Genesi 44:1-34
44 Nga murahu Yosefa a laedza munna we a vha a tshi ṱhogomela nnḓu yawe a ri: “Ḓadza masaga a avha vhanna nga zwiḽiwa zwinzhi nga hune vha nga kona u zwi hwala, u dzhenise tshelede ya muṅwe na muṅwe kha mulomo wa saga ḽawe.+
2 Fhedzi u tea u dzhenisa tshinwelo tshanga tsha siḽiva sagani ḽa ane a vha muṱukusa na tshelede yawe ya goroi.” A ita zwe Yosefa a mu vhudza zwone.
3 Nga matsheloni, musi ḽi tshi vho vhonadza, vha tendelwa u ṱuwa na donngi dzavho.
4 Musi vha sa athu u vha kule na muḓi, Yosefa a amba na munna we a vha a tshi ṱhogomela nnḓu yawe a ri: “Takuwa u pandamedze vhaḽa vhanna, u tshi swika khavho u ri: ‘Ndi ngani no lifha zwivhuya nga zwivhi?
5 Naa a si tshinwelo tshine muṋe wanga a nwa ngatsho a bvumba ngatsho? Zwe na zwi ita zwo khakhea.’”
6 Mafheleloni a vha fara a amba zwenezwo.
7 Fhedzi vha amba nae vha ri: “Ndi ngani muṋe washu a tshi amba nga u ralo? Riṋe vhashumeli vhau ri nga si ite zwithu zwo raloho.
8 Tshelede ye ra i wana masagani ashu ro i vhuisa kha iwe ri tshi bva shangoni ḽa Kanana.+ Ndi ngani ri tshi nga tswa siḽiva kana musuku nḓuni ya muṋe wau?
9 Arali wa wana muṅwe wa vhalanda vhau e natsho, nga a vhulawe, riṋe vhaṅwe roṱhe ri vhe vhalanda vha muṋe washu.”
10 Nga zwenezwo, a ri: “Nga zwi vhe nga u ralo. Ane a ḓo wanwa e natsho u ḓo vha mulanda wanga, fhedzi inwi noṱhe ni ḓo vha ni si na mulandu.”
11 Nga u ṱavhanya muṅwe na muṅwe wavho a tsitsela saga ḽawe fhasi a ḽi vula.
12 A sedza nga vhuronwane, a thoma nga muhulwane a fhedzisela nga muṱuku. Mafheleloni tshinwelo tsha wanwa sagani ḽa Benyamini.+
13 Vha kherula zwiambaro zwavho, muṅwe na muṅwe a hwesa donngi muhwalo wawe vha humela muḓini.
14 Musi Yuda+ na vhana vha khotsi awe vha tshi ya nḓuni ya Yosefa, o vha a tshi kha ḓi vha hone henefho; vha gwadama phanḓa hawe.+
15 Yosefa a amba navho a ri: “Ndi zwithu-ḓe zwe na ita? Naa no vha ni sa zwi ḓivhi uri munna ane a nga nṋe u a kona u bvumba?”+
16 Yuda a ri: “Ri ḓo ri mini kha muṋe washu? Ri nga sumbedza hani uri ri vhavhuya? Mudzimu wa ngoho o wana uri vhalanda vhau vha na mulandu.+ Zwino ri vhalanda vha muṋe washu, riṋe khathihi na we a wanwa e na tshinwelo!”
17 Naho zwo ralo, Yosefa a ri: “Ndi nga si ite zwithu zwo raloho! Muthu we a wanwa e na tshinwelo ndi ene ane a ḓo vha mulanda wanga.+ Inwi vhaṅwe ṱuwani nga mulalo ni ye ha khotsi aṋu.”
18 Yuda a sendela tsini nae a ri: “Ndi a u humbela muṋe wanga, tendela mulanda wau a ambe wo thetshelesa muṋe wanga, u songo sinyutshela mulanda wau, ngauri iwe u na maanḓa a ngaho a Farao.+
19 Muṋe wanga o vhudzisa vhalanda vhawe a ri: ‘Naa ni na khotsi kana murathu?’
20 Ngauralo, ra amba na muṋe wanga ra ri: ‘Ri na khotsi a re mukalaha na muṅwe murathu muṱuku kha vhoṱhe.+ Ndi ṅwana we a mu beba o no vha mualuwa. Zwino mukomana wawe o fa,+ ndi ene ṅwana wa mme awe e eṱhe o salaho,+ khotsi awe u a mu funesa.’
21 Nga murahu wa amba na vhalanda vhau wa ri: ‘Mu ḓiseni uri ndi mu vhone.’+
22 Fhedzi riṋe ra amba na muṋe washu ra ri: ‘Mutukana a nga si kone u sia khotsi awe. Arali a mu sia, khotsi awe u ḓo fa.’+
23 Ngauralo, iwe wa amba na vhalanda vhau wa ri: ‘Arali na sa vhuya na murathu waṋu muṱuku, ni songo tsha ḓa phanḓa hanga na luthihi.’+
24 “Nga zwenezwo, ra ya ha mulanda wau khotsi ashu, ra mu vhudza zwe muṋe washu a zwi amba.
25 Nga murahu khotsi ashu a ri: ‘Humelani ni ye u ri rengela zwiḽiwanyana.’+
26 Fhedzi ra ri: ‘Ri nga si kone u ya. Ri nga kona u ya arali ra ṱuwa na murathu washu muṱuku, ngauri ri nga si kone u ya phanḓa ha uyo munna arali ri si na murathu washu muṱuku.’+
27 Ngauralo, mulanda wau khotsi anga a amba na riṋe a ri: ‘Ni a zwi ḓivha zwavhuḓi uri mufumakadzi wanga o mbebela vharwa vhavhili.+
28 Nga murahu, muṅwe wavho a nṱutshela, nda ri: “U tea u vha o ṱhukhukanywa!”+ A thi athu u mu vhona u swika zwino.
29 Arali na dovha na ṱuwa na onoyu, a welwa nga khombo a fa, ni ḓo ita uri ndi ye Vhiḓani*+ ndi tshi khou pfa vhuṱungu ndo no kalaha ndo rali.’+
30 “Zwino arali nda humela ha mulanda wau khotsi anga ndi si na uyu mutukana, samusi a tshi funa uyu mutukana nga nḓila ine a ḓifuna ngayo,
31 musi a tshi vhona uri mutukana a ro ngo vhuya nae u ḓo fa, vhalanda vhau vha ḓo ita uri mukalaha ane a vha mulanda wau a ye Vhiḓani* a tshi khou pfa vhuṱungu.
32 Ngauri mulanda wau o khwaṱhisedza uri mutukana u ḓo tsireledzea musi e kule na khotsi awe, a ri: ‘Arali nda kundwa u vhuya nae nda mu ḓisa phanḓa hau, ndi ḓo vha ndo u khakhela vhutshilo hanga hoṱhe.’+
33 Zwino ndi humbela uri u tendele mulanda wau a sale nṱhani ha uri mutukana a vhe mulanda wa muṋe wanga, uri mutukana a kone u huma na vhakomana vhawe.
34 Ndi nga humela hani ha khotsi anga ndi si na uyu mutukana? Ndi nga si kone u konḓelela musi ndi tshi vhona khotsi anga a tshi khou pfa vhuṱungu!”
Ṱhaluso dzi re magumoni a siaṱari
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Kana “Sheol.” Sedzani Mutevhe Wa Ṱhalutshedzo Ya Maipfi.
