Esitere 9:1-32
9 Nga ḓuvha ḽa vhu 13 ḽa ṅwedzi wa vhu 12 une wa vha ṅwedzi wa Adari,*+ musi hu tshi vho fanela u itwa zwe mulayo wa khosi wa amba,+ nga ḓuvha ḽe maswina a Vhayuda a vha o lavhelela u vha kunda, ha itea zwo fhambanaho na zwenezwo, Vhayuda vha kunda vhane vha vha vhenga.+
2 Vhayuda vha kuvhangana miḓini yavho mavunduni* oṱhe a Khosi Ahasiverosi+ uri vha vutshele vhane vha ṱoḓa u vha huvhadza, ho vha hu si na we a vha a tshi nga vha thivhela, ngauri vhathu vhoṱhe vho vha vha tshi khou vha ofha.+
3 Vharangaphanḓa vhoṱhe vha mavundu,* magota,+ vhavhusi na vhane vha shuma mushumo wa khosi vha tikedza Vhayuda, ngauri vho vha vha tshi ofha Maradokai.
4 Maradokai o vha o no vha na maanḓa+ nḓuni* ya khosi, bvumo ḽawe ḽo vha ḽi tshi khou phaḓalala kha mavundu* oṱhe, ngauri Maradokai o vha a tshi khou ḓi ya a tshi vha na maanḓa nga zwiṱuku nga zwiṱuku.
5 Vhayuda vha vhulaya maswina avho oṱhe nga banga; vho ita zwoṱhe zwine vha ṱoḓa u zwi ita kha vhane vha vha vhenga.+
6 Vhayuda vha vhulaya vhanna vha 500 pfamoni* ya ngei Shushani.*+
7 Vha vhulaya na Parasanadatha, Dalifoni, Asiphatha,
8 Phoratha, Adalia, Aridatha,
9 Paranasitha, Arisai, Aridai na Vayesatha,
10 vharwa vha fumi vha Hamani murwa wa Hamedatha swina ḽa Vhayuda.+ Fhedzi musi vho no vha vhulaya, vha si dzhie thundu dzavho.+
11 Nga ḽeneḽo ḓuvha, khosi ya vhigelwa tshivhalo tsha vhe vha vhulawa pfamoni* ya ngei Shushani.*
12 Khosi ya amba na Esitere mufumakadzi wayo ya ri: “Vhayuda vho vhulaya vhanna vha 500 na vharwa vha fumi vha Hamani pfamoni* ya ngei Shushani.* Kha maṅwe mavundu*+ a khosi vha nga vha vho ita zwingafhani? U khou ṱoḓa u humbela mini? Tshine wa ḓo humbela u ḓo ṋewa. Ndi mini tshiṅwe tshine wa tshi ṱoḓa? U ḓo ṋewa tshone.”
13 Esitere a fhindula a ri: “Arali zwi tshi takadza khosi,+ tendela Vhayuda vha re ngei Shushani* uri matshelo vha dovhe vha ite zwine mulayo wa ṋamusi wa amba zwone;+ na uri vharwa vha fumi vha Hamani vha fhahewe kha danda.”+
14 Ngauralo, khosi ya amba uri zwi itwe. Ha vhewa mulayo ngei Shushani,* vharwa vha fumi vha Hamani vha fhahewa.
15 Vhayuda vha ngei Shushani* vha dovha vha kuvhangana nga ḓuvha ḽa vhu 14 ḽa ṅwedzi wa Adari,+ vha vhulaya vhanna vha 300 ngei Shushani,* fhedzi vha si dzhie thundu dzavho.
16 Vhayuda vhoṱhe vha mavunduni* a khosi vha kuvhangana uri vha ḓilwele.+ Vha vhulaya maswina avho+ a 75 000; fhedzi vha si dzhie thundu dzao.
17 Zwenezwo vho zwi ita nga ḓuvha ḽa vhu 13 ḽa ṅwedzi wa Adari, vha awela nga ḓuvha ḽa vhu 14 vha ḽi ita ḓuvha ḽa zwimima na u takala.
18 Vhayuda vha ngei Shushani* vha kuvhangana nga ḓuvha ḽa vhu 13+ na ḽa vhu 14,+ vha awela nga ḓuvha ḽa vhu 15 vha ḽi ita ḓuvha ḽa zwimima na u takala.
19 Ndi ngazwo Vhayuda vha mahayani vha dzulaho miḓini ya zwiṱirikini zwi re kule na miḓi vho ita uri ḓuvha ḽa vhu 14 ḽa ṅwedzi wa Adari ḽi vhe ḓuvha ḽa u takala na zwimima,+ ḓuvha ḽa u pembela, tshifhinga tsha u ṋeana zwiḽiwa.+
20 Maradokai+ a ṅwala zwenezwo zwithu zwoṱhe, a rumela eneo marifhi kha Vhayuda vhoṱhe vha mavunduni* oṱhe a Khosi Ahasiverosi, vha tsini na vha kule.
21 A vha laya uri vha tevhedze ḓuvha ḽa vhu 14 ḽa ṅwedzi wa Adari, khathihi na ḓuvha ḽa vhu 15 ṅwaha muṅwe na muṅwe,
22 ngauri nga eneo maḓuvha Vhayuda vho awela maswina avho, nga wonoyo ṅwedzi vhuṱungu havho ho shanduka ha vha dakalo, zwililo zwavho+ zwa ita uri hu vhe na ḓuvha ḽa u pembela. Vho vha vha tshi fanela u tevhedza maḓuvha a zwimima na a u takala na uri vha kovhelane zwiḽiwa na u ṋea vhashai zwifhiwa.
23 Vhayuda vha tenda uri vha ḓo bvela phanḓa na vhuṱambo he vha vhu thoma na u ita zwe Maradokai a vha ṅwalela zwone.
24 Ngauri Hamani+ murwa wa Hamedatha wa Muagagi,+ swina ḽa Vhayuda, o vha o vhambela Vhayuda maano a uri vha fheliswe,+ a ita Puri, ine ya vha madeṅwa,+ uri a wane ḓuvha ḽa u vha fhelisa.
25 Musi Esitere a tshi ḓa phanḓa ha khosi, khosi ya ṋea ndaela yo ṅwaliwaho ine ya ri:+ “Maano awe mavhi e a a vhambela Vhayuda+ nga a humele nṱha ha ṱhoho yawe”; ene na vharwa vhawe vha fhahewe kha danda.+
26 Ndi ngazwo enea maḓuvha a tshi vhidzwa u pfi Purimi, hu tshi tevhedzwa dzina ḽa Puri.+ Nga zwenezwo, nga nṱhani ha zwithu zwe zwa ṅwaliwa kha honoho vhurifhi na zwe zwa ambiwa nga ha eneo mafhungo na zwe zwa bvelela khavho,
27 Vhayuda na vhana vhavho na vhoṱhe vhane vha ḓiṱanganya navho vha ḓivhofha+ uri vha pembelele eneo maḓuvha mavhili na u tevhedza zwo ṅwaliwaho nga hao nga tshifhinga tsho vhewaho ṅwaha muṅwe na muṅwe.
28 Eneo maḓuvha o vha a tshi tea u humbulwa na u tevhedzwa nga murafho muṅwe na muṅwe, nga muṱa muṅwe na muṅwe, vunduni* ḽiṅwe na ḽiṅwe na muḓini muṅwe na muṅwe; eneo maḓuvha a Purimi a songo hangwiwa nga Vhayuda na vhaḓuhulu vhavho vha dzule vha tshi a humbula.
29 Esitere mufumakadzi wa khosi ṅwananyana wa Abihaili, na Maradokai wa Muyuda vha ṅwala vhurifhi u itela u ombedzela vhurifhi ha vhuvhili vhu ambaho nga Purimi vha tshi sumbedza maanḓa ane vha vha nao.
30 A rumela marifhi a lwa mulayo kha Vhayuda vhoṱhe vha re mavunduni* a 127,+ muvhusoni wa Ahasiverosi,+ a amba nga mulalo na nga ngoho
31 u itela u khwaṱhisedza u humbulwa ha maḓuvha a Purimi nga zwifhinga zwo vhewaho, sa zwe Maradokai wa Muyuda na Esitere mufumakadzi wa khosi vha vha laedza uri vha zwi ite,+ samusi vhone na vhaḓuhulu vhavho vho ḓivhofha uri vha ḓo tevhedza zwenezwo,+ u katela na u ḓidzima zwiḽiwa+ na thabelo ya khumbelo.+
32 Ndaela ya Esitere ya khwaṱhisa enea mafhungo a Purimi,+ ya ṅwaliwa kha bugu.
Ṱhaluso dzi re magumoni a siaṱari
^ Sedzani Ṱhume. B15.
^ Kana “zwiṱirikini zwi re na maanḓa.”
^ Kana “zwiṱiriki zwi re na maanḓa.”
^ Kana “pfamoni.”
^ Kana “zwiṱiriki zwi re na maanḓa.”
^ Kana “fhethu ha dzhavhelo.”
^ Kana “Susa.”
^ Kana “fhethu ha dzhavhelo.”
^ Kana “Susa.”
^ Kana “fhethu ha dzhavhelo.”
^ Kana “Susa.”
^ Kana “zwiṱiriki zwi re na maanḓa.”
^ Kana “Susa.”
^ Kana “Susa.”
^ Kana “Susa.”
^ Kana “Susa.”
^ Kana “zwiṱirikini zwi re na maanḓa.”
^ Kana “Susa.”
^ Kana “zwiṱirikini zwi re na maanḓa.”
^ Kana “tshiṱirikini tshi re na maanḓa.”
^ Kana “zwiṱirikini zwi re na maanḓa.”
