Genesi 29:1-35
29 Nga murahu ha zwenezwo, Yakobo a bvela phanḓa na lwendo lwawe a tshimbila a vhuya a swika shangoni ḽa vhathu vha Vhubvaḓuvha.
2 A tshi lavhelesa a vhona hu na tshisima ḓakani na masambi mararu a nngu o kuvhangana tsini natsho, ngauri vho vha vha tshi nwisa masambi avho kha tshenetsho tshisima. Ho vha hu na tombo ḽihulu ḽe ḽa vha ḽo vala tshisima tshenetsho.
3 Musi masambi oṱhe o kuvhangana henefho, vha phigulusa tombo ḽo valaho tshisima, vha nwisa masambi, nga murahu vha vhuyedzedza tombo mulomoni wa tshisima.
4 Yakobo a amba navho a ri: “Vhahashu, ni bva ngafhi?” Vha fhindula vha ri: “Ri bva Harani.”+
5 A vha vhudzisa a ri: “Labani+ muḓuhulu wa Nahoro+ ni a mu ḓivha?” Vha fhindula vha ri: “Ri a mu ḓivha.”
6 A amba navho a ri: “Naa u tshee o takala?” Vha fhindula vha ri: “U tshee o takala. Ṅwananyana wawe Rahele+ khoyu u khou ḓa na nngu.”
7 A bvela phanḓa a ri: “Hu kha ḓi vha masiari. A si tshifhinga tsha u kuvhanganya masambi. Nwisani nngu maḓi, dzi ye u fula.”
8 Vha fhindula vha ri: “A ro ngo tendelwa u ita nga u ralo u vhuya u swika masambi oṱhe a tshi kuvhanganywa, ra phigulusa tombo ḽo valaho tshisima. Ra kona u nwisa nngu.”
9 Musi a tshi kha ḓi amba navho, Rahele a ḓa na nngu dza khotsi awe, ngauri o vha e mulisa.
10 Musi Yakobo a tshi vhona Rahele ṅwananyana wa Labani, khaladzi a mme awe e na nngu dza Labani, Yakobo a ṱavhanya a phigulusa tombo ḽo valaho tshisima a nwisa nngu dza Labani khaladzi a mme awe.
11 Yakobo a khisa Rahele, a vusa tshililo tshihulu.
12 Yakobo a thoma u vhudza Rahele uri u shaka ḽa khotsi awe, ndi murwa wa Rebeka. Rahele a gidima a ya a vhudza khotsi awe.
13 Nga u ṱavhanya musi Labani+ a tshi vhudzwa nga ha Yakobo murwa wa khaladzi awe, a gidima a ya u mu ṱanganedza. A mu kuvhatedza a mu khisa a vhuya nae nḓuni yawe. Yakobo a thoma u ṱalutshedza Labani zwoṱhe zwe zwa bvelela khae.
14 Nga murahu ha zwenezwo, Labani a amba nae a ri: “Iwe u shaka ḽanga.” Ngauralo, a dzula nae ṅwedzi woṱhe.
15 Nga murahu ha zwenezwo, Labani a amba na Yakobo a ri: “Ngauri u shaka ḽanga,+ naa zwi amba uri u ḓo ntshumela lwa fhedzi? Mmbudze uri ndi u holele nga mini?”+
16 Labani o vha e na vhananyana vhavhili. Muhulwane o vha a tshi pfi Lea, muṱuku a tshi pfi Rahele.+
17 Maṱo a Lea o vha a sa kungi, ngeno Rahele o vha e na tshivhumbeo tshavhuḓi, o naka.
18 Yakobo o vha a tshi funa Rahele, nga zwenezwo a ri: “Ndo ḓiimisela u u shumela miṅwaha ya sumbe ndi tshi itela Rahele ṅwananyana wau muṱuku.”+
19 Labani a ri: “Ndi khwine ndi tshi u ṋea ene nṱhani ha u mu ṋea muṅwe munna. Bvela phanḓa u tshi dzula na nṋe.”
20 Yakobo a shuma miṅwaha ya sumbe a tshi itela Rahele,+ fhedzi kha Yakobo zwo vha zwi tshi tou nga maḓuvha a si gathi nga ṅwambo wa uri o vha tshi mu funa.
21 Yakobo a amba na Labani a ri: “Nṋee mufumakadzi wanga ndi ite zwa vhudzekani nae, ngauri tshifhinga tshanga tsha u mu shumela tsho fhela.”
22 Labani a kuvhanganya vhathu vhoṱhe vha henefho fhethu a ita tshimima.
23 Fhedzi nga madekwana Labani a dzhia Lea ṅwananyana wawe a mu isa ha Yakobo uri a ite zwa vhudzekani nae.
24 Zwiṅwe hafhu, Labani a dzhia Silipa mushumeli wawe wa mufumakadzi, a mu ṋea Lea ṅwananyana wawe uri a vhe mushumeli wawe.+
25 Nga matsheloni Yakobo a vhona uri ndi Lea! A amba na Labani a ri: “Ndi zwithu-ḓe zwe wa nnyita zwone? Naa a tho ngo u shumela ndi tshi itela Rahele? Zwino ndi ngani wo mphura?”+
26 Labani a fhindula a ri: “A si kuitele kwashu uri hu vhingwe murathu musi wa tanzhe a sa athu u vhingwa.
27 Fhedza vhege yoṱhe na onoyu mufumakadzi. Nga murahu ha zwenezwo, u ḓo ṋewa na uyu muṅwe wa dovha wa shuma miṅwe miṅwaha ya sumbe.”+
28 Yakobo a ita nga u ralo a fhedza vhege yoṱhe e na Lea, nga murahu Labani a mu ṋea Rahele ṅwananyana wawe uri a vhe mufumakadzi wawe.
29 Zwiṅwe hafhu, Labani a dzhia Biliha+ mushumeli wawe wa mufumakadzi, a mu ṋea Rahele ṅwananyana wawe uri a vhe mushumeli wawe.+
30 A dovha a ita zwa vhudzekani na Rahele, o vha a tshi funesa Rahele u fhira Lea, a dovha a shumela Labani miṅwaha ya sumbe.+
31 Musi Yehova a tshi vhona uri Lea ha funwi,* a ita uri a vhifhe muvhilini,*+ fhedzi Rahele o vha a sa bebi.+
32 Ngauralo, Lea a vhifha muvhilini a vha na murwa a mu ira dzina ḽa Rubeni,*+ nge a ri: “Ngauri Yehova o vhona u tambula hanga,+ zwino munna wanga u ḓo thoma u mpfuna.”
33 A dovha a vhifha muvhilini a beba murwa, a ri: “Yehova o nthetshelesa ngauri ndo vha ndi sa funwi, fhedzi a dovha a nṋea hoyu ṅwana.” A mu ira dzina ḽa Simioni.*+
34 A dovha a vhifha muvhilini a beba murwa, a ri: “Zwa zwino munna wanga u ḓo vha tsini-tsini na nṋe ngauri ndo mu bebela vharwa vhararu.” Ngauralo, a mu ira dzina ḽa Levi.*+
35 A dovha a vhifha muvhilini a beba murwa, a ri: “Zwino ndi ḓo renda Yehova.” A mu ira dzina ḽa Yuda.*+ Nga murahu ha zwenezwo, a si tsha beba.
Ṱhaluso dzi re magumoni a siaṱari
^ Thevhedz., “u a vhengwa.”
^ Thevhedz., “a vula mbumbelo yawe.”
^ Zwine zwa amba uri “Vhona Murwa!”
^ Zwine zwa amba uri “U Pfa.”
^ Zwine zwa amba uri “U Nambatela; U Ṱanganya.”
^ Zwine zwa amba uri “Thendo; Wa U Rendwa.”
