Genesi 42:1-38
42 Musi Yakobo a tshi pfa uri hu na goroi ngei Egipita,+ a vhudzisa vharwa vhawe a ri: “Ndi ngani no sokou dzula no lavhelesana?”
2 A dovha a ri: “Ndo pfa uri hu na goroi ngei Egipita. Tselani henengei ni ye u ri rengela, uri ri tshile ri si fe.”+
3 Ndi hone vhakomana vha Yosefa vha fumi+ vha tshi ya Egipita u renga goroi.
4 Fhedzi Yakobo ho ngo ruma Benyamini+ murathu wa Yosefa uri a ṱuwe na vhaṅwe vhakomana vhawe, nge a ri: “Khamusi a nga welwa nga khombo a fa.”+
5 Ngauralo, vharwa vha Isiraele khathihi na vhaṅwe vha ya u renga zwiḽiwa, ngauri nḓala yo vha yo no swika na shangoni ḽa Kanana.+
6 Yosefa o vha e ene muvhusi wa shango,+ e ene ane a rengisela vhathu vhoṱhe vha ḽifhasi goroi.+ Nga zwenezwo, vhakomana vha Yosefa vha ḓa vha losha vho kwatamisa zwifhaṱuwo.+
7 Musi Yosefa a tshi vhona vhakomana vhawe, a vha ḓivha nga u ṱavhanya, fhedzi a ita uri vha si mu ḓivhe.+ A vha halifhela a ri: “Ni bva ngafhi?” Vha fhindula vha ri: “Ri bva shangoni ḽa Kanana ro ḓa u renga zwiḽiwa.”+
8 Naho Yosefa o ḓivha vhakomana vhawe, fhedzi vhone a vho ngo mu ḓivha.
9 Nga u ṱavhanya Yosefa a humbula zwe a zwi ḽora nga havho,+ a amba navho a ri: “Ni dziṱholi! No ḓa u ṱola fhethu he shango ḽi si tsireledzee hone!”
10 Vhone vha amba nae vha ri: “Aiwa muṋe washu, vhashumeli vhau vho tou ḓa u renga zwiḽiwa.
11 Ri vhana vha khotsi muthihi. Ri vhanna vho lugaho. Vhashumeli vhau a si dziṱholi.”
12 Fhedzi Yosefa a amba navho a ri: “A zwo ngo ralo! No ḓa u ṱola fhethu he shango ḽi si tsireledzee hone!”
13 Vhone vha ri: “Riṋe vhashumeli vhau ro vha ri vharathu na vhakomana vha 12.+ Riṋe ri vhana vha khotsi muthihi+ a dzulaho shangoni ḽa Kanana; zwa zwino muṱuku o sala na khotsi ashu,+ muṅwe ha tsheeho.”+
14 Naho zwo ralo, Yosefa a amba navho a ri: “Ndo no ḓi ni vhudza uri, ‘Ni dziṱholi!’
15 Ndi ḓo ni linga nda vhona arali ni tshi khou amba ngoho: Nga vhutshilo ha Farao a ni nga ḓo ṱuwa fhano u swika murathu waṋu muṱuku a tshi ḓa fhano.+
16 Rumani muṅwe waṋu a ye u dzhia murathu waṋu ngeno vhaṅwe vha tshi ḓo sala vho valelwa. Nga yeneyi nḓila, ndi ḓo kona u vhona arali ni tshi khou amba ngoho. Arali zwi songo ralo, nga vhutshilo ha Farao zwi amba uri ni dziṱholi.”
17 A vha valela vhoṱhe dzhele maḓuvha mararu.
18 Yosefa a amba navho nga ḓuvha ḽa vhuraru a ri: “Itani hezwi uri ni tshile, ngauri ndi ofha Mudzimu.
19 Arali no luga, muṅwe waṋu nga a sale o valelwa dzhele, fhedzi inwi vhaṅwe ni nga ṱuwa, ni dzhie goroi ni i ise miṱani yaṋu u itela u fhedza nḓala.+
20 Arali na nḓisela murathu waṋu, zwi ḓo vhonala uri ni a fhulufhedzea, a ni nga fi.” Vha ita nga u ralo.
21 Vha amba nga tshavho vha ri: “Ri khou pfiswa vhuṱungu nga nṱhani ha murathu washu,+ ngauri ro zwi vhona musi a tshi khou pfa vhuṱungu a tshi khou ri luvhelela uri ri mu pfele vhuṱungu, fhedzi ri si thetshelese. Ndi ngazwo ro welwa nga heyi khombo.”
22 Rubeni a amba navho a ri: “Naa a tho ngo ni kaidza nda ri: ‘Ni songo tshinya nga zwine na ita uyu mutukana,’ fhedzi ni si thetshelese?+ Zwino ri khou lifhedzelwa malofha awe.”+
23 Fhedzi vho vha vha sa zwi ḓivhi uri Yosefa u khou vha pfa, ngauri vho vha vha tshi amba nae vha tshi shumisa muṱalutshedzeli.
24 Nga zwenezwo, a ṱuwa a ya a lila.+ Musi o no vhuya a dovha a amba navho, a dzhia Simioni+ a mu vhofha vha tshi zwi vhona.+
25 Nga murahu ha zwenezwo, Yosefa a laedza uri hu ḓadzwe masaga* avho nga goroi. Vha dovha vha vhudzwa uri vha vhuyedzedze tshelede ya muṅwe na muṅwe kha saga ḽawe, vha vha ṋee mbuvha. Ndi zwe vha itelwa zwone.
26 Vha hwesa goroi yavho kha donngi dzavho vha ṱuwa henefho.
27 Musi muṅwe a tshi vhofholola saga ḽawe uri a ṋee donngi yawe zwiḽiwa* fhethu he vha vha vho eḓela hone, a vhona tshelede yawe i henefho mulomoni wa saga ḽawe.
28 A amba na vhana vha khotsi awe a ri: “Tshelede yanga yo humiswa, i nga ngomu ha saga ḽanga!” Vha fhelelwa nga fhulufhelo, vha tetemela, vha vhudzisana vha ri: “Ndi zwithu-ḓe zwe Mudzimu a ri ita?”
29 Mafheleloni vha swika ha Yakobo khotsi avho shangoni ḽa Kanana vha mu vhudza zwoṱhe zwe zwa itea khavho, vha ri:
30 “Munna ane a vha muvhusi wa shango o ri halifhela,+ samusi o vha a tshi khou ri humbulela uri ro ḓa u ṱola shango.
31 Fhedzi ra amba nae ra ri: ‘Ri vhanna vho lugaho. A ri dziṱholi.+
32 Ri vharathu na vhakomana vha 12,+ vhana vha khotsi muthihi. Muṅwe ha tsheeho,+ zwa zwino muṱuku o sala na khotsi ashu shangoni ḽa Kanana.’+
33 Fhedzi munna ane a vha muvhusi wa ḽeneḽo shango a amba na riṋe a ri: ‘Ndi ḓo ni linga nda vhona arali no luga: Litshani ndi sale na muṅwe waṋu.+ Inwi ni dzhie zwiḽiwa ni ṱuwe u itela u fhedza nḓala miṱani yaṋu.+
34 Ni nḓisele murathu waṋu uri ndi ḓivhe uri a ni dziṱholi, fhedzi no luga. Ndi hone ndi tshi ḓo ni ṋea ṅwana wa khotsi aṋu, na bvela phanḓa ni tshi renga kha ḽino shango.’”
35 Musi vha tshi khou shulula masaga avho muṅwe na muṅwe a wana hu na tshiputo tsha tshelede sagani ḽawe. Musi vhone na khotsi avho vha tshi vhona zwiputo zwa tshelede vha tshuwa.
36 Yakobo khotsi avho a amba navho a ri: “Ni khou ndzhiela vhana.+ Yosefa na Simioni a vha tsheeho,+ zwino ni khou dzhia na Benyamini! Ndi ngani zwenezwi zwithu zwoṱhe zwi tshi khou itea kha nṋe?”
37 Fhedzi Rubeni a amba na khotsi awe a ri: “U nga vhulaya vharwa vhanga vhavhili arali nda sa mu vhuisa ha iwe.+ Ntendele ndi mu ṱhogomele, hu ḓo vha nṋe ane nda ḓo mu vhuisa ha iwe.”+
38 Naho zwo ralo, Yakobo a ri: “Murwa wanga a nga si ṱuwe na iwe, ngauri mukomana wawe o fa, o sala e eṱhe.+ Arali a welwa nga khombo a fa ni lwendoni lune na khou ya u lu fara, ni ḓo ita uri ndi ye Vhiḓani*+ ndo kalaha ndi tshi khou pfa vhuṱungu.”+
Ṱhaluso dzi re magumoni a siaṱari
^ Kana “mikhwama.”
^ Kana “furu.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
