Kha Filemoni 1:1-25
1 Nṋe Paulo we nda farwa+ nga nṱhani ha Kristo Yesu, ndi na wahashu Timotheo,+ ndi ṅwalela Filemoni a shumaho na riṋe a funwaho,
2 na khaladzi ashu Apia na Arakipo,+ ane a vha swole u fana na riṋe na tshivhidzo tshi re nḓuni yau, ndi ri:+
3 Ngavhe Mudzimu Khotsi ashu na Yesu Kristo Murena washu vha tshi u sumbedza vhuthu vhuhulu na u ita uri u vhe na mulalo.
4 Ndi livhuwa Mudzimu tshifhinga tshoṱhe musi ndi tshi amba nga ha iwe thabeloni,+
5 samusi ndi tshi dzula ndi tshi pfa nga ha lutendo lwau na nḓila ine wa funa ngayo Murena Yesu na vhakhethwa vhoṱhe.
6 Ndi rabela uri lutendo lune wa vha nalwo u fana na vhaṅwe, lu u ṱuṱuwedze uri u dzhiele nṱha zwivhuya zwoṱhe zwine ra vha nazwo nga Kristo.
7 Wahashu, zwo ntakadza na u nkhuthadza zwihulu musi ndi tshi pfa nga ha lufuno lwau ngauri wo homolosa vhakhethwa.
8 Ngauralo, naho sa muapostola wa Kristo ndi na maanḓa a u u vhudza zwine wa fanela u ita,
9 ndi khwine u u ṱuṱuwedza uri u ite zwenezwi nga nṱhani ha lufuno lune wa vha nalwo, ngauri nṋe Paulo ndo no vha mualuwa, ndo farwa nga nṱhani ha Kristo Yesu.
10 Ndi a u humbela ndi tshi itela ṅwananga Onesimo,+ we nda vha khotsi awe+ musi ndi dzhele.*
11 Kale ho vha hu si na tshine a nga u thusa ngatsho, fhedzi zwino a nga thusa nṋe na iwe.
12 Ndi khou mu rumela kha iwe, ene ane nda mu funa.
13 Ndo vha ndi tshi nga funa uri a dzule na nṋe, a bvele phanḓa a tshi nthusa nga zwe wa vha wo tea u nthusa ngazwo samusi ndo farelwa mafhungo maḓifha.+
14 A thi ṱoḓi u ita tshithu u songo thoma wa ntendela, uri u ite mushumo wau wavhuḓi u tshi zwi funa, u songo tou kombetshedzwa.+
15 Khamusi ndi ngazwo o thoma a ṱuwa lwa tshifhinganyana, uri a kone u vhuya kha iwe lwa tshoṱhe,
16 a si tsha vha mulanda,+ fhedzi e khwine kha mulanda, e wahashu. Ndi a mu funa zwihulu,+ na iwe u ḓo mu funa zwihulu sa mulanda na wahashu Murenani.
17 Arali ndi khonani yau, mu ṱanganedze nga nḓila ye wa vha u tshi ḓo nṱanganedza ngayo.
18 Zwiṅwe hafhu, arali o u khakhela kana a tshi u koloda, ndi ḓo u lifhela.
19 Ndi nṋe Paulo ane nda khou ṅwala uri ndi ḓo u lifhela zwine Onesimo a u koloda zwone. U songo hangwa uri na iwe hu na zwinzhi zwine wa nkoloda.
20 Wahashu, ngavhe u tshi nthusa u tshi itela Murena; u nṱuṱuwedze u tshi itela Kristo.
21 Ndi u ṅwalela ndi tshi fhulufhela uri u ḓo ita zwe nda u humbela. Ndi a zwi ḓivha uri u ḓo ita zwi fhiraho zwenezwo.
22 Zwiṅwe hafhu, u nndugiselele vhudzulo, khamusi thabelo dzaṋu dzi ḓo ita uri ndi vhofhololwe ndi ḓe kha inwi.+
23 Epafra+ o valelwaho dzhele u fana na nṋe a tshi itela Kristo Yesu, u a u lumelisa.
24 Na Marko, Aristariko,+ Dema+ na Luka,+ vhane nda shuma navho, vha a u lumelisa.
25 Ngavhe Murena Yesu Kristo a tshi fhaṱutshedza nḓila ine wa humbula ngayo, a u sumbedze vhuthu vhuhulu.
Ṱhaluso dzi re magumoni a siaṱari
^ Thevhedz., “ndo vhofhiwa nga ngeḓane.”