Genesi 28:1-22
28 Isaka a vhidza Yakobo a mu fhaṱutshedza, a mu laya a ri: “U songo vhinga mufumakadzi kha vhananyana vha Kanana.+
2 Iya Phadani-aramu muṱani wa Bethuele, khotsi a mme au, u vhinge mufumakadzi henengei kha vhananyana vha Labani,+ khaladzi a mme au.
3 Mudzimu Ramaanḓaoṱhe u ḓo u fhaṱutshedza a ita uri ni vhe vhanzhi, ni ande, ni vhe tshaka nnzhi.+
4 Mudzimu u ḓo ṋea iwe na vhana* vhau phaṱhutshedzo dze a dzi fhulufhedzisa Abrahamu,+ uri u dzhie shango ḽe wa vha u tshi khou dzula khaḽo sa mutsinda, ḽe Mudzimu a ḽi ṋea Abrahamu.”+
5 Isaka a ita uri Yakobo a ṱuwe a ye Phadani-aramu, ha Labani murwa wa Bethuele wa Muaramu,+ khaladzi a Rebeka+ mme a Yakobo na Esau.
6 Esau a vhona uri Isaka o fhaṱutshedza Yakobo, o mu vhudza uri a ye Phadani-aramu uri a vhinge mufumakadzi henengei na uri musi a tshi mu fhaṱutshedza o mu laya a ri: “U songo vhinga mufumakadzi kha vhananyana vha Kanana.”+
7 Esau o vhona na uri Yakobo o thetshelesa khotsi awe na mme awe a ya Phadani-aramu.+
8 Ngauralo, Esau a ṱhogomela uri khotsi awe Isaka o vha a sa takaleli vhananyana vha Kanana,+
9 Esau a ya ha Ishimaele a vhinga Mahalathi ṅwananyana wa Ishimaele murwa wa Abrahamu, khaladzi a Nebayothe, a vha muṅwe wa vhafumakadzi vhe a vha e navho.+
10 Yakobo a bva Beresaba a ya Harani.+
11 A swika huṅwe fhethu a ḓilugiselela uri a eḓele henefho ngauri ḽo vha ḽo no kovhela. A dzhia ḽiṅwe ḽa matombo a henefho fhethu a ḽi siamela a eḓela henefho.+
12 A ḽora a tshi khou vhona zwiṱepisi* zwi tshi bva fhasi zwi tshi ya ṱaḓulu; ho vha hu na vharuṅwa vha Mudzimu vha tshi tsa vha tshi gonya ngazwo.+
13 A tshi lavhelesa a vhona Yehova e nga nṱha hazwo, a amba na Yakobo a ri:
“Ndi nṋe Yehova Mudzimu wa Abrahamu khotsi au na Mudzimu wa Isaka.+ Shango ḽe wa eḓela khaḽo, ndi ḓo ḽi ṋea iwe na vhana* vhau.+
14 Vhana* vhau vha ḓo vha vhanzhi sa buse ḽa kha ḽifhasi,+ u ḓo phaḓalala wa ya vhukovhela, vhubvaḓuvha, devhula na tshipembe, miṱa yoṱhe ya kha ḽifhasi i ḓo fhaṱutshedzwa nga iwe na vhana* vhau.+
15 Ndi na iwe, ndi ḓo u tsireledza hoṱhe hune wa ya hone, ndi ḓo u vhuisa kha ḽeneḽi shango.+ A thi nga u litshi u vhuya u swika ndi tshi ita zwe nda u fhulufhedzisa.”+
16 Yakobo a karuwa a ri: “Nangoho Yehova u hone henefha, ndo vha ndi sa zwi ḓivhi.”
17 A ofha a ri: “Afha fhethu hu a ofhisa vhukuma. Hafha fhethu ndi nḓuni ya Mudzimu,+ afha ndi khoroni ya ṱaḓulu.”+
18 Yakobo a vuwa nga matsheloni-tsheloni a dzhia tombo ḽe a vha o ḽi siamela, a ḽi imisa sa phuphu, a shela mapfura kha ṱhodzi yaḽo.+
19 Fhethu afho a ri hu pfi Bethele,* fhedzi wonoyo muḓi wo vha u tshi vhidzwa Lusi.+
20 Yakobo a ana a ri: “Arali Mudzimu a bvela phanḓa a tshi ntsireledza lwendoni lwanga, a nṋea vhurotho ha u ḽa na zwiambaro,
21 nda humela nḓuni ya khotsi anga nga mulalo, nangoho Yehova u ḓo vha e Mudzimu wanga.
22 Ḽeneḽi tombo ḽe nda ḽi imisa sa phuphu ḽi ḓo vha nnḓu ya Mudzimu,+ ndi ḓo u ṋea tshafumi kha zwoṱhe zwine wa nṋea zwone.”
Ṱhaluso dzi re magumoni a siaṱari
^ Thevhedz., “mbeu.”
^ Kana “ḽeri.”
^ Thevhedz., “mbeu.”
^ Thevhedz., “Mbeu.”
^ Thevhedz., “mbeu.”
^ Zwine zwa amba uri “Nnḓu Ya Mudzimu.”
