Hesekiele 12:1-28
12 Yehova a dovha a amba na nṋe a ri:
2 “Murwa muthu, u khou dzula nḓuni ya mashandukwa. Vha na maṱo, fhedzi a vha vhoni, vha na nḓevhe, fhedzi a vha pfi,+ ngauri ndi vha nnḓu ya mashandukwa.+
3 Iwe murwa muthu, goda thundu dzau uri u ye vhuthubwani. U gode musi vho u lavhelesa nga masiari, u ye vhuthubwani. U ṱuwe hayani u ye vhuthubwani huṅwe fhethu musi vho lavhelesa. Khamusi vha ḓo zwi ṱhogomela, naho vhe vha nnḓu ya mashandukwa.
4 U bvise thundu dzau u ye vhuthubwani nga masiari musi vho lavhelesa, nga madekwana u tea u ṱuwa sa muthu ane a khou iswa vhuthubwani vho lavhelesa.+
5 “U phule buli kha luvhondo musi vho u lavhelesa, u bvise thundu dzau nga ḽeneḽo buli.+
6 U dzhie thundu dzau u dzi hwale kha shaḓa hu na swiswi musi vho u lavhelesa. U thivhe tshifhaṱuwo tshau uri u si kone u vhona fhasi, ngauri ndi khou u ita luswayo kha vha nnḓu ya Isiraele.”+
7 Ndo ita zwe nda laedzwa. Nda bvisa thundu dzanga nga masiari sa dzine dza khou ya vhuthubwani, nga madekwana nda phula buli kha luvhondo nga tshanḓa. Musi ho no vha na swiswi, nda bvisa thundu dzanga nda dzi hwala kha shaḓa vha tshi zwi vhona.
8 Nga matsheloni Yehova a dovha a amba na nṋe a ri:
9 “Murwa muthu, naa mashandukwa a vha nnḓu ya Isiraele ho ngo vhudzisa uri, ‘U khou ita mini?’
10 U vha vhudze uri, ‘Zwe Yehova Murena Muvhusahoṱhe a zwi amba ndi hezwi: “Heyi khaṱhulo i kwama murangaphanḓa+ wa Yerusalema na vhoṱhe vha nnḓu ya Isiraele vha re muḓini.”’
11 “U ambe u ri, ‘Nṋe ndi tshiga kha inwi.+ Zwe nda zwi ita, zwi ḓo itiwa khavho. Vha ḓo ya vhuthubwani.+
12 Murangaphanḓa a re vhukati havho u ḓo hwala thundu dzawe kha shaḓa a ṱuwa hu na swiswi. U ḓo phula buli kha luvhondo a bvisa thundu dzawe ngaḽo.+ U ḓo thivha tshifhaṱuwo tshawe uri a si kone u vhona fhasi.’
13 Ndi ḓo mu posa nga mambule anga a mu fasha.+ Nda mu isa Babele kha shango ḽa Vhakaladea, fhedzi ha nga ḽi vhoni; u ḓo fela henefho.+
14 Vhoṱhe vha re tsini nae, vhathusi vhawe na maswole awe, ndi ḓo vha balanganyela thungo dzoṱhe;+ ndi ḓo vha bvisela banga nda vha pandamedza.+
15 Vha ḓo ḓivha uri ndi nṋe Yehova musi ndi tshi vha balanganyela kha dzitshaka na kha mashango.
16 Fhedzi ndi ḓo tshidza vha si gathi kha banga, nḓala na dwadze, uri vha kone u vhudza tshaka dzine vha ḓo ya khadzo nga ha mishumo yavho yoṱhe i nengisaho; ndi hone vha tshi ḓo ḓivha uri ndi nṋe Yehova.”
17 Yehova a dovha a amba na nṋe a ri:
18 “Murwa muthu, u ḽe vhurotho hau u tshi khou tetemela na u nwa maḓi au wo tshuwa u tshi khou vhilaela.+
19 U ambe na vhathu vha ḽeneḽo shango, u ri, ‘Zwe Yehova Murena Muvhusahoṱhe a zwi vhudza vhadzulapo vha Yerusalema vha re shangoni ḽa Isiraele ndi hezwi: “Vha ḓo ḽa vhurotho havho vha tshi khou vhilaela na u nwa maḓi avho vho tshuwa, ngauri shango ḽavho ḽi ḓo fheliswa tshoṱhe+ nga nṱhani ha khakhathi dza vhoṱhe vhane vha dzula khaḽo.+
20 Miḓi ine vha dzula khayo i ḓo tshinyadzwa, shango ḽa vha shubi;+ ndi hone ni tshi ḓo ḓivha uri ndi nṋe Yehova.”’”+
21 Yehova a dovha a amba na nṋe, a ri:
22 “Murwa muthu, naa uyo murero une na vha nawo kha ḽa Isiraele u amba mini, une wa ri, ‘Ho no fhela maḓuvha zwo vhonwaho kha mabono oṱhe zwi sa athu u itea’?+
23 Nga zwenezwo, vha vhudze uri, ‘Zwe Yehova Murena Muvhusahoṱhe, a zwi amba ndi hezwi: “Ndi ḓo ita uri heḽi ḽiambele ḽi si tsha shumiswa, a vha tsha ḓo dovha vha ḽi shumisa sa murero ngei Isiraele.”’ Fhedzi u vha vhudze uri, ‘Maḓuvha o sendela,+ ane ngao zwo vhonwaho kha mabono oṱhe zwa ḓo itea.’
24 Ngauri a hu tsha ḓo vha na mabono a mazwifhi kana u takadzwa nga u bvumba kha vha nnḓu ya Isiraele.+
25 ‘“Fhedzi nṋe Yehova, ndi ḓo amba. Zwine nda zwi amba zwi ḓo itwa nga u ṱavhanya.+ Zwe nda amba ndi ḓo zwi ita misini yaṋu inwi vha nnḓu ya mashandukwa,”+ u ralo Yehova Murena Muvhusahoṱhe.’”
26 Yehova a dovha a amba na nṋe, a ri:
27 “Murwa muthu, hezwi ndi zwine vhathu* vha Isiraele vha zwi amba vha tshi ri, ‘Mabono e a a vhona a ḓo itea nga murahu ha tshifhinga tshilapfu, u khou porofita nga zwa tshifhinga tshi re kule.’+
28 Nga zwenezwo, vha vhudze uri, ‘Zwe Yehova Murena Muvhusahoṱhe a zwi amba ndi hezwi: “‘Zwoṱhe zwe nda amba zwi ḓo itea nga u ṱavhanya; zwoṱhe zwine nda amba zwi ḓo itea,’ u ralo Yehova Murena Muvhusahoṱhe.”’”
Ṱhaluso dzi re magumoni a siaṱari
^ Thevhedz., “vha nnḓu.”
