Genesi 38:1-30
-
Yuda na Thamara (1-30)
38 Nga tshenetsho tshifhinga, Yuda a pfuluwa a sia vhana vha khotsi awe a ya a atha dennde tsini na muṅwe munna wa Muadulamu we a vha a tshi pfi Hira.
2 E henefho Yuda a vhona ṅwananyana wa muṅwe Mukanana+ we a vha a tshi pfi Shua. A mu vhinga, a ita zwa vhudzekani nae,
3 a vhifha muvhilini. Nga murahu a beba ṅwana wa mutukana a mu ira dzina ḽa Ere.+
4 A dovha a vhifha muvhilini a beba ṅwana wa mutukana a mu ira dzina ḽa Onana.
5 A dovha a beba ṅwana wa mutukana a mu ira dzina ḽa Shela. Yuda o vha e muḓini wa Akhatsibi+ musi mufumakadzi wawe a tshi mu bebela onoyo ṅwana.
6 Nga murahu ha tshifhinga, Yuda a vhingela Ere tanzhe ḽawe mufumakadzi, o vha a tshi pfi Thamara.+
7 Fhedzi Ere tanzhe ḽa Yuda, o vha a tshi ita zwithu zwi sa takadzi Yehova; huno Yehova a mu vhulaya.
8 Nga nṱhani ha zwenezwo, Yuda a amba na Onana a ri: “Ita zwa vhudzekani na mufumakadzi wa mukomana wau u mu vhinge uri u bebele mukomana wau vhana.”+
9 Fhedzi Onana o vha a tshi zwi ḓivha uri vhana a vha nga ḓo dzhiiwa vhe vhawe.+ Musi a tshi ita zwa vhudzekani na mufumakadzi wa mukomana wawe a fhaladzela mbeu yawe fhasi uri a si bebele mukomana wawe vhana.+
10 Zwe a ita zwo vha zwi sa takadzi Yehova. Nga zwenezwo, na ene a mu vhulaya.+
11 Yuda a amba na Thamara mazwale wawe a ri: “Iya u dzule muṱani wa khotsi au u tshilikadzi u swika Shela murwa wanga a tshi aluwa.” Ngauri Yuda o vha a tshi humbula uri: “Na Shela a nga fa vhunga vhakomana vhawe.”+ Thamara a ṱuwa a ya a dzula nḓuni ya khotsi awe.
12 Ho no fhela maḓuvha manzhi ṅwananyana wa Shua,+ mufumakadzi wa Yuda a fa. Musi Yuda o no fhedza u lilela mufumakadzi wawe, a ṱuwa a ya ngei Thimine+ ha vhavheuli vha nngu dzawe e na khonani yawe Hira wa Muadulamu.+
13 Thamara a vhudzwa uri: “Mazwale wau u khou ya Thimine u vheula nngu dzawe.”
14 A tshi pfa zwenezwo, a bvula zwiambaro zwawe zwa vhutshilikadzi a khurumela sholo u itela u ḓithivha tshifhaṱuwo, a dzula khoroni ya Enaimi, i re nḓilani i yaho Thimine. Ngauri o vhona uri Shela o vha o no aluwa, fhedzi hu sa athu u itwa uri Shela a mu vhinge.+
15 Musi Yuda a tshi mu vhona, a humbula u nga u rengisa muvhili, ngauri o vha o ḓithivha tshifhaṱuwo.
16 Ngauralo, a pambutshela khae nga thungo ha nḓila a ri: “Ndi khou humbela uri u ntendele ndi ite zwa vhudzekani na iwe.” Ngauri o vha a sa ḓivhi uri ndi mazwale wawe.+ Naho zwo ralo, Thamara a fhindula a ri: “U ḓo nṋea mini arali nda ita zwa vhudzekani na iwe?”
17 A fhindula a ri: “Ndi ḓo u ṋea tshibudzana kha sambi ḽanga.” Fhedzi Thamara a ri: “Naa u ḓo nṋea tshithu tshine nda ḓo sala ndo tshi fara u swika u tshi ḓisa tshibudzana?”
18 Yuda a ri: “Ndi u ṋee mini tshine wa ḓo sala wo tshi fara?” Thamara a ri: “Rinngi yau ya luswayo+ na ngeḓane yau na thonga ye wa fara.” Ngauralo, a mu ṋea zwenezwo zwithu, a ita zwa vhudzekani nae, a vhifha muvhilini.
19 Nga murahu ha zwenezwo, a takuwa a ṱuwa, a bvula sholo a ambara zwiambaro zwawe zwa vhutshilikadzi.
20 Yuda a ruma khonani yawe ya Muadulamu+ uri i ise tshibudzana uri i wane zwe a sia o farisa uḽa mufumakadzi, fhedzi i si mu wane.
21 Khonani yawe ya vhudzisa vhanna vha henefho, ya ri: “U ngafhi uḽa muthu ane a rengisa muvhili thembeleni wa ngei Enaimi tsini na nḓila?” Fhedzi vha ri: “A hu athu u vhuya ha vha na muthu ane a rengisa muvhili fhano thembeleni.”
22 Mafheleloni a humela kha Yuda a ri: “A tho ngo mu wana, vhanna vha henefho vho ri: ‘A hu athu u vhuya ha vha na muthu ane a rengisa muvhili fhano thembeleni.’”
23 Yuda a ri: “Kha zwi dzhie onoyo mufumakadzi uri ri sa ḓo ḓinyadzisa. Ndo u ruma uri u ise hetshi tshibudzana, fhedzi iwe a wo ngo mu wana.”
24 Naho zwo ralo, nga murahu ha miṅwedzi i ṱoḓaho u vha miraru, Yuda a vhudzwa uri: “Thamara mazwale wau o ḓiita muthu ane a rengisa muvhili, o vhifha muvhilini.” Musi a tshi pfa zwenezwo a ri: “Mu bviseleni nnḓa a fhiswe.”+
25 Musi a tshi khou bviselwa nnḓa, a rumela mulaedza kha mazwale wawe a ri: “Ndo vhifhiswa muvhilini nga muṋe wa hezwi zwithu.” A dovha a ri: “Ndi khou humbela uri u ṱolisise uri u vhone uri rinngi ya luswayo na ngeḓane na thonga ndi zwa nnyi.”+
26 Yuda a zwi ṱolisisa a ri: “Ndi muvhuya u mphira, ngauri a tho ngo mu ṋea Shela murwa wanga.”+ Yuda ho ngo tsha dovha a ita zwa vhudzekani nae.
27 Musi tshifhinga tsha u vhofholowa tshi tshi swika, ha wanala uri ho vha hu na mafhaṱa* mbumbeloni yawe.
28 Musi a tshi khou beba muṅwe ṅwana a bvisa tshanḓa, mubebisi a ṱavhanya a tshi fara a tshi vhofha nga harane tswuku, a ri: “Hoyu ndi ene we a bva u thoma.”
29 Fhedzi nga u ṱavhanya a humisa tshanḓa tshawe, murathu wawe a bva, mubebisi a ri: “Wo ḓivulela nḓila!” Ngauralo, a mu ira dzina ḽa Perese.+
30 Nga murahu mukomana we a vha o vhofhelelwa harane tswuku a bva, a irwa dzina ḽa Zera.+
Ṱhaluso dzi re magumoni a siaṱari
^ Kana “malwelavanḓa.”
