Esitere 1:1-22
1 Misini ya Ahasiverosi,* onoyo ndi Ahasiverosi we a vha a tshi vhusa mavundu* a fhiraho 127+ u bva India u swika Etopia,*
2 misini yeneyo Khosi Ahasiverosi o vha o dzula pfamoni* kha khuluṋoni yawe ya vhuhosi ngei Shushani,*+
3 nga ṅwaha wa vhuraru wa musi a tshi khou vhusa, a itela vhakololo vhawe na vhashumeli vhawe tshimima tshihulu. Ho vha ho ḓa mmbi ya Peresia+ na ya Meda,+ vharangaphanḓa na vhavhusi vha mavundu,*
4 a vha sumbedza lupfumo lwa muvhuso wawe muhulu na maṱeleṱele na lunako lwa madzanga awe, ha fhela maḓuvha manzhi, maḓuvha a 180.
5 Musi eneo maḓuvha o no fhela, khosi ya itela vhathu vhoṱhe tshimima tshihulu vha re pfamoni* ngei Shushani,* vhahulwane na vhaṱuku, vha fhedza maḓuvha a sumbe vhe muṱani wa ngade ya pfamo ya khosi.
6 Ho vha hu na ḽinene, harane yavhuḓi na malabi a muvhala wa lutombo zwo vhofhekanywa nga thambo dza malabi avhuḓi, wuḽu ya phephulu yo kungelwa nga rinngi dza siḽiva, phuphu dza matombo a mavhuḽu, ha dovha ha vha na zwidulo zwa musuku na zwa siḽiva zwi muṱani wo itwaho nga tombo ḽa phofiri, mavhuḽu, vhulungu na matombo a mavhuḽu mutswu.
7 Waini i tshi shelwa kha zwinwelo zwa musuku; zwenezwo zwinwelo zwi sa fani, waini ya musanda i nnzhi, u ya nga zwo fanelaho khosi.
8 Ho vha hu si na ane a vha kombetshedza* u nwa; ngauri khosi yo dzudzanya na vhashumi vha pfamoni yayo uri muṅwe na muṅwe a nwe nga nḓila ine a funa ngayo.
9 Vasithi mufumakadzi wa khosi+ na ene o vha o itela vhafumakadzi tshimima tshihulu nḓuni* ya musanda ya Khosi Ahasiverosi.
10 Nga ḓuvha ḽa vhusumbe, musi mbilu ya khosi yo takadzwa nga waini, ya vhudza Mehumani, Bisitha, Harabona,+ Bigitha, Abagatha, Sethara na Karikasi, vhaḓinḓa vha sumbe vha shumelaho Khosi Ahasiverosi,
11 uri vha ḓise Vasithi mufumakadzi wayo, o vhofha khare* ya vhuhosini, uri a ḓe a ṱane lunako lwawe uri lu vhonwe nga vhathu na vhavhusi, ngauri o vha o naka nga maanḓa.
12 Fhedzi Vasithi mufumakadzi wa khosi a hana musi khosi yo rumela vhaḓinḓa uri vha mu vhidze. Khosi ya sinyuwa, ya halifha nga maanḓa.
13 Khosi ya amba na vhanna vho ṱalifhaho vhane vha ḓivha maitele (nga yeneyo nḓila mafhungo a khosi a ḓivhiwa nga vhoṱhe vhane vha ḓivha mulayo na mafhungo a milandu,
14 vha re tsini nayo ho vha hu Karasena, Shethara, Asamatha, Tharasisi, Merese, Marasena na Memukani, vhaḓinḓa vhahulwane vha sumbe+ vha Peresia na Meda, vha konaho u ḓa phanḓa ha khosi, vha re na vhuimo ha nṱha muvhusoni).
15 Khosi ya vhudzisa uri: “U ya nga mulayo, Vasithi mufumakadzi wanga a itwe mini, ngauri ho ngo thetshelesa zwe Khosi Ahasiverosi a amba a tshi mu vhidza a tshi shumisa vhaḓinḓa?”
16 Memukani a fhindula musi khosi na vhakololo vha tshi zwi pfa a ri: “Vasithi mufumakadzi wa khosi ho ngo khakhela khosi i yoṱhe,+ fhedzi o khakhela na vhakololo vhoṱhe na vhathu vhoṱhe vha mavundu* a Khosi Ahasiverosi.
17 Zwe onoyo mufumakadzi a ita zwi ḓo ḓivhiwa nga vhafumakadzi vhoṱhe, vha vho ḓo nyadza vhanna vhavho vha ri: ‘Khosi Ahasiverosi o vhidza Vasithi mufumakadzi wawe uri a ḓe, fhedzi a hana u ḓa.’
18 Musi vhafumakadzi vha vhakololo vha Peresia na vha Meda vha tshi pfa zwe mufumakadzi a zwi ita vha ḓo vhudza vhakololo vha khosi, zwa ita uri hu vhe na lunyadzo luhulu na u sinyutshelana.
19 Arali khosi i tshi zwi takalela, nga i vhee mulayo, u ṅwaliwe kha milayo ya Peresia na ya Meda, une wa sa ḓo shandukiswa,+ uri Vasithi a si tsha dovha a ḓa phanḓa ha Khosi Ahasiverosi; khosi nga i dzhie vhuimo hawe i vhu ṋee muṅwe mufumakadzi a re khwine khae.
20 Musi wonoyo mulayo wa khosi u tshi ḓo pfala muvhusoni wawe woṱhe muhulu, vhafumakadzi vhoṱhe vhahulwane na vhaṱuku vha ḓo ṱhonifha vhanna vhavho.”
21 Ḽeneḽo fhungo ḽa takadza khosi na vhakololo, khosi ya ita zwe Memukani a zwi amba.
22 Ya rumela marifhi mavunduni oṱhe a musanda,* kha vundu*+ ḽiṅwe na ḽiṅwe ya rumela nga kuṅwalele kwa henefho na luambo lwa henefho, uri munna muṅwe na muṅwe a lange* vha nḓuni yawe na u amba nga luambo lwa vhathu vha hawe.
Ṱhaluso dzi re magumoni a siaṱari
^ Zwi vhonala u nga ndi Xerxes wa U Thoma, murwa wa Dario Muhulwane (Dario Hystaspis).
^ Kana “zwiṱiriki zwi re na maanḓa.”
^ Kana “Kushi.”
^ Kana “fhethu ha dzhavhelo.”
^ Kana “Susa.”
^ Kana “zwiṱiriki zwi re na maanḓa.”
^ Kana “fhethu ha dzhavhelo.”
^ Kana “Susa.”
^ Kana “langa.”
^ Kana “pfamoni.”
^ Kana “dugu.”
^ Kana “zwiṱiriki zwi re na maanḓa.”
^ Thevhedz., “zwiṱirikini zwoṱhe zwi re na maanḓa zwa khosi.”
^ Kana “tshiṱiriki tshi re na maanḓa.”
^ Kana “range phanḓa.”
