Genesi 14:1-24
14 Misini yeneyo Amurafele khosi ya Shinari,+ Arioko khosi ya Elasara, Kedorolaomere+ khosi ya Elamu+ na Thidali khosi ya Goyimi,
2 eneo mahosi a lwa na Bera khosi ya Sodoma+ na Birisha khosi ya Gomora,+ Shinabi khosi ya Adema, Shemebe khosi ya Zeboimi+ na khosi ya Bela, hune ha vha Tsowari.
3 Eneo mahosi oṱhe a ṱangana Govhani ḽa Sidima,+ hune ha vha Lwanzheni lwa Muṋo.*+
4 Eneo mahosi o shumela Kedorolaomere miṅwaha ya 12, fhedzi nga ṅwaha wa vhu 13 a mu shandukela.
5 Nga ṅwaha wa vhu 14 Kedorolaomere na mahosi e a vha e nao a ḓa a kunda Vharefaimi ngei Asiteroto-karanaimi na Tsutsi ngei Hamu na Emi+ ngei Shave-kiriataimi,
6 na Vhahori+ thavhani yavho ya Seiri,+ u swika Elipharani, hune ha vha sogani.
7 Ngauralo, a humela murahu a ya Eni-mishipati, hune ha vha Kadese,+ a kunda shango ḽoṱhe ḽa Vhaameleke+ na ḽa Vhaamori+ vha dzulaho Hasasoni-thamara.+
8 Nga tshenetsho tshifhinga khosi ya Sodoma na khosi ya Gomora na khosi ya Adema na khosi ya Zeboimi na khosi ya Bela, hune ha vha Tsowari, dza lwa navho Govhani ḽa Sidima,
9 dza lwa na khosi Kedorolaomere ya Elamu, Thidali khosi ya Goyimi, Amurafele khosi ya Shinari na Arioko khosi ya Elasara;+ mahosi maṋa a lwa na mahosi maṱanu.
10 Govha ḽa Sidima ḽo vha ḽo ḓala milindi i re na tshigonṱiri; mahosi a Sodoma na Gomora a lingedza u shavha, a wela nga ngomu, o salaho a shavhela dzinguni ḽa dzithavhani.
11 Ngauralo, mahosi maṋa e a kunda o thuba thundu yoṱhe ya Sodoma na Gomora na zwiḽiwa zwavho zwoṱhe, a ṱuwa.+
12 Vha dovha vha thuba Loto, murwa wa murathu wa Abramu we a vha a tshi dzula Sodoma+ na thundu dzawe, vha ṱuwa.
13 Nga murahu, munna we a ponyoka a ḓa a vhudza Abramu wa Muhevheru. Nga tshenetsho tshifhinga Abramu o vha a tshi khou dzula* mirini mihulu ya Mamure wa Muamori,+ murathu wa Esikolo na Anere.+ Vhenevho vhanna vho vha vhe khonani dza Abramu.
14 Nga zwenezwo, Abramu a pfa uri shaka ḽawe+ ḽo thubiwa. A kuvhanganya vhanna vhawe vho gudiswaho u lwa, vhashumeli vhawe vha 318 vho bebwaho muḓini wawe, vha vha pandamedza vha vhuya vha swika Dani.+
15 A khethekanya mmbi yawe vhusiku, ene na vhashumeli vhawe vha vha vutshela, vha vha kunda. A vha pandamedza a vhuya a swika Hoba hune ha vha devhula ha Damaseko.
16 A dzhiulula thundu yoṱhe, a dzhiulula na Loto shaka ḽawe, thundu yawe, vhafumakadzi na vhaṅwe vhathu.
17 Ngauralo, khosi ya Sodoma ya ya u mu ṱanganedza musi a tshi bva u kunda Kedorolaomere na mahosi e a vha e nae, Govhani ḽa Shave, hune ha vha Govhani ḽa Khosi.+
18 Melkizedeke+ khosi ya Salema+ a ḓisa vhurotho na waini; o vha e tshifhe wa Mudzimu Wa-Ṱaḓulu-ṱaḓulu.+
19 A mu fhaṱutshedza a ri:
“Abramu nga a fhaṱutshedzwe nga Mudzimu Wa-Ṱaḓulu-ṱaḓulu,Musiki wa ḽiṱaḓulu na ḽifhasi;
20 Nga hu rendwe Mudzimu Wa-Ṱaḓulu-ṱaḓulu,We a kumedzela maswina au zwanḓani zwau!”
Abramu a mu ṋea tshafumi kha zwoṱhe.+
21 Nga murahu ha zwenezwo, khosi ya Sodoma ya amba na Abramu ya ri: “Nṋee vhathu, fhedzi iwe u dzhie thundu.”
22 Abramu a amba na khosi ya Sodoma a ri: “Ndi imisa tshanḓa tshanga nda anela Yehova Mudzimu Wa-Ṱaḓulu-ṱaḓulu, Musiki wa ḽiṱaḓulu na ḽifhasi,
23 uri a thi nga dzhii naho tshi tshini tshine tsha vha tshau, na harane zwayo kana thambo ya thovho,* uri u sa ḓo ri: ‘Ndi nṋe ndo pfumisaho Abramu.’
24 A thi nga ḓo dzhia tshithu nga nnḓa ha zwe zwa ḽiwa nga vhaṱhannga. Fhedzi Anere, Esikolo na Mamure+ vhe vha ṱuwa na nṋe, nga vha dzhie mukovhe wavho.”
Ṱhaluso dzi re magumoni a siaṱari
^ Ndi Lwanzhe lwo Faho.
^ Kana “u dzula madenndeni.”
^ Kana “phashane, navhula.”
