Genesi 35:1-29
35 Nga murahu ha zwenezwo, Mudzimu a amba na Yakobo a ri: “Takuwa u ye Bethele+ u dzule henengei, henefho u fhaṱele Mudzimu wa ngoho aḽeṱare, ene we a ḓa ha iwe musi u tshi khou shavha mukomana wau Esau.”+
2 Ngauralo, Yakobo a amba na muṱa wawe na vhoṱhe vhe a vha e navho a ri: “Laṱani midzimu ya mazwifhi ine na vha nayo,+ ni ḓikunakise ni ambare zwiṅwe zwiambaro,
3 ri ye Bethele. Henefho ndi ḓo fhaṱela Mudzimu wa ngoho aḽeṱare we a mphindula musi ndo tsikeledzea, a vha na nṋe hoṱhe* he nda ya hone.”+
4 Huno vha ṋea Yakobo midzimu yoṱhe ya mazwifhi ine vha vha nayo na zwiṅiṋa zwi re nḓevheni dzavho, Yakobo a zwi bwela* fhasi ha muri muhulu u re tsini na Shikeme.
5 Nga murahu ha zwenezwo vha ṱuwa, Mudzimu a ita uri vhathu vha miḓi ye ya vha yo vha tanga vha vha ofhe, uri vha si kone u pandamedza vharwa vha Yakobo.
6 Mafheleloni Yakobo na vhathu vhoṱhe vhe a vha e navho vha swika Lusi+ shangoni ḽa Kanana, hune ha vha Bethele.
7 A fhaṱa aḽeṱare henefho, a ri henefho fhethu hu pfi Ele-bethele,* ngauri henefho Mudzimu wa ngoho o ḓidzumbulula khae musi a tshi khou shavha mukomana wawe.+
8 Nga murahu, Debora+ muleli wa Rebeka, a fa a vhulungwa tsini na Bethele fhasi ha muri wa muouku. A ri hu pfi Aloni-bakuthi.*
9 Mudzimu a dovha a ḓa kha Yakobo musi a tshi khou bva Phadani-aramu a mu fhaṱutshedza.
10 Mudzimu a amba nae a ri: “Dzina ḽau ndi Yakobo.+ A u tsha ḓo pfi Yakobo, u ḓo pfi Isiraele.” A thoma u mu vhidza Isiraele.+
11 Mudzimu a dovha a amba nae a ri: “Ndi nṋe Mudzimu Ramaanḓaoṱhe.+ Bebani ni vhe vhanzhi. Ndi ḓo u ita khotsi a tshaka nnzhi,+ u ḓo beba mahosi.+
12 Shango ḽe nda ḽi ṋea Abrahamu na Isaka ndi ḓo ḽi ṋea iwe na vhana* vhau, ndi ḓo vha ṋea ḽeneḽi shango.”+
13 Nga murahu ha zwenezwo, Mudzimu a gonya nṱha a mu sia henefho fhethu he a vha a tshi khou amba nae e hone.
14 Nga zwenezwo, Yakobo a vhea phuphu fhethu he Mudzimu a amba nae e hone, phuphu ya tombo, a shela tshifhiwa tsha tshinwiwa na mapfura khaḽo.+
15 Yakobo a vhidza henefho fhethu he Mudzimu a amba nae e hone a ri hu pfi Bethele.+
16 Vha ṱuwa Bethele. Musi hu tshi kha ḓi vha kule uri vha swike Efurata, tshifhinga tsha Rahele tsha u beba tsha swika, zwa mu konḓela nga maanḓa u beba.
17 Musi a tshi khou konḓelwa u beba, mubebisi a amba nae a ri: “U songo ofha ngauri na onoyu ṅwana u ḓo mu beba.”+
18 Musi a tshi vho welela (ngauri o vha a tshi khou fa) a mu ira dzina ḽa Benoni,* fhedzi khotsi awe a mu ira dzina ḽa Benyamini.*+
19 Rahele a fa a vhulungwa vhe nḓilani ya u ya Efurata, hune ha vha Betlehema.+
20 Yakobo a vhea phuphu kha vhiḓa ḽawe; ya vha phuphu ya vhiḓa ḽa Rahele u swika na ṋamusi.
21 Nga murahu Isiraele a ṱuwa a atha dennde ḽawe kule ha mutsheṱo wa Edere.
22 Nga tshiṅwe tshifhinga musi Isiraele a tshi khou dzula kha ḽeneḽo shango, Rubeni a lala na Biliha mufumakadzi wa vhuimo ha fhasi* wa khotsi awe, Isiraele a zwi pfa.+
Yakobo o vha e na vharwa vha 12.
23 Vharwa vha Lea vho vha vhe Rubeni+ tanzhe ḽa Yakobo, Simioni, Levi, Yuda, Isashari na Sebuloni.
24 Vharwa vha Rahele vho vha vhe Yosefa na Benyamini.
25 Vharwa vha Biliha mushumeli wa Rahele wa mufumakadzi vho vha vhe Dani na Nafutali.
26 Vharwa vha Silipa mushumeli wa Lea wa mufumakadzi vho vha vhe Gada na Ashere. Vhenevho ndi vharwa vha Yakobo vhe a bebelwa vhone ngei Phadani-aramu.
27 Mafheleloni Yakobo a swika Mamure,+ Kiriate-ariba hune ha vha Heburoni, he Isaka khotsi awe a vha a tshi dzula hone, he Abrahamu na Isaka vha dzula hone sa vhatsinda.+
28 Isaka o tshila miṅwaha ya 180.+
29 Isaka a fa a vhulungwa na vhathu vha hawe o no lalama, a vhulungwa nga vharwa vhawe Esau na Yakobo.+
Ṱhaluso dzi re magumoni a siaṱari
^ Kana “nḓilani.”
^ Kana “dzumba.”
^ Zwine zwa amba uri “Mudzimu Wa Bethele.”
^ Zwine zwa amba uri “Muouku Wa Zwililo.”
^ Thevhedz., “mbeu.”
^ Zwine zwa amba uri “Murwa Wa Tshanḓa Tsha U Ḽa.”
^ Zwine zwa amba uri “Murwa Wanga Wa Zwililo.”
^ Sedzani Mutevhe Wa Ṱhalutshedzo Ya Maipfi.
