimu washu ho ngo ri litsha vhupulini; fhedzi o ri sumbedza lufuno lu sa shanduki phanḓa ha mahosi a Peresia,+ a ri ṋea nungo dza uri ri fhaṱe nnḓu ya Mudzimu washu+ na u vusulusa mashubi ayo na u ri tsireledza nga mutsheṱo* ngei Yuda na ngei Yerusalema.
10 “Ri nga dovha ra ri mini zwo no ḓi itea, Iwe Mudzimu washu? Ngauri ro laṱa ndaela dzau,
11 dze wa ri ṋea dzone u tshi shumisa vhashumeli vhau vha vhaporofita, vha tshi ri: ‘Shango ḽine na khou ya u ḽi dzhia ndi shango ḽi songo kunaho nga nṱhani ha u sa kuna ha vhathu vha maṅwe mashango, nga nṱhani ha maitele avho a nengisaho e vha ḽi ḓadza ngao thungo dzoṱhe nga tshika dzavho.+
12 Ni songo tenda vhananyana vhaṋu vha tshi vhingwa nga vharwa vhavho, kana vhananyana vhavho vha tshi vhingwa nga vharwa vhaṋu;+ ni songo ita zwine zwa ḓo ita uri vha vhe na mulalo na uri vha bvelele;+ uri ni vhe na maanḓa, ni ḽe zwivhuya zwa shango, ni ḽi dzhie lwa tshoṱhe u itela vhana vhaṋu.’
13 Nga murahu ha zwoṱhe zwe zwa ri wela nga nṱhani ha mishumo yashu mivhi na mulandu washu muhulu, ngauri iwe Mudzimu washu, a wo ngo ri pfisa vhuṱungu u ya nga vhuvhi hashu,+ wo litsha vhaṅwe vhashu vha tshi ponyoka,+
14 naa ri nga dovha ra pfuka ndaela dzau ra malelana na vhathu vhane vha ita zwenezwi zwithu zwi nengisaho?+ Naa a u nga ḓo ri sinyutshela wa ri fhelisa tshoṱhe, hu si vhe na ane a sala kana ane a ponyoka?
15 Iwe Yehova Mudzimu wa Isiraele, wo luga,+ ngauri wo ri ponyokisa u swika na ṋamusi. Zwino ri phanḓa hau ri na mulandu, ngauri a zwi konadzei u ima phanḓa hau nga nṱhani ha zwenezwi.”+
Ṱhaluso dzi re magumoni a siaṱari
^ Thevhedz., “mbeu.”
^ Thevhedz., “vha ofhaho.”
^ Kana “luvhondo lwa tsireledzo.”
