Esitere 4:1-17
4 Musi Maradokai+ a tshi pfa zwoṱhe zwe zwa itwa,+ a kherukanya zwiambaro zwawe a ambara madzanganda a ḓishela miḽora. A ya vhukati ha muḓi, a vusa tshililo tshihulu o ṱungufhala.
2 A tshimbila a swika khoroni ya khosi, fhedzi a si dzhene ngauri ho vha hu si na muthu we a vha o tendelwa u dzhena khoroni ya khosi o ambara madzanganda.
3 Vunduni*+ ḽiṅwe na ḽiṅwe he ha ḓivhadzwa zwe khosi ya amba na mulayo wayo, Vhayuda vho vha vho ṱungufhala nga maanḓa, vha tshi khou ḓidzima zwiḽiwa+ na u lila. Vhanzhi vho vha vho eḓela vho ambara madzanganda vha tshi khou vhumbuluwa miḽorani.+
4 Musi vhaḓinḓa vha Esitere vha vhafumakadzi na khombe dzawe vha tshi ḓa vha mu vhudza eneo mafhungo, Esitere mufumakadzi wa khosi a tsikeledzea nga maanḓa. A ruma vhaḓinḓa uri vha ṋee Maradokai zwiambaro nṱhani ha uri a ambare madzanganda, fhedzi Maradokai a hana u zwi ambara.
5 Esitere a vhidza Hathakha, muṅwe wa khombe dza khosi, we a vha o vhewa uri a mu shumele, a mu ruma uri a ye kha Maradokai uri a vhudzise uri zwenezwo zwi amba mini na uri hu khou itea mini.
6 Hathakha a ya ha Maradokai khoroni ya muḓi phanḓa ha khoro ya khosi.
7 Maradokai a mu vhudza zwoṱhe zwe zwa itea khae na nga ha tshelede+ ye Hamani a fhulufhedzisa u i dzhenisa mbulungeloni ya khosi uri Vhayuda vha fheliswe.+
8 O mu ṋea na vhurifhi vhu re na mulayo we wa vhewa ngei Shushani*+ wa uri vha fheliswe. Uri vhu sumbedzwe Esitere, a mu ṱalutshedze hone,+ na uri a ye ha khosi a humbele u khathutshelwa na u humbelela vhathu vha hawe.
9 Hathakha a vhuya a vhudza Esitere zwe Maradokai a amba.
10 Esitere a fhindula Hathakha a mu vhudza zwine a fanela u vhudza Maradokai+ a ri:
11 “Vhashumeli vhoṱhe vha khosi na vhathu vha mavunduni* a khosi vha a zwi ḓivha uri arali munna kana mufumakadzi naho e ufhio ane a dzhena muṱani wa nga ngomu wa khosi+ a songo vhidzwa, hu na mulayo muthihi une wa ri: U tea u vhulawa; a nga litshiwa fhedzi arali khosi yo mu sumba nga lubaḓa lwa musuku.+ Zwino nṋe ndo no fhedza maḓuvha a 30 ndi sa vhidzwi nga khosi.”
12 Musi Maradokai a tshi vhudzwa zwe Esitere a zwi amba,
13 a fhindula Esitere a ri: “U songo humbula uri u ḓo ponyoka musi vhaṅwe Vhayuda vhoṱhe vha tshi vhulawa ngauri iwe u wa muṱani wa khosi.
14 Ngauri arali wa fhumula nga tshino tshifhinga, hu ḓo vha na iṅwe nḓila ine Vhayuda vha ḓo thuswa na u vhofhololwa ngayo,+ fhedzi iwe na vha muṱa wa khotsi au ni ḓo fheliswa. Ndi nnyi ane a ḓivha uri khamusi wo itwa mufumakadzi wa khosi u tshi khou itelwa tshifhinga tshi fanaho na tshenetshi?”+
15 Esitere a fhindula Maradokai a ri:
16 “Tshimbila u kuvhanganye Vhayuda vhoṱhe vha re ngei Shushani* vha ḓidzime zwiḽiwa+ vha tshi itela nṋe. Ni songo ḽa kana u nwa lwa maḓuvha mararu,+ vhusiku na masiari. Nṋe khathihi na vhaḓinḓa vhanga vha vhafumakadzi ri ḓo ḓidzima zwiḽiwa. Ndi ḓo ya ha khosi, naho mulayo u sa ntendeli, arali nda fa ndi ḓo ḓi vha ndo fa zwanga.”
17 Maradokai a ya a ita zwoṱhe zwe Esitere a mu vhudza zwone.
Ṱhaluso dzi re magumoni a siaṱari
^ Kana “Tshiṱirikini tshi re na maanḓa.”
^ Kana “Susa.”
^ Kana “zwiṱirikini zwi re na maanḓa.”
^ Kana “Susa.”
