Genesi 24:1-67
24 Abrahamu o vha o no kalaha, Yehova o vha o mu fhaṱutshedza kha zwoṱhe.+
2 Abrahamu a amba na mushumeli wawe, muhulwane kha vhoṱhe muṱani wawe, we a vha a tshi langa zwoṱhe zwe a vha e nazwo+ a ri: “Vhea tshanḓa tshau nga fhasi ha tshirumbi tshanga,
3 uri ndi u anise nga Yehova Mudzimu wa ḽiṱaḓulu na ḽifhasi, uri a u nga ḓo ṱoḓela murwa wanga mufumakadzi kha vhananyana vha Vhakanana, vhane ra dzula navho.+
4 Nṱhani hazwo, u tea u ya shangoni ḽa hashu hu re na mashaka anga,+ uri u ṱoḓele Isaka murwa wanga mufumakadzi.”
5 Naho zwo ralo, mushumeli wawe a amba nae a ri: “Ndi tea u ita mini arali onoyo mufumakadzi a sa ṱoḓi u vhuya na nṋe kha ḽino shango? Naa u ṱoḓa ndi tshi isa murwa wau shangoni ḽine wa bva khaḽo?”+
6 Abrahamu a amba nae a ri: “U songo vhuya wa isa murwa wanga henengei.+
7 Yehova Mudzimu wa ḽiṱaḓulu, we a mpfulusa nḓuni ya khotsi anga na shangoni ḽa mashaka anga,+ na we a nnyanela+ a ri: ‘Vhana* vhau+ ndi ḓo vha ṋea heḽi shango,’+ u ḓo rumela muruṅwa wawe a u ranga phanḓa,+ u ṱoḓele murwa wanga mufumakadzi henefho.+
8 Arali mufumakadzi a hana u vhuya na iwe, iwe u ḓo vha wo vhofholowa kha uyu muano we wa nnyanela wone. Fhedzi a wo ngo tea u isa murwa wanga henengei.”
9 Mushumeli a vhea tshanḓa tshawe nga fhasi ha tshirumbi tsha Abrahamu muṋe wawe, a mu anela mafhungo enea.+
10 Mushumeli a dzhia gamela dza fumi dza muṋe wawe na zwifhiwa zwoṱhe zwo fhambanaho zwi bvaho kha muṋe wawe, a ṱuwa. A ya Mesopotamia muḓini wa Nahoro.
11 A tshi swika a ita uri gamela dzi gwadame tsini na tshisima tsha maḓi nnḓa ha muḓi. Ḽo vha ḽi tshi vho kovhela, hu tshifhinga tshine kanzhi vhafumakadzi vha bva vha tshi ya u ka maḓi.
12 A ri: “Yehova Mudzimu wa muṋe wanga Abrahamu, ndi khou humbela uri u mphaṱhutshedze ṋamusi, u sumbedze muṋe wanga Abrahamu lufuno lu sa shanduki.
13 Ndo ima tshisimani, vhananyana vha vhathu vha uno muḓi vha khou ḓa u ka maḓi.
14 Zwino musidzana ane nda ḓo amba nae nda ri: ‘Ndi khou humbela uri u rule mvuvhelo ya maḓi ndi nwe,’ a fhindula a ri: ‘Inwa, ndi ḓo kela na gamela dzau,’ onoyo nga a vhe ene we wa mu nangela Isaka mushumeli wau; ndi ḓo ḓivha nga zwenezwo uri muṋe wanga wo mu sumbedza lufuno lu sa shanduki.”
15 A sa athu u fhedza u amba, ha swika Rebeka ṅwananyana wa Bethuele,+ murwa wa Milika+ mufumakadzi wa Nahoro,+ murathu wa Abrahamu, o hwala mvuvhelo ya maḓi kha shaḓa ḽawe.
16 Onoyo musidzana o vha o naka vhukuma, a sa athu u ita zwa vhudzekani na munna. A tsela tshisimani a ḓadza mvuvhelo yawe a dovha a vhuya.
17 Onoyo mushumeli a gidimela khae a mu ṱanganedza, a ri: “Ndi khou humbela uri u nnwise maḓinyana a re mvuvheloni yau.”
18 Ene a ri: “Inwa muṋe wanga.” A rula mvuvhelo yawe nga u ṱavhanya a i fara nga zwanḓa a mu nwisa.
19 Musi o no fhedza u mu nwisa maḓi, a ri: “Ndi ḓo kela na gamela dzau maḓi u swika dzi tshi pfelela.”
20 A ṱavhanya a shululela maḓi e a vha e mvuvheloni yawe kha mukungwa a vhuyelela lunzhi-lunzhi tshisimani u itela u ka maḓi, a kela gamela dzoṱhe dza onoyo mushumeli.
21 Nga tshenetsho tshifhinga mushumeli o vha o sokou mu lavhelesa o mangala, a tshi khou ḓivhudzisa arali Yehova o fhaṱutshedza lwendo lwawe.
22 Musi gamela dzo no fhedza u nwa, onoyo mushumeli a mu bvisela tshiṅiṋa tsha ningoni tsha musuku tshi lemelaho hafu ya shekele* na mabengele mavhili a musuku a lemelaho shekele* dza fumi,
23 a ri: “Ndi khou humbela uri u mmbudze uri u ṅwananyana wa nnyi? Naa ri nga wana vhulalo nḓuni ya khotsi au?”
24 A mu fhindula a ri: “Ndi ṅwananyana wa Bethuele+ murwa wa Nahoro, mme a khotsi anga ndi Milika.”+
25 A dovha a ri: “Ri na zwiḽiwa* zwinzhi na vhulalo vhu hone.”
26 Onoyo mushumeli a khotha phanḓa ha Yehova, a luvha
27 a ri: “Yehova nga a rendwe, Mudzimu wa muṋe wanga Abrahamu, ane a bvela phanḓa a tshi sumbedza muṋe wanga lufuno lu sa shanduki na uri u a fhulufhedzea. Yehova o ntswikisa muṱani wa mashaka a muṋe wanga.”
28 Musidzana a gidima a ya a vhudza vha muṱani wa mme awe nga ha eneo mafhungo.
29 Huno Rebeka o vha e na khaladzi we a vha a tshi pfi Labani.+ Ngauralo, Labani a gidimela ha uyo mushumeli we a vha e ngei tshisimani.
30 Musi a tshi vhona tshiṅiṋa tsha ningoni na mabengele tshanḓani tsha khaladzi awe na u pfa zwe Rebeka khaladzi awe a zwi amba a tshi ri: “Hezwi ndi zwe onoyo mushumeli a mmbudza zwone,” a ya a ṱanganedza onoyo mushumeli we a vha o ima na gamela dzawe tshisimani.
31 Nga u ṱavhanya a ri: “Dzhena iwe wo fhaṱutshedzwaho nga Yehova, ndi ngani wo ima afha nnḓa? Ndo u lugiselela nnḓu na vhulalo ha gamela.”
32 Ndi hone mushumeli a tshi dzhena nḓuni, a* rula mihwalo i re kha gamela, a dzi ṋea zwiḽiwa,* ha ḓiswa na maḓi a u ṱamba milenzhe yawe na ya vhanna vhe a vha e navho.
33 Naho zwo ralo, musi a tshi ḓiselwa zwiḽiwa, ene a ri: “Ndi nga si ḽe ndi sa athu u amba zwe nda ḓela zwone.” Labani a ri: “Amba!”
34 Ene a ri: “Ndi nṋe mushumeli wa Abrahamu.+
35 Yehova o fhaṱutshedza muṋe wanga zwihulu, a ita uri a pfume nga u mu ṋea nngu na kholomo, siḽiva na musuku, vhashumeli vha vhafumakadzi na vha vhanna na gamela na donngi.+
36 Zwiṅwe hafhu, Sara mufumakadzi wa muṋe wanga o bebela muṋe wanga murwa o no kegula;+ u ḓo ṋea ṅwana wawe tshiṅwe na tshiṅwe tshine a vha natsho.+
37 Muṋe wanga o ita uri ndi mu anele, a ri: ‘U songo ṱoḓela murwa wanga mufumakadzi kha vhananyana vha Vhakanana vhane ra dzula navho.+
38 Fhedzi u ye nḓuni ya khotsi anga na hune ha vha na mashaka anga+ u ṱoḓele murwa wanga mufumakadzi.’+
39 Fhedzi nda amba na muṋe wanga nda ri: ‘Zwino arali onoyo mufumakadzi a hana u vhuya na nṋe?’+
40 A amba na nṋe a ri: ‘Yehova we nda tshimbila phanḓa hawe+ nga u fhulufhedzea, u ḓo rumela muruṅwa wawe+ a u ranga phanḓa a fhaṱutshedza lwendo lwau; u ṱoḓele murwa wanga mufumakadzi muṱani wahashu na kha mashaka a khotsi anga.+
41 U ḓo vha wo vhofholowa kha uyu muano arali vha muṱani wa hashu vha hana u u ṋea mufumakadzi. Zwenezwi zwi ḓo u vhofholola kha wonoyu muano.’+
42 “Musi ndi tshi swika tshisimani ṋamusi ndo ri: ‘Yehova Mudzimu wa muṋe wanga Abrahamu, ndi khou humbela uri u ite uri lwendo lwanga lu bvelele,
43 ndo ima henefha tshisimani. Ita uri musidzana+ ane a ḓo ri a tshi ḓa u ka maḓi nda ri: “Ndi khou humbela uri u rule mvuvhelo ya maḓi ndi nwe,”
44 ene a amba na nṋe a ri: “Iwe inwa maḓi, ndi ḓo kela na gamela dzau maḓi.” Onoyo mufumakadzi nga a vhe we Yehova a mu nangela murwa wa muṋe wanga.’+
45 “Ndi sa athu u fhedza u amba mbiluni, Rebeka a swika o vhea mvuvhelo yawe kha shaḓa; a tsela tshisimani, a ka maḓi. Nda ri: ‘Ndi khou humbela uri u nnwise maḓi.’+
46 Nga u ṱavhanya a rula mvuvhelo yawe kha shaḓa a ri: ‘Inwa,+ ndi ḓo kela na gamela dzau.’ Ngauralo, nda nwa, a nwisa na gamela.
47 Nga murahu ha zwenezwo, nda mu vhudzisa uri: ‘Iwe u ṅwananyana wa nnyi?’ Ene a fhindula a ri: ‘Ndi ṅwananyana wa Bethuele murwa wa Nahoro na Milika.’ Ndi hone ndi tshi mu ambadza tshiṅiṋa tsha ningoni na mabengele zwanḓani.+
48 Nda khotha phanḓa ha Yehova, nda luvha nda renda Yehova Mudzimu wa muṋe wanga Abrahamu,+ we a nndivhisa nḓilani yo teaho uri ndi wanele murwa wa muṋe wanga mufumakadzi ha murathu wa muṋe wanga.
49 Zwino mmbudze arali u tshi ḓo sumbedza muṋe wanga lufuno lu sa shanduki na uri u a fhulufhedzea; fhedzi arali zwi songo ralo, mmbudze uri ndi ṱoḓe huṅwe.”*+
50 Labani na Bethuele vha fhindula vha ri: “Hezwi zwi bva ha Yehova. Ri nga si kone u u tendela kana u u hanela.*
51 Rebeka khoyu. Mu dzhie u ṱuwe nae, a vhe mufumakadzi wa murwa wa muṋe wau, samusi Yehova o amba.”
52 Musi mushumeli wa Abrahamu a tshi pfa zwe vha zwi amba, a khotha phanḓa ha Yehova.
53 Mushumeli a bvisa madzanga a siḽiva na a musuku na zwiambaro a zwi ṋea Rebeka; a dzhia na zwithu zwa mutengo muhulu a zwi ṋea khaladzi a Rebeka na mme awe.
54 Nga murahu ha zwenezwo, ene na vhanna vhe a vha e navho vha ḽa vha nwa navho, vha eḓela henefho.
Nga matsheloni a tshi vuwa a ri: “Ntendeleni ndi humele ha muṋe wanga.”
55 Khaladzi awe na mme awe vha ri: “Litsha musidzana a dzule na riṋe maḓuvha a fumi. Nga murahu a nga ṱuwa.”
56 Fhedzi a amba navho a ri: “Ni songo mpfareledza, samusi Yehova o fhaṱutshedza lwendo lwanga. Ntendeleni uri ndi ṱuwe ndi ye ha muṋe wanga.”
57 Vhone vha ri: “Kha ri vhidze musidzana ri pfe uri ene u ri mini.”
58 Vha vhidza Rebeka vha amba nae vha ri: “Naa u a ṱoḓa u ṱuwa na uyu munna?” Ene a fhindula a ri: “Ndi a ṱoḓa u ṱuwa nae.”
59 Vha tendela Rebeka+ khaladzi avho na muleli* wawe+ vha tshi ṱuwa na mushumeli wa Abrahamu na vhanna vhe a vha e navho.
60 Vha thoma u fhaṱutshedza Rebeka vha ri: “Khaladzi ashu, ngavhe u tshi vha mme a vhathu vha zwigidi zwi tshi andiswa nga zwigidi zwa fumi,* vhana* vhau vha ḓo dzhia khoro* dza vhane vha vha vhenga.”+
61 Rebeka na vhaḓinḓa vhawe vha vhafumakadzi vha ṋamela gamela vha ṱuwa na onoyo munna. Ngauralo, mushumeli a ṱuwa na Rebeka.
62 Isaka o vha a tshi khou bva thungo ya Beera-lahai-roi+ ngauri o vha a tshi dzula shangoni ḽa Negebe.+
63 Isaka o vha a tshi khou tshimbila mudavhini ḽi tshi vho kovhela u itela u elekanya.+ Musi a tshi lavhelesa a vhona gamela dzi tshi khou ḓa!
64 Na Rebeka na ene a tshi lavhelesa a vhona Isaka, a tsa kha gamela.
65 A vhudzisa mushumeli a ri: “Uḽa munna a re fhaḽa mudavhini ane a khou ḓa u ri ṱanganedza ndi nnyi?” Mushumeli a ri: “Ndi muṋe wanga.” Ngauralo, a dzhia labi ḽawe a ḓifukedza ṱhoho.
66 Mushumeli a vhudza Isaka zwoṱhe zwe a ita.
67 Nga murahu ha zwenezwo, Isaka a isa Rebeka denndeni ḽa Sara mme awe.+ A dzhia Rebeka a vha mufumakadzi wawe; a mu funa,+ a pfa o khuthadzwa a si tsha lilela mme awe.+
Ṱhaluso dzi re magumoni a siaṱari
^ Thevhedz., “Mbeu.”
^ Shekele nthihi i lemela gramu dza 11,4. Sedzani Ṱhume. B14.
^ Shekele nthihi i lemela gramu dza 11,4. Sedzani Ṱhume. B14.
^ Kana “Ri na maṱanga na furu.”
^ Khamusi ndi Labani.
^ Kana “maṱanga na furu.”
^ Thevhedz., “ndi pambutshele kha tsha u ḽa kana kha tsha monde.”
^ Kana “Ri nga si kone u u vhudza fhungo ḽivhi kana ḽivhuya.”
^ Ndi muleli wawe we a vha e muḓinḓa wawe nga tshenetsho tshifhinga.
^ Kana “u tshi vha mme a mavhuthu a zwigidi.”
^ Thevhedz., “mbeu.”
^ Kana “miḓi.”
