Hesekiele 10:1-22
10 Musi ndo lavhelesa, nda vhona tshithu tshine tsha nga tombo ḽa safire nṱha ha pulatifomo ye ya vha i nṱha ha ṱhoho dza vhakerube, tsho vha tshi tshi nga khuluṋoni.+
2 Ndi hone a tshi amba na munna we a vha o ambara ḽinene+ a ri: “Dzhena vhukati ha malinga+ ane a khou mona, fhasi ha vhakerube, u ḓadze zwanḓa zwau nga malasha+ ane a khou duga vhukati ha vhakerube, u a hashe muḓini woṱhe.”+ A dzhena ndo lavhelesa.
3 Vhakerube vho vha vho ima kha thungo ya tsha u ḽa tsha nnḓu musi onoyo munna a tshi dzhena, gole ḽa ḓadza muṱa wa nga ngomu.
4 Vhugala ha Yehova+ ha bva kha vhakerube ha ya muṋangoni wa nnḓu, nnḓu ya thoma u ḓadzwa nga gole,+ muṱa wo vha wo ḓala tshedza tsha vhugala ha Yehova.
5 Mubvumo wa phapha dza vhakerube wo vha u tshi khou pfala muṱani wa nga nnḓa, u tshi nga mubvumo wa Mudzimu Ramaanḓaoṱhe a tshi amba.+
6 A amba na munna o ambaraho ḽinene a ri: “Dzhia mulilo u re vhukati ha malinga ane a khou mona vhukati ha vhakerube,” a dzhena a ima tsini na malinga.
7 Muṅwe wa vhakerube a isa tshanḓa tshawe kha mulilo u re vhukati ha vhakerube.+ A dzhia muṅwe wawo a u vhea kha zwanḓa zwa munna o ambaraho ḽinene,+ onoyo munna a u dzhia a ṱuwa.
8 Vhakerube vho vha vhe na zwine zwa nga ndi zwanḓa zwa muthu fhasi ha phapha dzavho.+
9 Musi ndo lavhelesa, nda vhona malinga maṋa tsini na vhakerube, linga ḽiṅwe na ḽiṅwe ḽi tsini na mukerube, malinga o vha a tshi penya sa tombo ḽa khirisoḽaithi.+
10 Eneo malinga maṋa o vha a tshi fana, zwi tshi tou nga linga ḽi kha ḽiṅwe linga.
11 Musi a tshi gidima, o vha a tshi ya thungo dzoṱhe nṋa a sa khoni, ngauri o vha a tshi ya he a livha hone a songo thoma a khona.
12 Kha muvhili woṱhe wa vhakerube, miṱana yavho, zwanḓa zwavho na phapha dzavho ho vha hu na maṱo hoṱhe. Vhuṋa havho vhe na linga tsini navho, e na maṱo hoṱhe.+
13 Ndo pfa ipfi ḽi tshi vhidzelela malinga, ḽa ri, “Malinga kha mone!”
14 Zwoṱhe* zwo vha zwi na zwifhaṱuwo zwiṋa. Tshifhaṱuwo tsha u thoma tsho vha tshi tsha mukerube, tsha vhuvhili tsho vha tshi tsha munna,* tsha vhuraru tsho vha tshi tsha ndau, tsha vhuṋa tsho vha tshi tsha goni.+
15 Vhakerube vho vha vha tshi takuwa, vho vha vhe zwenezwiḽa zwivhumbiwa zwi tshilaho* zwe nda zwi vhona mulamboni wa Kebara,+
16 musi vhakerube vha tshi tshimbila, malinga o vha a tshi gidima tsini navho; musi vhakerube vha tshi ṱharamudza phapha dzavho uri vha takuwe fhasi, malinga o vha a sa khoni kana u ṱutshela kule navho.+
17 Musi vhakerube vha tshi ima, na one o vha a tshi ima; musi vha tshi takuwa, na one o vha a tshi takuwa, ngauri muya une wa tshimbidza zwivhumbiwa zwi tshilaho,* wo vha u tshi tshimbidza na malinga.
18 Vhugala ha Yehova+ ho bva muṋangoni wa nnḓu ha ya nṱha ha vhakerube.+
19 Vhakerube vho ṱharamudzela phapha dzavho nṱha vha takuwa fhasi ndo lavhelesa. Malinga o vha e tsini navho musi vha tshi khou ṱuwa. Vha ima muṋangoni wa khoro ya vhubvaḓuvha ya nnḓu ya Yehova, vhugala ha Mudzimu wa Isiraele ho vha vhu nṱha havho.+
20 Hezwi zwo vha zwi zwivhumbiwa zwi tshilaho* zwe nda zwi vhona fhasi ha khuluṋoni ya Mudzimu wa Isiraele mulamboni wa Kebara,+ nda kona u ḓivha uri zwo vha zwi vhakerube.
21 Vhuṋa havho vho vha vhe na zwifhaṱuwo zwiṋa, phapha nṋa na zwine zwa nga zwanḓa zwa muthu fhasi ha phapha dzavho.+
22 Zwifhaṱuwo zwavho zwo vha zwi tshi fana na zwifhaṱuwo zwe nda zwi vhona mulamboni wa Kebara.+ Vhoṱhe vho vha vha tshi ya phanḓa.+
Ṱhaluso dzi re magumoni a siaṱari
^ Kana “muthu.”
^ Ndi mukerube muṅwe na muṅwe.
^ Thevhedz., “ho vha hu tshivhumbiwa tshi tshilaho.”
^ Thevhedz., “muya wa tshivhumbiwa tshi tshilaho.”
^ Thevhedz., “Hetshi ndi tshivhumbiwa tshi tshilaho.”