Genesi 22:1-24
22 Nga murahu ha zwenezwo, Mudzimu wa ngoho a linga Abrahamu+ a amba nae a ri: “Abrahamu!” Ene a fhindula a ri: “Ndi fhano!”
2 Mudzimu a dovha a ri: “Ndi khou humbela uri u dzhie Isaka+ murwa wau muthihi fhedzi ane wa mu funesa,+ u fare lwendo u ye shangoni ḽa Moriya,+ u mu ṋekedze sa tshifhiwa tsha u fhiswa henefho thavhani ine nda ḓo u sumbedza yone.”
3 Abrahamu a vuwa nga matsheloni-tsheloni a vhofhelela sale kha donngi yawe, a dzhia vhaḓinḓa vhawe vhavhili khathihi na Isaka murwa wawe. A fhanza khuni dza u ṋekedza tshifhiwa tsha u fhiswa, a ya fhethu he Mudzimu wa ngoho a mu laedza hone.
4 Nga ḓuvha ḽa vhuraru Abrahamu a lavhelesa a vhona henefho fhethu a tshee kulenyana.
5 Abrahamu a amba na vhaḓinḓa vhawe a ri: “Inwi salani henefha na donngi, fhedzi nṋe na mutukana ri ḓo fhirela hafhaḽa u itela u rabela, ri ḓo vhuya kha inwi.”
6 Nga murahu ha zwenezwo, Abrahamu a dzhia khuni dza u ṋekedza tshifhiwa tsha u fhiswa a dzi hwesa murwa wawe Isaka. A dovha a dzhia mulilo na lufhanga, vhuvhili havho vha ṱuwa.
7 Isaka a amba na khotsi awe a ri: “Baba!” Khotsi awe a fhindula a ri: “Ndi mini ṅwananga?” Isaka a ri: “Ri na mulilo na khuni, fhedzi nngu ya tshifhiwa tsha u fhiswa i ngafhi?”
8 Abrahamu a fhindula a ri: “Ṅwananga, Mudzimu u ḓo ri ṋea nngu ya tshifhiwa tsha u fhiswa.”+ Vha bvela phanḓa vha tshi khou tshimbila vhoṱhe.
9 Vha swika fhethu he Mudzimu wa ngoho a vha laedza hone, Abrahamu a fhaṱa aḽeṱare henefho a vhea na khuni nṱha hayo. A vhofha murwa wawe Isaka zwanḓa na milenzhe a mu vhea kha aḽeṱare nṱha ha khuni.+
10 Abrahamu a bvisa lufhanga uri a vhulaye murwa wawe.+
11 Fhedzi muruṅwa wa Yehova a mu vhidzelela e ṱaḓulu a ri: “Abrahamu, Abrahamu!” Ene a fhindula a ri: “Ndi fhano!”
12 Mudzimu a ri: “U songo huvhadza mutukana, u songo mu ita tshithu, ngauri zwino ndi a zwi ḓivha uri iwe u a ofha Mudzimu, a wo ngo ndzima murwa wau muthihi fhedzi.”+
13 Abrahamu a lavhelesa a vhona thutha i kulenyana, yo fashwa ṋanga i tshiṱakani. Abrahamu a ya a dzhia yeneyo thutha a i ṋekedza sa tshifhiwa tsha u fhiswa vhudzuloni ha murwa wawe.
14 Abrahamu a ri henefho fhethu hu pfi Yehova-dzhaire.* Ndi ngazwo hu tshi kha ḓi ambiwa na ṋamusi ha pfi: “Yehova u ṋea zwine zwa ṱoḓea thavhani yawe.”+
15 Muruṅwa wa Yehova e ṱaḓulu a vhidzelela Abrahamu lwa vhuvhili,
16 a ri: “Yehova u ri: ‘Ndi a ana nga nṋe muṋe+ ngauri wo ita zwenezwi, a wo ngo ndzima murwa wau muthihi fhedzi,+
17 ndi ḓo u fhaṱutshedza, nda andisa vhana* vhau sa ṋaledzi dza ṱaḓulu na muṱavha wa khunzi-khunzini ya lwanzhe,+ ṅwana* wau u ḓo dzhia miḓi ya maswina awe.+
18 Ngauri wo nthetshelesa, tshaka dzoṱhe dza shangoni dzi ḓo fhaṱutshedzwa+ nga nṱhani ha ṅwana* wau.’”+
19 Nga murahu ha zwenezwo, Abrahamu a vhuyelela kha vhaḓinḓa vhawe, vha humela vhoṱhe Beresaba;+ Abrahamu a dzula Beresaba.
20 Nga murahu Abrahamu a vhudzwa uri: “Na Milika mufumakadzi wa murathu wawe Nahoro+ o beba vharwa:
21 Utsi ndi ene tanzhe, murathu wawe ndi Busi, ha tevhela Kemuele khotsi a Aramu,
22 Kesede, Haso, Philidasi, Yidilafu na Bethuele.”+
23 Bethuele a beba Rebeka.+ Milika mufumakadzi wa Nahoro murathu wa Abrahamu, o mu bebela vhana vha vhatukana vha malo.
24 Mufumakadzi wawe wa vhuimo ha fhasi* ane a pfi Rehuma a mu bebela vharwa: Vho vha vhe Theba, Gahamu, Tahasi na Maaka.
Ṱhaluso dzi re magumoni a siaṱari
^ Zwine zwa amba uri “Yehova U Ḓo Ṋea; Yehova U Ḓo Ita Vhungoho Ha Uri Zwi A Itea.”
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
^ Sedzani Mutevhe Wa Ṱhalutshedzo Ya Maipfi.
