Esitere 7:1-10
7 Khosi na Hamani+ vha ḓa tshimimani tshihulu tsha Esitere mufumakadzi wa khosi.
2 Khosi ya dovha ya vhudzisa Esitere nga ḓuvha ḽa vhuvhili musi vha tshi khou nwa waini ya ri: “Esitere mufumakadzi wanga u khou ṱoḓa u humbela mini? Tshine wa ḓo humbela u ḓo ṋewa. U khou ṱoḓa mini? Naho wa humbela hafu ya muvhuso wanga, u ḓo ṋewa!”+
3 Esitere mufumakadzi wa khosi a fhindula a ri: “Arali u tshi ntakalela iwe thovhela, zwi tshi takadza khosi, ndi khou humbela uri u tshidze nṋe na vhathu vha hashu.+
4 Nṋe na vhathu vha hashu ro rengiswa,+ uri ri fheliswe+ na u vhulawa. Arali ri vhe ro sokou rengiswa fhedzi ra itwa phuli dza vhanna na dza vhafumakadzi, ndo vha ndi tshi ḓo vha ndo ḓifhumutshela. Fhedzi hoyu mutsiko a wo ngo tea, ngauri u ḓo vhaisa na khosi.”
5 Khosi Ahasiverosi a amba na Esitere mufumakadzi wawe a ri: “Ndi nnyi onoyo muthu, u ngafhi onoyo muthu o ḓiimiselaho u ita zwenezwo zwithu?”
6 Esitere a ri: “Muthu ane a vha mutovholi na swina ndi hoyu Hamani muvhi.”
Hamani a tshuwa e henefho phanḓa ha khosi na Esitere mufumakadzi wa khosi.
7 Khosi ya takuwa yo sinyuwa henefho tshimimani tsha waini ya ya ngadeni ya henefho pfamoni, fhedzi Hamani a takuwa uri a luvhelele Esitere mufumakadzi wa khosi uri a si vhulawe, ngauri o vha o zwi ṱhogomela uri khosi yo ḓiimisela u mu pfisa vhuṱungu.
8 Khosi ya vhuya i tshi bva ngadeni i re pfamoni ya dzhena nḓuni he ha vha hu tshi khou nwiwa waini, ya vhona Hamani o ḓiposa nṱha ha sofa ḽe Esitere a vha o dzula khaḽo. Khosi ya ri: “Naa u khou ṱoḓa u tzhipa mufumakadzi wanga henefha nḓuni yanga?” Musi khosi i tshi tou amba zwenezwo vha fukedza Hamani tshifhaṱuwo.
9 Harabona+ muṅwe wa vhaḓinḓa vha khosi a ri: “Hu dovha ha vha na danda ḽe Hamani a ḽi lugiselela Maradokai,+ we a tshidza thovhela.+ Ḽo ṱokiwa muḓini wa Hamani, ḽo lapfa khubithi dza 50.”* Khosi ya ri: “Kha fhahewe khaḽo.”
10 Vha fhahea Hamani kha ḽeneḽo danda ḽe a vha o ḽi lugiselela Maradokai, mbiti dza khosi dza dzika.
Ṱhaluso dzi re magumoni a siaṱari
^ Hu ṱoḓaho u vha mithara dza 22,3. Sedzani Ṱhume. B14.
