Hagai 2:1-23
2 Nga ḓuvha ḽa vhu 21 ḽa ṅwedzi wa vhusumbe, Yehova o amba na muporofita Hagai,+ a ri:
2 “Vhudzisa Serubabele+ muvhusi wa Yuda, ane a vha murwa wa Shelathiele+ na Yoshua+ tshifhe muhulu, ane a vha murwa wa Yehotsadaka+ na vhaṅwe vhathu vhoṱhe u ri:
3 ‘Ndi nnyi ane a kha ḓi humbula vhugala ha yeneyi nnḓu* ha tshifhingani tsho fhiraho?+ Zwino yo tou itisa hani? Musi ni tshi i vhambedza, ni vhona i ya vhuimo ha fhasi?’+
4 “‘Iwe Serubabele ivha na tshivhindi,’ u ralo Yehova, ‘iwe Yoshua tshifhe muhulu, murwa wa Yehotsadaka ivha na tshivhindi.’
“‘Na inwi vhathu vhoṱhe vha shango, ivhani na tshivhindi,’+ u ralo Yehova, ‘shumani.’
“‘Ngauri ndi na inwi,’+ u ralo Yehova wa mavhuthu.
5 ‘Ni songo hangwa zwe nda ni fhulufhedzisa musi ni tshi bva Egipita,+ na zwino ndi kha ḓi ni livhisa nga maanḓa anga.+ Ni songo ofha.’”+
6 “Ngauri Yehova wa mavhuthu u ri, ‘Hu si kale, ndi ḓo dzinginyisa ḽiṱaḓulu, lwanzhe na ho omaho, musi ndi tshi dovha nda dzinginyisa ḽifhasi.’+
7 “‘Ndi ḓo dzinginyisa tshaka dzoṱhe, madzanga* a tshaka dzoṱhe a ḓo ḓa kha yeneyi nnḓu;+ nṋe nda i ḓadza nga vhugala,’+ u ralo Yehova wa mavhuthu.
8 “‘Siḽiva na musuku ndi zwanga,’ u ralo Yehova wa mavhuthu.
9 “‘Vhugala ha ino nnḓu vhu ḓo fhira ha iḽa ya tshifhingani tsho fhiraho,’+ u ralo Yehova wa mavhuthu.
“‘Ndi ḓo ita uri henefha fhethu hu vhe na mulalo,’+ u ralo Yehova wa mavhuthu.”
10 Nga ḓuvha ḽa vhu 24 ḽa ṅwedzi wa vhuṱahe, nga ṅwaha wa vhuvhili hu tshi khou vhusa Dario, Yehova o amba na muporofita Hagai,+ a ri:
11 “Yehova wa mavhuthu u ri, ‘Vhudzisa vhotshifhe zwine mulayo wa zwi amba kha haya mafhungo:+
12 “Arali muthu o putela ṋama khethwa kha zwiambaro zwawe, a kwama ngazwo vhurotho kana tshitshuu kana waini kana mapfura kana tshiḽiwa naho tshi tshifhio, naa zwenezwo zwiḽiwa zwi ḓo vha zwikhethwa?”’”
Vhotshifhe vha fhindula vha ri: “Hai!”
13 Hagai a dovha a vhudzisa, a ri: “Arali muthu a kwama tshiṅwe tsha zwenezwi zwiḽiwa ngeno e na tshika nge a kwama tshitumbu,* naa zwi ḓo vha na tshika?”+
Vhotshifhe vha fhindula vha ri: “Zwi ḓo vha na tshika.”
14 Hagai a ri: “‘Ndi zwine vhenevha vhathu vha vha zwone, ndi zwine lwonolwu lushaka lwa vha zwone phanḓa hanga,’ u ralo Yehova, ‘ndi zwine mishumo yoṱhe ya zwanḓa zwavho ya vha zwone; zwoṱhe zwine vha zwi ṋekedza henefho a zwo ngo kuna.’
15 “‘U bva ṋamusi ṱhogomelani* hezwi: Ho vha hu hani musi hu sa athu u fhaṱululwa thembele ya Yehova?+
16 Musi muthu a tshi ḓa kha thulwi ya thoro o lavhelela u wana mielo ya 20, o wana mielo ya 10 fhedzi, musi muthu a tshi ya hune ha sukelwa hone nḓirivhe a tshi ṱoḓa u ka mielo ya 50 ya waini, o wana mielo ya 20 fhedzi;+
17 ndo tshinyadza mishumo yoṱhe ya zwanḓa zwaṋu nga mufhiso, muunda na tshifhango,+ fhedzi a hu na na muthihi waṋu we a vhuyelela kha nṋe,’ u ralo Yehova.
18 “‘U bva ṋamusi, nga ḓuvha ḽa vhu 24 ḽa ṅwedzi wa vhuṱahe, nga ḽeneḽi ḓuvha ḽe ha itwa mutheo wa thembele ya Yehova; ni ṱhogomele* hezwi:+
19 Naa hu na mbeu ḓuluni?+ Naa munḓirivhe, muhuyu, muri wa muphomagraneithi na wa muṱwari yo no aṋwa? U bva ṋamusi ndi ḓo ni fhaṱutshedza.’”+
20 Yehova a dovha a amba na Hagai nga ḓuvha ḽa vhu 24 ḽa wonoyo ṅwedzi,+ a ri:
21 “Amba na Serubabele muvhusi wa Yuda u ri, ‘Ndi ḓo dzinginyisa ḽiṱaḓulu na ḽifhasi.+
22 Ndi ḓo wisa mivhuso na u fhelisa maanḓa a dzitshaka;+ ndi ḓo wisa gariki na muṋameli wayo, bere dzoṱhe dzi ḓo fa, vhaṋameli vhadzo vha ḓo vhulayana nga tshavho nga banga.’”+
23 “Yehova wa mavhuthu u ri, ‘Nga ḽeneḽo ḓuvha, iwe Serubabele+ mushumeli wanga, ane a vha murwa wa Shelathiele,+ ndi ḓo ita uri u fane na rinngi ya ndeme. Ngauri ndo nanga iwe,’ u ralo Yehova. Zwenezwi ndi zwe zwa ambiwa nga Yehova wa mavhuthu.”
Ṱhaluso dzi re magumoni a siaṱari
^ Kana “thembele.”
^ Kana “zwithu zwavhuḓi.”
^ Kana “humbulani zwavhuḓi nga ha.”
^ Kana “humbule zwavhuḓi nga ha.”
