Esitere 6:1-14
-
Maradokai u huliswa nga khosi (1-14)
6 Vhusiku honoho khofhe dzi si fare kha khosi.* Ya amba uri hu ḓiswe bugu ya mafhungo a misini yeneyo,+ khosi ya vhalelwa yone.
2 Kha yeneyo bugu vha wana ho ṅwaliwa mafhungo e Maradokai a a vhiga nga ha Bigithani na Therese, vhaḽa vhaḓinḓa vhavhili vha khosi vha lindaho miṋango, vhe vha ita tshimbevha tsha u vhulaya Khosi Ahasiverosi.+
3 Khosi ya vhudzisa ya ri: “Naa Maradokai o huliswa kana u lambedzwa nge a ita zwenezwo?” Vhaḓinḓa vha khosi vha ri: “A hu na tshe a itelwa tshone.”
4 Nga murahu khosi ya ri: “Ndi nnyi a re muṱani?” Hamani ndi ene we a vha e muṱani wa nga nnḓa+ ha nnḓu* ya khosi we a vha o ḓa u amba na khosi uri Maradokai a fhahewe kha danda ḽe a mu lugiselela ḽone.+
5 Vhaḓinḓa vha khosi vha fhindula vha ri: “Ndi Hamani+ o imaho muṱani.” Khosi ya ri: “Ambani nae a dzhene.”
6 Musi Hamani a tshi dzhena, khosi ya mu vhudzisa ya ri: “Ndi mini zwine zwa nga itelwa munna ane khosi ya ṱoḓa u mu hulisa?” Hamani a elekanya a ri: “Ndi nnyi ane khosi ya nga ṱoḓa u mu hulisa nga nnḓa ha nṋe?”+
7 Hamani a fhindula khosi a ri: “Munna ane khosi ya ṱoḓa u mu hulisa,
8 nga a ḓiselwe tshiambaro tsha musanda+ tshine tsha ambarwa nga khosi na bere ine khosi ya i ṋamela, yo ambadzwa khare ya vhuhosi ṱhohoni yayo.
9 Tshenetsho tshiambaro na bere zwi ṋewe muṅwe wa vhaḓivhalea vha vharangaphanḓa, onoyo a ambadze munna ane khosi ya ṱoḓa u mu hulisa, a mu ṋamedze kha yeneyo bere a tshimbile khoroni ya muḓi. Hu huwelelwe phanḓa hawe hu pfi: ‘Hezwi ndi zwine zwa itwa munna ane khosi ya ṱoḓa u mu hulisa!’”+
10 Khosi ya amba na Hamani ya ri: “Ṱavhanya u ye u dzhie tshiambaro na bere, u ite zwe wa zwi amba kha Maradokai wa Muyuda o dzulaho khoroni ya khosi. U songo litsha u ita tshithu na tshithihi kha zwe wa zwi amba.”
11 Hamani a dzhia tshenetsho tshiambaro na bere, a ambadza Maradokai+ a mu ṋamedza bere a tshimbila khoroni ya muḓi a tshi khou vhidzelela phanḓa hawe a tshi ri: “Hezwi ndi zwine zwa itwa munna ane khosi ya ṱoḓa u mu hulisa!”
12 Nga murahu Maradokai a humela khoroni ya khosi, fhedzi Hamani a gidimela nḓuni yawe o ṱungufhala, o ḓifukedza ṱhoho.
13 Musi Hamani a tshi anetshela Serese+ mufumakadzi wawe na khonani dzawe zwoṱhe zwe zwa itea khae, vhaeletshedzi vhawe na Serese mufumakadzi wawe vha amba nae vha ri: “Arali Maradokai we wa mu losha e wa lushaka lwa Vhayuda, u nga si mu kunde; ene u ḓo u kunda.”
14 Musi vha tshi kha ḓi amba nae, vhaḓinḓa vha khosi vha swika vha dzhia Hamani nga u ṱavhanya vha mu isa tshimimani tshe tsha lugiselelwa nga Esitere.+
